Ve, Mbangi za Yave ke vaudi kia dibundu ko. Tu Akristu ana besianga ngolo za landa mbandu a Yesu Kristu yo sadila mana tulonganga.

 E mvovo “vaudi” usongele vo vauka yovo vambuka. Tala ngindu zole zitomene zayakana mu kuma kia vaudi kia dibundu ye kuma ke zinina betela ko ye nkubik’eto.

•   Akaka beyindulanga vo e vaudi kia dibundu i dibundu diampa. Mbangi za Yave ke basoka dibundu diampa ko. Vana fulu kia soka dibundu diampa, mbandu ya Akristu a tundu kiantete tulandanga muna nsimbil’eto. E mbandu ye malongi mau tulandanga masonama mu Nkand’a Nzambi. (2 Timoteo 3:16, 17)Tukwikilanga vo e wisa kia malongi ma Nkand’a Nzambi kisundidi malongi ma nsambila za nsoka ko.

•   Akaka beyindulanga vo e vaudi kia dibundu i buka kia vonza kina ye muntu ona belandanga se mfumu au. Yeto Mbangi za Yave ke tuna ye muntu ko ona tulenda yikila vo mfumu eto. Tutoma landanga mbandu ina kasisila alongoki andi Yesu vava kavova vo: “Mosi kaka i Mfumu eno, Kristu.”—Matai 23:10.

 Vana fulu kia kala se vaudi kia dibundu dia vonza, nsambila ya Mbangi za Yave nluta miayingi itwasanga kwa asambidi andi ye kw’akaka muna mavata mawonso. Muna bong’e nona, e salu kieto kia samuna nsangu zambote wantu ayingi kisadisanga mu yambula fu yambi ikubabundunanga, nze bundu wa nua malavu ye ndua zankaka za nkolwa. Vana ntandu, ndonga tulonganga o soneka yo tanga omu nza yawonso. Tusadisanga mpe wantu bebwilwanga e sumbula. Ngolo zayingi mpe tuvanganga mu songa fu yambote ilenda twasa nluta kw’akaka nze una Yesu kakanikina alandi andi.—Matai 5:13-16.