Ve. Mbangi za Yave ke besimanga nsamba ko. O baka e nsambu i diambu konso Nkristu kafwete bakila e nzengo. Ndonga muna Mbangi za Yave babakidi kala e nsamba.

 Mawuku mambote tuvanganga ye tuvutulanga matondo muna lunungunuku lwa ngangu za wuka yimbevo ezi zisadisanga mu kulula e vonza ya yimbevo yampasi. Tuvutulanga mpe matondo muna mpila nganga za mawuku bekuyivaninanga ye mpila besadilanga ye fululu kiawonso, musungula muna nsungi zampasi.

 Mbangi za Yave besalanga entwadi ye mfumu za tuyalu ana betalanga mambu ma mawuku. Muna bonga e nona, tuka vuku kia COVID-19 kiayantikila, muna lukisa o nkangu mwamu nzila yayi, Mbangi za Yave bevaikisanga malongi mesonganga e mpila ya kuyitanina muna ndinga zayingi. Nze mfunu wa lembi finamanga muntu yo nkwandi, zitisa o nsiku walembi kutakesanga e ndong’ayingi, kuyibindikila muna zinzo, sukulanga moko, vuata mascara ye mambu mankaka bekanikinanga ayadi.—Roma 13:1, 2.

 Tuka mvu miayingi, e nkanda mia Mbangi za Yave mitoma songanga o mfunu wa lemvokelanga e nsiku:

•   E diambu dia mawuku i diambu konso muntu kafwete bakila e nzengo.—Ngalatia 6:5.

   “[E zulunalu yayi] ke isonganga ko e mpila nlongo muntu kafwete baka, mpila mawuku kafwete landa, ngatu vana luludiku muna diambu dia mawuku. Mambu maziku kaka izayisanga yo yambula kwa konso ntangi katoma fimpa yo baka e nzengo.”—Despertai!, 8 de Fevereiro de 1987.

   “E diambu dia baka e nsamba yo wan’aku i diambu ofwete bakila e nzengo ngeye kibeni.”—Despertai!, 22 de Agosto 1965.

•   O moyo wantalu kikilu, i kuma tuvavilanga mawuku.—Mavangu 17:28.

   “Mbangi za Yave mu luzolo lwa yau kibeni bekwendanga ku lupitalu mu vava mawuku. Wau vo betoma zolanga moyo, bevanganga ngolo mun’owu wa nkanikinu mia Nkand’a Nzambi mu zinga kolo kiandá.”—Eyingidilu dia 1 kia Yuli, 1975.

   “Mbangi za Yave betondanga baka e nlongo yo tambula lusadisu lwa nganga za mawuku. Bezolele kala ye mavimpi mambote yo zinga kolo kiandá. Nze Luka wa Nkristu muna tandu kiantete, akaka muna Mbangi za Yave nganga za mawuku. . . . Mbangi za Yave bevutulanga matondo kwa nganga za mawuku ana bekuyivananga ye fululu kiawonso muna vana lusadisu lwa mawuku kwa akaka. Bevutulanga mpe matondo kwa nganga za mawuku ana bekubawukanga.”—Eyingidilu dia 1 kia Fevelelo, 2011.