Украинадагы согуш жана климаттын өзгөрүшү азык-түлүктүн тартыштыгына себепкер болуп жатат. Бул көйгөй дүйнө жүзүн кучагына алды. Айрыкча, өнүгүп келе жаткан өлкөлөргө таасирин тийгизип жатат. Анткени андай өлкөлөрдө көптөр тамак-ашка жетпей кыйналышат.

•   «Азык-түлүктүн өндүрүлүшүнө жана жеткиликтүү болушуна согуш-жаңжалдар, климаттын өзгөрүшү, энергиянын кымбатташы жана башка себептер бөгөт коюуда» (Антониу Гутерриш, БУУнун башкы катчысы, 17-июль, 2023).

•   «Адистер Орусиянын данды экспорттоо боюнча келишимден баш тартканы дүйнө жүзү боюнча азык-түлүк кризисинин күч алышына себепкер болорун айтып жатышат. Ошондой эле бул жакыр өлкөлөрдө, өзгөчө, Түндүк Африкада жана Ортоңку Чыгышта, азык-түлүктүн укмуштуудай кымбатташына алып барышы мүмкүн» (Atalayar.com, 23-июль, 2023).

 Азык-түлүктүн кризиси жана келечек жөнүндө Ыйык Китепте эмне деп айтыларына токтололу.

•   Иса Машаяк: «Бир эл бир элге, бир падышалык бир падышалыкка каршы көтөрүлөт, жер-жерлерде ачарчылык... болот»,— деп пайгамбарлык кылган (Матай 24:7).

•   Ыйык Китептеги Аян китебинде каймана төрт чабандес жөнүндө айтылат. Ошол төрт чабандестин бири согушту билдирет. Анын артынан ачарчылыкты билдирген дагы бир чабандес чаап чыкмак. Ошол кезде тамак-аш тартыш болуп, азык-түлүктүн баасы асмандын башы болмок. Ыйык Китептин «Азыркы англис котормосунда» мындай делет: «Мен карап, кара атты көрдүм. Үстүндө отургандын колунда тараза бар экен. Ошондо мен үндүн: „Бир өлчөм буудайдын баасы бир күндүк эмгекке тете болот. Үч өлчөм арпанын да баасы бир күндүк эмгекке тете болот“,— дегенин уктум» (Аян 6:5, 6).

 Ачарчылык жөнүндөгү бул пайгамбарлыктар Ыйык Китепте «акыркы күндөр» деп аталган азыркы учурда аткарылып жатат (2 Тиметей 3:1). «Акыркы күндөр» жана Аян китебиндеги чаап чыккан төрт чабандес жөнүндө көбүрөөк билгиңер келсе, «Дүйнө 1914-жылдан бери кыйла өзгөрдү» деген видеону көргүлө жана «Төрт чабандес эмнени билдирет?» деген макаланы окуп көрсөңөр болот.

•   Ыйык Китепте даанышман кеңештер жазылган. Алар азык-түлүктүн кымбатташы же тамак-аштын тартыштыгы сыяктуу кыйынчылыктарды көтөрүп кеткенге жардам берет. Айрым кеңештерди «Акча тартыш болгондо, кантип күн көрсө болот?» деген макаладан окуй аласыңар.

•   Ыйык Китепте жаркын келечекке канат байлаткан жакшы сөздөр да жазылган. Анда келечекте «дан жер бетинде мол болуп», ар бир киши тоё жей турганы убадаланган (Забур 72:16). Ушул үмүт жана ага эмне үчүн ишенсек болору жөнүндө көбүрөөк билиш үчүн «Жаркын келечекке негиз берген үмүт» деген макаланы окуп көргүлө.