Ngindu za bendomoka: Mbangi za Yave ke bebundanga lusadisu lwa madotolo vuvu ko.

 Ludi: Tuvanganga wawonso mu solola lusadisu lwambote lwa matodolo mu kuma kia yeto kibeni y’esi nzo zeto. Vava tuyelanga, tukwendanga kwa madotolo ana bena ye umbangi wa wuka yo pasula yimbevo lembi sadila menga. Tuyangalelanga mu kuma kia lunungunuku luvangamanga muna salu kia wuka yimbevo. E mpila za mawuku zilembi sadilwa menga zasokwa mu sadisa Mbangi za Yave, owau mu sadilwa se zina mu sadisa nkangu wawonso. Muna nsi zayingi, owau konso mbevo olenda tina siwa menga muna venga vonza itukanga muna menga, nze yimbevo ya menga isambukilwanga, siwa menga ke mena betela ko ye nitu ambevo yo vilwa wa wantu.

 Ngindu zabendomoka za wantu: Mbangi za Yave bekwikilanga vo lukwikilu lulenda wuka kimbevo.

 Ludi: Oyeto ke tukwikilanga ko vo lukwikilu lulenda wuka kimbevo.

 Ngindu zabendomoka za wantu: Nzimbu zayingi zilombwanga muna wukua lembi siwa menga.

 Ludi: Ovava lusadisu lwa madotolo lembi siwa menga ke divavanga nzimbu zayingi ko. a

 Ngindu zabendomoka za wantu: Konso mvu ayingi muna Mbangi zayingi befwanga kumosi ye wan’akete mu kuma kia tina siwa menga.

 Ludi: E ngindu zazi ke zaludi ko. Nkumbu miayingi madotolo besadilanga ndekwa za pasula yimbevo, nze pasula ntima, visi yo vingisa yikwa ya nitu lembi siwa menga. b Nkumbu miayingi e mbevo ke zisiwa menga ko kumosi ye wan’akete besasukanga ke mu mbevo ko zina zitondanga siwa menga. c Kavena muntu ko olenda vova ye sikididi kiawonso vo o mbevo fwa kefwa muna tina siwa menga yovo osinga sasuka muna tonda siwa menga.

 I mu kuma kia mana tukwikilanga, ke mu diambu dia ngangu za madotolo ko. Tuka muna Luwawanu Luankulu ye luna Luampa o Nkand’a Nzambi ukutukanikinanga twatina menga. (Etuku 9:4; Fuka 17:10; Nsiku 12:23; Mavangu 15:28, 29) Kuna kwa Nzambi o menga i moyo. (Fuka 17:14) Tutinanga siwa menga muna lemvokela Nzambi yo songa o zitu weto kwa yandi una vo i Mvani a moyo.

 Muna mvu miavioka, madotolo mawonso bayindulanga vo osadila ndekwa za lembi siwa menga, i viokesa e tezo ye kuyivonda nkutu, kansi owau e ngindu zau zisobele. Muna bong’e nona, muna mvu wa 2004, zulunalu imosi ivovelanga mambu mawuku yavova vo “ndekwa zayingi zisadilwanga muna wuka Mbangi za Yave ziyantika sadilwa kwa wantu awonso muna mvu mikwiza.” d Zulunalu imosi (Heart, Lung and Circulation) yavova muna mvu wa 2010 vo “‘e ndekwa za pasula mbevo lembi kubasia o menga’ ke tufwete zo sadilanga kaka ko muna Mbangi za Yave, kansi tufwete zo sadilanga mpe muna wantu awonso.”

 Owau madotolo mayingi omu nza yawonso muna pasula yimbevo yampipita yo lembi sia menga, besadilanga ndekwa za toma lunda o menga ma yandi kibeni mbevo. E ndekwa zazi zitoma sadilwanga kana nkutu muna nsi usukami ye zitoma vavuanga kwa mbevo zayingi bena vo ke Mbangi za Yave ko.