Көптөр азап-кайгыга Кудай күнөөлүү деп ойлогондуктан ага ишенбей калышат.

Диний жетекчилердин көпчүлүгү азап тартып жатканыбызга Кудай күнөөлүү деп түз эле же кыйытып айтышат. Маселен, мындай дешет:

• Табигый кырсыктар — Кудайдын жазасы.

• Кудай жакшы адамдарды эрте алып кетет.

• Кудай согушта кайсы бир тарапты колдойт. Ошон үчүн азап-кайгы көп болууда.

Диний жетекчилердин Кудай жөнүндө ушинтип айткандары жалган болушу мүмкүнбү? Кудай алардын айткандарын туура көрөбү?

Кудай азап чегип жатканыбызга күнөөлүү эмес.

Ошондой болсо, бул анын Ыйык Китепте жазылган сапаттарына карама-каршы келип калмак. Мисалы, Ыйык Китепте мындай делет:

«[Кудайдын] жолдорунун баары адилет... Ал адил, чынчыл» (МЫЙЗАМ 32:4).

«Кудай эч качан жамандык кылбайт, Кудурети Күчтүү адилетсиздик кылбайт!» (АЮП 34:10).

«Кудурети Күчтүү акыйкаттыкты бурмалабайт» (АЮП 34:12).

Кудай ал жөнүндө жалган нерселерди окуткан диндерди четке кагат.

Андай диндерге азап чегип жатканыбызга Кудай күнөөлүү деп окуткан, согушту жана зордук-зомбулукту колдогон диндер кирет.

«Пайгамбарлар менин [Кудайдын] атыман жалган пайгамбарлык кылып жүрүшөт. Аларды мен жиберген эмесмин, аларга эч кандай буйрук берген эмесмин, сүйлөгөн да эмесмин. Алардын силерге айткан пайгамбарлыктары — жалган аян,.. жүрөктөрүнүн анткорлугу» (ЖЕРЕМИЯ 14:14).

Иса эки жүздүү диний жетекчилерди айыптаган.

«Мага „Мырзам, Мырзам“ деп кайрылгандардын баары эле асман Падышалыгына кире бербейт, асмандагы Атамдын эркин аткаргандар гана кирет. Ошол күнү көптөр мага: „Мырзам, Мырзам, биз сенин ысмың менен пайгамбарлык кылбадык беле? Сенин ысмың менен жиндерди кууп чыгарбадык беле? Сенин ысмың менен көптөгөн кереметтерди жасабадык беле?“ — деп айтышат. Ошондо аларга: „Мен силерди эч качан таанычу эмесмин! Кеткиле жанымдан, мыйзамсыз иш кылгандар!“ — деп айтам» (МАТАЙ 7:21—23).