Ingeta, Mbangi za Yave betoma sadisanga wantu vava bebwilanga sumbula. Tuvananga lusadisu kwa Mbangi za Yave ye kw’awana bena vo ke Mbangi za Yave ko, mun’owu wa nkanikinu wasonama muna Nkand’a Nzambi muna Ngalatia 6:10: “Dianu vo, konso ntangwa tuvwidi, mbula twavang’owu wambote kwa wantu awonso, musungula kw’esi kilukwikilu.” Tuvavanga mpe vana lusadisu lwa mwanda yo lufiaulwisu bevuanga o mfunu.—2 Korinto 1:3, 4.

 Muna konso zunga kibwilanga sumbula, akuluntu a nkutakani a zunga kiakina bevanganga mawonso muna vava esi nkutakani zau mu zaya kana vo ben’o moyo yo lusadisu bavuidi o mfunu. I bosi akuluntu betwikanga kuna Vula dia Mbangi za Yave dia nsi au e nsangu za mana bamwene yo lusadisu lwantete bavene.

 Avo e nkutakani muna zunga kiakina ke zilenda vana ko lusadisu bavuidi o mfunu o wantu, Buka kia Selo Yambuta ya Mbangi za Yave bekubikanga lusadisu. Ediadi betela dina ye mpila ina Akristu a tandu kiantete basalaziananga mu nsungi a mvengele. (1 Korinto 16:1-4) E vula dia nsi disolanga buka kia mpangi kubika yo vita o ntu muna vana lusadisu. Mbangi za Yave muna zunga yankaka besadilanga e ntangwa ye mavua mau muna vana lusadisu.—Ngana 17:17.

 Mosi muna mpila isadilwanga e nzimbu za nkutakani zitwikwanga muna mavula ma Mbangi za Yave i vana lusadisu kw’awana bebwilanga e sumbula. (Mavangu 11:27-30; 2 Korinto 8:13-15) Wau vo awana besalanga e salu kiaki ke befutuanga ko, e nzimbu zivaikiswanga zisadilwanga emvimba mu vana lusadisu kw’awana kaka babwididi e sumbula. Nzimbu zawonso tutambulanga tusadilanga zo mu mpila yambote.—2 Korinto 8:20.