Көптөр эптеп күн көрүш үчүн күн сайын кара жанын карч уруп иштешет. Өкүнүчтүүсү, дүйнөдө болуп жаткан окуялардан улам жан багуу барган сайын кыйын болуп баратат. Эмне үчүн?

• Адатта, кырсыктан же башка кыйынчылыктан улам тамак-аштын, турак-жайдын баасы асмандын башы болуп кетет.

• Каржы каатчылыгы жумушсуздуктун көбөйүшүнө же маянанын азайышына алып келиши ыктымал.

• Табигый кырсыктан улам көптөр ишканасынан, үйүнөн же мүлкүнөн кол жууп калышы этимал. Мунун кесепетинде жакырчылык күч алат.

• Акчаңарды акылдуулук менен колдонсоңор, каржы каатчылыгы желкеден басканда көп кыйналбайсыңар.

• Топтогон акчабыз же байлыгыбыз болсо эле, ал ошо бойдон тура берет дегенди билдирбейт. Алар бир паста эле баалуулугун жоготуп коюшу мүмкүн.

• Баары эле акча менен өлчөнбөй турганын унутпагыла. Мисалы, бакытты, үй-бүлөдөгү ынтымакты акчага сатып ала албайбыз.

Ыйык Китепте мындай делет: «Ичкенге тамагыбыз, кийгенге кийимибиз жана баш калкалаар жайыбыз болсо, ошого ыраазы бололу» (1 Тиметей 6:8).

Ыраазы боло билүү өз ичине каалоолорубузду ооздуктоону, күнүмдүк муктаждыктарыбыз канааттандырылып жатканына каниет кылууну камтыйт. Бул, өзгөчө, тыйын-тыпырыбыз тартыш болгондо маанилүү.

Ыраазы боло билиш үчүн, балким, көп акча коротпой жашаганга үйрөнүшүңөр керек болоттур. Тапканыңарга караганда коротконуңар көп болсо, бул кошумча көйгөйлөрдү жаратат.