Кудай бардык нерсени жараткан. Анын башталышы да болгон эмес, аягы да болбойт (Забур 90:2). Ыйык Китептеги жакшы кабарды Кудай жаздырган (1 Тиметей 1:11). Ал бизге өмүр бергендиктен ага гана сыйынышыбыз керек. (Аян 4:11-аятты окугула.)

Кудайды эч ким көргөн эмес, анткени ал — асманда жашайт. Бул анын табияты жердеги жаратуулардан жогору турарын билдирет (Забур 11:4; Жакан 1:18). Кудайдын колунан бүткөн нерселерден анын касиет-сапаттары айкын көрүнүп турат. Мисалы, түркүн-дүйүм жер-жемиштерден, гүлдөрдөн Кудайдын сүйүүсүн жана акылмандыгын көрө алабыз. Ааламдын сөз менен айтып жеткире алгыс кеңдиги Кудайдын кудуреттүүлүгүнөн кабар берип турат. (Римдиктер 1:20-аятты окугула.)

Ыйык Китептен да Кудайдын сапаттары жөнүндө көбүрөөк билүүгө болот. Алсак, анда Кудайга эмне жагары, эмне жакпай турганы, анын адамдарга кандай мамиле кылары жана ар кандай жагдайда кандай иш-аракет кылары айтылат. (Забур 103:7—10-аяттарды окугула.)

Жараткан Кудайдын наамы көп, бирок бир эле ысымы бар. Ал өзүнүн ысмын ачып берип, бир пайгамбар аркылуу: «Мен Жахабамын. Бул — менин ысмым»,— деп айткан (Ышая 42:8). Анын ысымы ар кайсы тилде ар кандай айтылат. Кыргыз тилинде «Жахаба» деп айтылат. (Забур 83:18-аятты окугула.)

Кудайдын ысымы Ыйык Китептин көптөгөн котормолорунан алынып салынып, «Теңир» же «Кудай» деген наамдарга алмаштырылган. Бирок Ыйык Китептин түп нускасында Кудайдын ысмы 7 000дей жолу кездешкен. Иса пайгамбар адамдарга Кудай жөнүндө айтып жатканда Анын ысмы ким экенин да айткан. (Жакан 17:26-аятты окугула.)

«Кудайдын ысмы барбы?» деген видеону көрүңүз

Жашоодо азап-кайгынын көп болгону Кудайдын бизге кам көрбөй турганын билдиреби? Айрымдар Кудай адамдарды сынаш үчүн азапка салат деп ырасташат, бирок чынында андай эмес. (Жакып 1:13-аятты окугула.)

Кудай адамдарга өз алдынча чечим чыгаруу укугун берип, аларды урматтаарын көрсөткөн. Ага кызмат кылар-кылбасыбызды өзүбүз чечүүгө мүмкүнчүлүк бергенине Кудайга ыраазы эмеспизби? (Жашыя 24:15). Көптөр чечим чыгаруу укугун кыянат пайдаланып, башкаларга жамандык кылгандыктан, азап-кайгы көп болууда. Жер жүзүндө болуп жаткан адилетсиздик Кудайдын жүрөгүн оорутпай койбойт. (Башталыш 6:5, 6-аяттарды окугула.)

Жахаба Кудай бизге кам көрөт. Ал бактылуу болуп жашашыбызды каалайт. Жакында ал азап-кайгыны жана ага себепкер болгондорду жок кылат. Жахаба Кудайдын азап-кайгыга убактылуу жол берип жатканына орчундуу себептер бар. Ушул китепченин 8-бөлүмүндө буга кененирээк токтолобуз. (2 Петир 2:9; 3:7, 13-аяттарды окугула.)

Жахаба Кудай өзү менен ынак мамиледе болушубузду каалайт. Андыктан бизди ага тиленип, аны менен сүйлөшкөнгө чакырат. Ал жеке ар бирибизге көңүл бурат (Забур 65:2; 145:18). Жахаба — кечиримдүү Кудай. Кээде ката кетирип алсак да, ал ага жаккыдай иш кылгыбыз келерин көрүп турат. Андыктан күнөөлүү пенде болсок да, аны менен ынак мамиледе боло алабыз. (Забур 103:12—14; Жакып 4:8-аяттарды окугула.)

Жахаба бизге өмүр бергендиктен, баарынан мурда аны жакшы көрүшүбүз керек (Марк 12:30). Кудай жөнүндө изилдеп, анын осуяттарын аткарсак, аны менен ынак мамиледе болобуз. (1 Тиметей 2:4; 1 Жакан 5:3-аяттарды окугула.)