Yeto Mbangi za Yave, tuvanganga mawonso mu siamisa e ngwizani muna nzo zeto ye muna nzo za mfinangani zeto. Tuzitisanga Nzambi wa Mvangi eto ona wasikidisa e nkubika ya esi nzo. (Tuku 2:21-24; Efeso 3:14, 15) Muna Bibila, muna ye nkanikinu mia Nzambi misadisanga wantu mu nza yawonso mu kala yo tongo twambote ye twakiese.

 Tuvanganga mawonso tulenda mu lemvokela malongi ma Bibila, kadi mekutusadisanga mu kala akala, akento, ngudi ye mase mambote. (Ngana 31:10-31; Efeso 5:22–6:4; 1 Timoteo 5:8) E ngangu zina muna Bibila zisadisanga kana nkutu nzo zina zavambana muna nsambila zakala ye ngwizani ambote. (1 Petelo 3:1, 2) Tala mana wantu ankaka bavova vava akazi au bakituka se Mbangi za Yave:

•   “Muna mvu sambanu miantete mia longo lweto twakala ye fu kia tantana yo fungaziana o makasi. Kansi vava Ivete kakituka Mbangi a Yave, wayantika toma songa o zola yo luzindalalu. E nsobani kavanga zavukisa longo lweto.”—Clauir, Brasil.

•   “Kiayangalala ko vava nkaz’ame Chansa kayantika longoka e Bibila ye Mbangi za Yave, kadi yabanzanga vo makanda bevambulanga. Kansi owau imonanga vo e Bibila kiasadisa o longo lweto.”—Agness, Zambia.

 Muna salu kieto kia samuna e nsangu zambote tusadisanga akweto mu zaya una e ngangu zina muna Bibila zilenda kubasadisila mu

•   Toma sola muntu bekazala yandi

•   Siamisa longo lwau muna mvu wantete

•   Kadila yo ma kô mau mu mpila yambote

•   Sadila e nzimbu mu mpila yambote

•   Venga fu kia tantana

•   Yima e fu kia loloka

•   Longa wana mu mpila yambote

 Elo, ezak’e ntangwa idiau divangamanga. Muna bonga e nona, muna mvu wa 1998 kimvuka kimosi kiavanga lufimpu muna tongo tuna vo yakala kaka yovo nkento kaka una se Mbangi a Yave. Lufimpu lwalu lwasonga vo muna tongo 20, 1 kaka wakala ye ntantani vava kasoba dibundu.

 Yesu wasakula vo awana belanda malongi mandi, ezak’entangwa bebangikwa kwa esi nzo zau. (Matai 10:32-36) Nkwa ngangu mosi una ye nkumbu Will Durant wavova vo muna luyalu lwa Roma, “Akristu bavuninuanga mambu vo makanda bavambulanga.” a O unu e Mbangi za Yave mpe bevuninuanga mambu mama. Ndiona okitukanga Mbangi a Yave, nga yandi otwasanga ntantani?

 Vava Mbazi a Nkanu italanga oma ma zitu wa wantu kuna Europa (Corte Européia dos Direitos Humanos) yatala o mfundu wa sia vo, Mbangi za Yave makanda bevambulanga, yavova vo nkumbu miayingi, awana bena vo ke Mbangi za Yave ko yau betwasanga e ntantani muna tongo. Kadi “ke betambulwilanga ko ngatu zitisa o nswa wa yitu yau wasadila mana belongokanga muna dibundu diau.” Mbazi a Nkanu yayi yakudikila vo: “E diambu diadi ditoma vangamanga muna makanda mavambana muna nsambila.” b Kanele vo Mbangi za Yave bebangikwanga mu kuma kia diambu diadi, belemvokelanga e longi dia Bibila divovanga vo: “Ke nuvutula muntu mbi muna mbi ko. . . . Avo dilendakana, kuna dieno sambu, nukadila kuna luvuvamu yo wantu awonso.”—Roma 12:17, 18.

 Mbangi za Yave belemvokelanga luludiku luvovanga vo twakazalelanga kaka “muna Mfumu,” i sia vo, kazala kaka yo muntu tuna dibundu dimosi. (1 Korinto 7:39) O luludiku lwalu lwa Bibila, lwambote kikilu. Muna bonga nona, longi dimosi diavaikiswa muna Journal of Marriage and Family muna mvu wa 2010, diavova vo: “Akazi ana besambilanga dibundu diau dimosi, ana besadilanga yo kwikila mu mambu mau mamosi, ngwizani ambote bekalanga yau. c

 Kansi, Mbangi za Yave ke belombanga ko vo awana bena ye akazi bena vo ke Mbangi za Yave ko bavambana yau. Bibila kivovanga vo: “Avo mpangi una yo nkento wa mundembi-kwikila, o nkento mpe otondele kala yandi, o mpangi kafwete yambula nkento andi ko; avo nkento mpe una ye yakala wa mundembi-kwikila, o yakala mpe otondele kala yandi, o nkento kafwete yambula yakala diandi ko.” (1 Korinto 7:12, 13) Mbangi za Yave belemvokelanga nkanikinu wau.