Awana bavubwa se Mbangi za Yave kansi bayambula samun’e nsangu zambote kw’akaka yovo bayambula kala entwadi y’akwau minkwikizi, ke tukubabembolanga ko. Kansi, tuvavanga kubasadisa kimana bavutukila etima diau muna mambu ma mwanda.

  Ke vana vau ko tuvaikisanga muna nkutakani o muntu ovolele esumu diampwena. Kansi, avo Mbangi a Yave wavubwa una ye fu kia kolamena e nkanikinu mia Nkand’a Nzambi yo lembi viluk’o ntima, obembolwanga yovo vaikiswa muna nkutakani. Nkand’a Nzambi uvovanga vo: “Nukul’o muntu ambi vovo nwina.”​—1 Korinto 5:13.

 Adieyi tuvova avo muntu on’ovaikisu muna nkutakani, o nkaz’andi yo wana bakinu Mbangi za Yave? E ngwizani kakala yau y’esi nzo andi muna mambu ma mwanda ifokokele, kansi e nzola vana vena nkento yo yakala yovo se yo mwana yakinu. E ngwizani a longo ye zingu kia esi nzo kikwamanana.

 Awana bavaikiswa muna nkutakani balenda kwenda muna tukutakanu tweto. Avo bazolele, balenda mpe vewa malongi ma mwanda kw’akuluntu a nkutakani. Ekani diau i sadisa konso muntu wavaikiswa mu nkutakani kayifwanisa diaka se Mbangi a Yave. Ana beyambulanga mavangu mambi yo songa luzolo lwa lemvokela nkanikinu mia Nkand’a Nzambi, betambulwanga diaka se Mbangi za Yave muna nkutakani.