Ekuma Yesu Keyikilwanga vo Mwan’a Nzambi?

WINIKINA MU

Mvutu za Bibila

Nkumbu miayingi Bibila kiyikilanga Yesu vo “Mwan’a Nzambi.” (Yoane 1:49) O mvovo “Mwan’a Nzambi” usonganga vo Nzambi i Mvangi yovo tuku dia mioyo miawonso kumosi yo moyo a Yesu. (Nkunga 36:9; Lusengomono 4:11) Bibila ke kilonganga ko vo Nzambi wawuta mwana wauna wantu bewutilanga o wana.

Bibila kiyikilanga mpe mbasi vo “wan’a Nzambi aludi.” (Yobi 1:6) Bibila kiyikilanga Adami vo “mwan’a Nzambi.” (Luka 3:38) Wau vo Yesu i vangwa kiantete kia Nzambi ye yandi mpe kaka wasemwa kwa Nzambi yandi kibeni, Bibila kiyikilanga Yesu vo i Mwan’a Nzambi osundidi o mfunu.

Nga Yesu wateka zingila kuna zulu vitila kawutuka ova ntoto?

Elo. Yesu vangwa kia mwanda kakala kuna zulu vitila kawutuka ova ntoto se muntu. Yesu yandi kibeni wavova vo: “Nkulumukini kuna zulu.”—Yoane 6:38; 8:23.

Nzambi wasema Yesu vitila kasema konso lekwa.

Bibila kivovanga mu kuma kia Yesu vo:

“Yandi i . . . mwan’antete muna nsema wawonso.”—Kolosai 1:15.
Yandi i “lubantiku lwa nsem’a Nzambi.”—Lusengomono 3:14.

Yesu walungisa ungunza wayikanga ndiona una vo “e tuku diandi dia nz’ankulu, dia lumbu yankulu.”—Mika 5:2; Matai 2:4-6.

Nkia mambu Yesu kavanga vitila keza ova ntoto?

Fulu kiamfunu kakala kiau kuna zulu. Yesu fulu kiaki kayika vava kasamba vo: “E Tata, unkembesa . . . yo nkembo una yakala wau vana ndambu aku una e nza ke yakedi ko.”—Yoane 17:5.

Wasadisa Se diandi mu vanga lekwa yankaka. Yesu wasalanga vana ndambu a Nzambi “se nsadi a ngangu.” (Ngana 8:30) Bibila kivovanga mu kuma kia Yesu vo: “Muna yandi i mwasemenua lekwa yawonso kuna zulu ye va ntoto.”—Kolosai 1:16.

Nzambi wasadila Yesu mu vanga lekwa yankaka kumosi ye mbasi yo nsema owu tumonanga. (Lusengomono 5:11) Nzambi wasalanga kumosi yo Yesu, wauna muntu odesunanga e mbandu ya nzo (arquiteto) kesadilanga entwadi yo ntungi a nzo. Vava muntu kedesunanga e mbandu ya nzo, o ntungi olandanga e mbandu yoyo muna tunga e nzo.

Wakala se Diambu. Bibila kiyikilanga Yesu vo “Diambu” vava kivovelanga e zingu kiandi vitila keza ova ntoto. (Yoane 1:1) Diadi disongele vo Nzambi wasadilanga Mwan’andi mu zayisa e nsangu ye tuludiku twandi kwa vangwa yankaka ya mwanda.

Yesu nanga wasadilwa mpe se Kimpovela kia Nzambi muna mokena yo wantu ova ntoto. Vava Nzambi kavananga tuludiku kwa Adami yo Eva muna Mpatu a Edene, nanga Yesu mpe kasadilanga. (Tuku 2:16, 17) Dilenda kala mpe vo Yesu i Mbasi ona wafilanga Aneyisaele muna makanga ye diavavanga vo balemvokela ndinga andi.—Luvaiku 23:20-23. a

a O Diambu ke yandi kaka ko i mbasi yasadilwa kwa Nzambi mu zayisa nsangu zandi kwa wantu. Muna bonga e nona, vana fulu kiasadila Mwan’andi antete, wasadila mbasi zandi zankaka mu vana e Nsiku miandi kwa Aneyisaele.—Mavangu 7:53; Ngalatia 3:19; Ayibere 2:2, 3.