Каржы каатчылыгы же кырсык ден соолугубузга ар кандай жолдор менен терс таасир этет.

• Көйгөйлөр стресс кылбай койбойт. Ал эми стресс көпкө созулса, ден соолугубуз начарлап, ооруларга тез чалдыга баштайбыз.

• Кырсык-каргашалар күч алганда доктурлар жетишпей, дары-дармектер тартыш болуп калат.

• Ошондой эле элдин пайдалуу тамак-аш, керектүү дары-дармек сатып алганга акчасы жетпей калышы мүмкүн.

• Олуттуу оорудан же катуу стресстен улам тунук ой жүгүртө албай, ден соолугуңарга тийиштүү түрдө кам көрбөй калышыңар мүмкүн. Натыйжада ден соолугуңар ого бетер начарлап кетиши ыктымал.

• Эгер тийиштүү түрдө кам көрбөсөңөр, ден соолугуңар начарлап, атүгүл өмүрүңөргө коркунуч туулушу мүмкүн.

• Ден соолугуңар чың болсо, кыйын кезеңде туура чечим чыгаруу оңоюраак болот.

• Колуңарда бар-жогуна карабай ден соолугуңарга жакшы кам көрө аласыңар.

Акылдуу адам болушу мүмкүн болгон кыйынчылыктарды аңдай билип, алардын алдын алыш үчүн колунан келгендин баарын кылат. Бул ден соолукка да тиешелүү. Тулку-боюңарды, үй-жайыңарды таза кармасаңар, оору жуктуруп алуу ыктымалдуулугун азайта аласыңар. Дарыланганга караганда алдын алган жакшы.

«Дене боюбузду, үйүбүздү таза сактоо доктурга, дары-дармекке кеткен чыгымдарды бир топ азайтат» (Андреас) *.