Mbangi za Yave bezitisanga ayadi ye sinsu ya nsi isunzulanga ayadi awaya. Tuzitisanga mpe e nzengo za wantu ana beyimbilanga e nkunga wa nsi, kunda e sinsu kia nsi ye makaka mpe.

 Kansi e Mbangi za Yave ke bekuyisianga mu nkinzi miami ko kadi bekwikilanga vo e nkinzi miami ke mina ngwizani ko ye mana Bibila kilonganga. Wau vo tuzitisanga e nzengo za akaka, oyeto mpe tuyangalalanga vava akaka bezitisanga mana tukwikilanga.

Mu longi diadi

•  Mu nkia malongi ma Bibila tukwikilanga?

•  Adieyi tuvova avo nsiku ulombanga vo twayikama e nkinzi mia nsi?

•  Nga Mbangi za Yave buka ya mambu ma mbumba beyikamanga?

 E nzengo zeto zitukanga muna malongi mole masina:

•   Nzambi kaka tufwete sambila. Bibila kivovanga vo: “Yave wa Nzambi aku kaka ofwete sambila, yandi kaka ofwete sadila e salu kiavauka.” (Luka 4:8) O yimbila e nkunga a nsi yo dia e ndofi ya songa e kwikizi kwa ayadi, ilenda kala se mpila nsambila. Mu kuma kia ntona zau zalongwa kwa Bibila, Mbangi za Yave ke beyikamanga nkinzi miami ko.

   Mbangi za Yave bebakulanga vo o yikama e nkinzi miami, diau dimosi kwandi yo sambila teke, Bibila kisimanga e vangu diadi. (1 Korinto 10:14) Tusansu twankaka tusonganga vo e sinsu ya nsi isadilwanga se sinsu ya nsambila. Carlton Hayes a wa nsoneki a tusansu wasoneka vo: “Muna fu kia tanina e zula, e lekwa kiantete kisadilwanga muna songa e kwikizi yo sambilwa, i sinsu kia nsi.” Daniel Mannix nsoneki wankaka wavova mu kuma kia Akristu a tandu kiantete vo: “Akristu ke batonda . . . vana yimenga ko kwa luyalu lwa [Roma] ediadi diau dimosi kwandi yo lembi tambulwila kunda e sinsu kia nsi.” b

  Kana una vo yeto Mbangi za Yave ke tusambilanga sinsu kia nsi ko, tuvanganga mawonso muna songa luzitu muna sinsu kiaki kumosi ye sinsu yankaka ya nsi.

•   Kuna kwa Nzambi wantu awonso bafwanana kwau. (Mavangu 10:34, 35) Bibila kivovanga vo Nzambi “muna muntu mosi kavangila zula yawonso.” (Mavangu 17:26) Muna kuma kiaki, Mbangi za Yave bekwikilanga vo diambi mu badikila e kanda yovo zula kimosi kisundidi e zula yankaka. Oyeto tuzitisanga wantu a mpila zawonso kana nkutu nkia nsi bawutukila ye fulu bezingilanga.—1 Petelo 2:17.

 Mbangi za Yave ke betelamenanga ayadi ko. Tukwikilanga vo ayadi avo bena i mu kuma kia sia vo Nzambi okubavananga o nswa wa yala. (Roma 13:1-7) Tukwikilanga mpe vo Akristu bafwete lemvokela e wisa kia ayadi.—Luka 20:25.

 Adieyi tuvova avo e nsiku a luyalu ulombele vo twakulula e nsiku mia Nzambi? Ezak’e ntangwa avo dilendakana tulombanga kwa luyalu vo basingika e nsiku. c Avo ediadi ke dilendakene ko, kuna luzitu lwawonso Mbangi za Yave bebakanga e nzengo za “lemvokela Nzambi nze mfumu ke mu wantu ko.”—Mavangu 5:29.

 Ve. E Mbangi za Yave ke bekuyisianga mu mambu ma mbumba ko ngatu yikama ayadi. Vava ke tuyimbilanga nkunga a nsi ko, kunda sinsu kia nsi yovo songa kwikizi kwa ayadi ke disongele ko vo ayadi tutelamenanga. Kansi mana Bibila kivovanga tulemvokelanga.