1989-ЖЫЛЫ күйөөм экөөбүз кошунабыздыкына келген Жахабанын Күбөлөрүнө жолугуп калдык. Кошунабыз менен изилдеген Гиви Барнадзе бир туугандын өзүнүн Ыйык Китеби жок экен, анткени ошол убакта грузин тилиндеги Ыйык Китеп аз эле болчу.

Уккандарыбыз бизге аябай жакты. Ошон үчүн Ыйык Китепти окуп көргүбүз келди. Күйөөм агасына жолукканда ага Ыйык Китеп издеп жүргөнүн айтыптыр. Анан күтпөгөн жерден кайнагам грузин тилинде чыккан Ыйык Китептин кайра каралган басылышын жакында эле сатып алганын айтып, ага белек кылам дептир.

Бадри үйгө келери менен Ыйык Китепти үстөлгө койду да, каш карайганча окуду. Эртеси эртең менен туруп алып кайра окуп кирди. Жумуштан келсем, дагы  эле окуп отуруптур. Ал баш көтөрбөй окуду. Мен ага: «Окуп бүтүш үчүн бир нече күн өргүү албайсыңбы»,— дедим. Көп өтпөй ал Ыйык Китепти толугу менен окуп бүтүп салды.

Кийинчерээк Гиви Барнадзе бир тууган менен «Түбөлүк өмүргө алпаруучу чындык» деген китепти изилдедик. Ошондо Ыйык Китеп алганыбызга аябай сүйүнгөнбүз. Себеби бизде «Чындык» деген китеп жок болсо, Гивинин Ыйык Китеби жок болчу. Бир жылдай убакыттан кийин Бадри экөөбүз чөмүлдүк.