Mbangi za Yave ke bekembelelanga lumbu kia luwutuku ko, kadi bekwikilanga vo Nzambi omenganga nkinzi miami. Muna Bibila ke muna nsiku wasikididi ko usimanga o nkinzi wau. Kansi, kikutusadisanga mu zaya mambu mevangamanga muna nkinzi wau yo kutusadisa mu zaya una Nzambi kemwenanga e diambu diadi. Yambula twavovela mambu mayá yo zaya mana Bibila kivovanga mu kuma kia mambu mama.

1.   E fu kia kembela nkinzi a lumbu kia luwutuku mu nsambil’aluvunu kiatuka. O nkanda, Funk & Wagnalls Standard Dictionary of Folklore, Mythology, and Legend, (Dicionário-Padrão de Folclore, Mitologia e Lendas, de Funk e Wagnalls) usonganga vo wantu bayantika kembelela nkinzi wau kadi bakwikilanga vo muna lumbu kia nkinzi a luwutuku lwa muntu, e mianda miambi miakalanga ye kani diavanga e mbi kwa wantu ana bakembelelanga luwutuku lwau. Kansi, wau vo akundi babasanisinanga muna nkinzi, ediadi diasadisanga muna taninua muna mianda miami. Nkanda The Lore of Birthdays (A Tradição dos Aniversários Natalícios) uvovanga vo, kuna nz’ankulu e fu kia soneka lumbu kina muntu kawutuka, diamfunu kikilu diakalanga muna tanga e sinsu ya zayila mambu mebwa kuna ntwala (horóscopo) mun’owu wa “longi dia fimpa ntetembwa (astrologia).” Nkanda wau uvovanga mpe vo “wantu ayingi bakwikilanga vo e vela zina yo nkuma walungisa e makani ma wantu.”

    Kansi, Bibila kitumbanga e fu kia sadila nkisi, ta ngombo, mpandu, yovo “konso diambu dia mpila yayi.” (Nsiku 18:14; Ngalatia 5:19-21) Ediadi i dimosi muna mambu mafila Nzambi mu tumba e mbanza Babele yankulu, kadi nkangu a mbanza yayina batanga ngombo ye fimpa ntetembwa (astrologia). (Yesaya 47:11-15) Mbangi za Yave ke bevavululanga e tuku dia konso nkinzi ko, kansi vava Bibila kivananga tuludiku twatoma kiá nze lwalu lutadidi e fu kiasadila mavangu ma mpandu, tulemvokelanga to.

2.   Akristu a tandu kiantete ke bakembelelanga lumbu kia luwutuku ko. O nkanda Enciclopédia Delta Universal uvovanga vo Akristu a tandu kiantete “bakwikilanga vo e fu kia kembelela lumbu kia luwutuku muna nsambil’a luvunu kiatuka.” Bibila kisonganga vo antumwa ye wantu ankaka ana balongwa kwa Yesu yandi kibeni, basikidisa mbandu ina Akristu awonso bafwete landa.—2 Tesalonika 3:6.

3.   Bibila kisonganga vo Akristu bafwete kembelela kaka lumbu kimosi, i sia vo, lumbu kia lufwa lwa Yesu. (Luka 22:17-20) Ediadi ke dilendi kutusivikisa ko, kadi Bibila kivovanga vo “e lumbu kia lufwa kisundidi e lumbu kia luwutuku.” (Kimpovi 7:1) Muna lumbu kiansuka kia zingu kiandi ova ntoto, Yesu wakivangila nkumbu ambote kwa Nzambi yo kitula lumbu kia lufwa lwandi se kiamfunu lutila lumbu kia luwutuku lwandi.—Ayibere 1:4.

4.   Bibila ke kiyikanga kana nkutu selo kimosi ko kia Nzambi ona wakembelela lumbu kia luwutuku. Ediadi ke disongele ko vo Bibila kiavilakana yika e diambu diadi, kadi kiyikanga wantu wole ana ke basambilanga Nzambi ko bakembelela lumbu kia luwutuku lwau. Kansi, ke kivovelanga nkinzi miami mu mpila yambote ko.—Tuku 40:20-22; Maku 6:21-29.

 Mase bena vo Mbangi za Yave, besonganga vo bezolanga wan’au ke mu lumbu kimosi kaka ko muna mvu, kansi lumbu yawonso. Bevananga mpe tukau kwa wan’au yo kubavangila nkinzi. (Matai 7:11) Muna kuma kiaki, o wan’au ke bemonanga ko vo diambu bevidisanga, nze una usonganga e mvovo milende:

•   “Diambote dikalanga mu tambula tukau muna ola ke tuvingilanga ko.”—Tammy, mvu 12.

•   “Kitambulanga tukau ko muna lumbu yawutuka, kansi mase mame bekumpananga tukau mu lumbu yankaka. Itoma yangalelanga e diambu diadi kadi itambulanga tukau lembi wo zaya.—Gregory, mvu 11.

•   “Nga obenze vo miniti kumi, bolo yo yimbila, nkinzi kikilu? Wiza ku nzo eto wamona una nkinzi ukadilaga.—Eric, mvu 6.