O ntoto ke ufwaswa ko, yokwa ngatu vingisa wo lekwa kiankaka. Bibila kivovanga vo Nzambi wavanga ntoto kimana wazingilwa kwa wantu yakwele mvu.

•   “Ansongi bevua nza, Bezingila vo yakwele mvu.”—Nkunga 37:29.

•   “[Nzambi] wasikidisa o ntoto muna nkubilwa zandi; ke ukatulwa ko vana fulu kiandi yakwele mvu.”—Nkunga 104:5.

•   “O ntoto ukwamanana yakwele mvu.”—Kimpovi 1:4.

•   “Ndiona wasema o ntoto yo vanga wo, ona watoma wo sikidisa, . . . kasema wo nkatu ko, kansi wasema wo kimana wazingilwa kwa wantu.”—Yesaya 45:18.

 Nzambi ke yambula ko vo wantu bafwasa emvimba o ntoto muna mvindu, vita yovo muna mambu mankaka. Kansi, ‘ofwasa awana befwasanga e nza.’ (Lusengomono 11:18) Aweyi kevangila e diambu diadi?

 Nzambi osadila Kintinu kiandi kialunga kina kuna zulu muna vinga vana fulu kia yintinu ya wantu eyi ke ilendanga tanina o ntoto ko. (Daniele 2:44; Matai 6:9, 10) Yesu Kristu wa Mwan’a Nzambi oyala muna Kintinu kiaki. (Yesaya 9:6, 7) Vava Yesu kakala ova ntoto, wavanga masivi masonga vo una ye wisa kia vuvika o nkuma wa nsema. (Maku 4:35-41) Wau vo Yesu i Ntinu muna Kintinu kia Nzambi, ntoto ye lekwa yawonso ina mo ikala muna nsi a wisa kiandi. Ovangulula e kalu kia wantu yo kitula kio wauna wakala e mpatu a Edene.—Matai 19:28; Luka 23:43.

 Ve kikilu. Wantu bekalanga ye ngindu zazi mu kuma kia mpila yambi bebakulwilanga e sono kia 2 Petelo 3:7, kivovanga vo: “E zulu ye nza ina owau yalundilwa muna tiya.” Badika mambu mole mekutusadisanga mu toma bakula e nsas’a sono kiaki:

1.   Muna Bibila o mvovo “zulu,” “ntoto” ye “tiya” una ye nsasa zayingi. Muna bonga e nona, sono kia Nkunga 33:8 kivovanga vo: “Yambula ntoto wawonso wavumina Yave.” Omu sono kiaki, o mvovo “ntoto” wantu uyikanga.

2.   E tini ina vana ntandu ye vana yand’a sono kia 2 Petelo 3:7 isonganga e nsas’a mvovo zulu, ntoto ye tiya tuyikwanga mu sono kiaki. E tini kia 5 ye 6 ngwizani ina ye Kizalu muna lumbu ya Noa. Muna lumbu yayina, nz’ankulu yafwaswa, kansi o ntoto ke wavila ko. Ozevo, o “ntoto” una wafwaswa muna Kizalu kia lumbu ya Noa, i wantu a mbi. (Tuku 6:11) Kiafwasa mpe “zulu,” i sia vo, ana bayalanga muna lumbu yayina. Ozevo, yimpumbulu yafwaswa, kansi o ntoto ke yavilwa ko. Noa ye esi nzo andi bavuluka muna lufwasu lwa nza yayina yo kwamanana zingila ova ntoto kuna nim’a Kizalu.— Tuku 8:15-18.

 Nze maza ma Kizalu, o “tiya” tuyikwanga muna sono kia 2 Petelo 3:7, lufwasu lwakwele mvu lwa wantu ambi tuyikanga kansi ke lufwasu lwa ntoto ko. Nzambi osianga nsilu wa “zulu diampa ye nz’ampa, muna “mukala unsongi.” (2 Petelo 3:13) E “nz’ampa,” i kintwadi kia wantu awonso belemvokelanga Nzambi ana beyalwa kwa “zulu diampa,” i sia vo, luyalu lwampa. O luyalu lwalu i Kintinu kia Nzambi eki kikitula o ntoto se paradiso ye luvuvamu.—Lusengomono 21:1-4.