Забур 12:7деги: «Аларды сен өзүң коргойсуң»,— деген сөздөр «кыйналгандарга» (5-аят) карата айтылганбы же «Жахабанын сөздөрүнөбү» (6-аят)?

Контексттен көрүнүп тургандай, бул аяттагы сөздөр адамдарга карата айтылган.

Забур 12:1—4-аяттарда Дөөтү сөзүн: «Ишенимдүүлөр көздөн кайым болду»,— деп баштаган. Эми суроо туудурган Забур 12:5—7-аяттарга көңүл буралы. Ал жерде мындай деп айтылган:

5-аятта Кудайдын кыйналгандарды куткарары жөнүндө айтылган.

6-аятта болсо: «Жахабанын сөздөрү — таза сөздөр,.. тазартылган күмүштөй»,— деп жазылган. Буга Жахабанын ишенимдүү кызматчыларынын баары кошулат (Заб. 18:30; 119:140).

Ал эми кийинки аятта, Забур 12:7де: «Оо, Жахаба, аларды сен өзүң коргойсуң. Ар бирин бул муундан түбөлүккө сактайсың»,— делет. «Аларды» жана «ар бирин» деген сөздөр эмнеге карата айтылган?

6-аятта «Жахабанын сөздөрү» жөнүндө айтылып келаткандыктан, айрымдар 7-аяттагы «алар» деген сөз Кудайдын сөздөрүнө карата айтылган дешет. Биз билгендей, душмандар Ыйык Китепти окуганга, которгонго тыюу салышкан, аны жок кылганга аракет кылышкан. Бирок Кудай аны коргоп келген (Ыш. 40:8; 1 Пет. 1:25).

Анткен менен 5-аятта айтылгандар да туура. Жахаба «кыйналгандарга», «таланып-тонолгондорго» дайыма жардам берип келет (Аюп 36:15; Заб. 6:4; 31:1, 2; 54:7; 145:20).

Анда 7-аяттагы «аларды» деген сөз «кыйналгандарга» карата айтылганбы же «Жахабанын сөздөрүнөбү»?

Бул забурдун мазмунуна ылайык, «аларды» деген сөз адамдарга карата айтылган.

Забур 12:1де «ишенимдүүлөрдүн» калбай калганы жазылган. Ал эми 3-аяттан Жахабанын «куулана сүйлөгөн» адамдарды жок кыларын окуйбуз. Жалпылаганда, бул забур бизди буга ынандырат: Жахабанын сөздөрү таза, тагыраак айтканда, чын. Ошондуктан Жахабанын өзүнүн элине болушарынан кымындай да шектенбесек болот.

Андыктан 7-аятта Жахабанын ыймансыздардын айынан кыйналып жаткандарды куткарары жөнүндө айтылган.

«Аларды» деген сөз еврей тилиндеги масорет текстинде да кездешет. Ошондой эле грек тилиндеги «Септуагинтада» 7-аяттагы «биз» деген сөз эки жолу колдонулган. Бул жерде да Кудайдын «кыйналган» жана «таланып-тонолгон» кызматчыларына карата айтылган. Акырында, 7-аятта, Кудай ишенимдүүлөрдүн «ар бирин» «жүзү каралыкты» жайылткан «бул муундан. . .сактаары» жазылган (Заб. 12:7, 8). Еврей Жазмаларынын арамей тилиндеги котормосунда 7-аят мындай деп берилген: «Оо Теңир, сен адил адамдарды коргойсуң, аларды бул ыймансыз муундан түбөлүккө сактайсың. Каякты караба, ыймансыздар адам баласынын уулдарынын канын соргон сүлүк курттардай болуп жайнап жүрөт». Бул — Забур 12:7деги сөздөр Кудайдын «сөздөрүнө» карата айтылбаганынын дагы бир далили.

Ошол себептен бул аят Кудайдын ишенимдүү кызматчыларынын баарына анын өз учурунда иш-аракет кыларына үмүт берет.