Башталыш 39:1—23
39 Ысмайылдын тукумдары+ Жусупту Мисирге алып барышты+. Аны алардын колунан жан сакчылардын башчысы, фараондун ак сарайында кызмат кылган мисирлик Потипар сатып алды+.
2 Бирок Жахаба Жусуп менен болду. Ошондуктан ал бардык иштеринде ийгиликке жетип+, мисирлик мырзасынын үйүндө ар кандай жоопкерчиликтерге ээ болду.
3 Мырзасы Жахабанын Жусуп менен экенин, Жахабанын анын бардык иштерине батасын берип жатканын көрдү.
4 Ошентип, Жусуп мырзасына жагып, ага кызмат кылып калды. Мырзасы аны өзүнүн үйүнө башкаруучу кылып дайындап+, өзүнө таандык нерсенин баарын ага тапшырды.
5 Ошондон тартып Жахаба Жусуп үчүн мисирлик кишинин үйүнө батасын бере баштады. Жахаба анын үйүндөгү, талаасындагы бардык нерсесине батасын бере баштады+.
6 Потипар өзүнө таандык болгондун баарын Жусупка тапшырып койду+. Ошондуктан жеген тамагынан башка эч нерседен кам саначу эмес. Арадан убакыт өтүп, Жусуп келишимдүү, сулуу жигит болду.
7 Ошондо мырзасынын аялынын ага көңүлү түшүп+: «Мени менен жат»,— дей баштады+.
8 Бирок Жусуп макул болбой+: «Мен барда, мырзам үйүндөгү эч нерсесинен кам санабайт, ал баарын мага тапшырган+.
9 Бул үйдө менден жогору турган эч ким жок. Мырзам мага сизден башка эч нерсеге тыюу салган эмес, анткени сиз анын аялысыз+. Анан кантип мен ушундай жаман ишке барып, Кудайга каршы күнөө кылайын?» — деди+.
10 Аял Жусупка күн сайын ошентип жабыша берсе да, ал аны менен жатканга, аны менен бирге болгонго макул болгон жок+.
11 Бир күнү ал, адаттагысындай эле, иштери менен үйгө кирди. Үйдө кызматчылардын эч кимиси жок болчу+.
12 Ошондо аял Жусупту кийиминен тартып+: «Мени менен жат»,— деди+. Бирок Жусуп үйдөн чыга качты, кийими болсо аялдын колунда калып калды+.
13 Жусуп кийимин калтырган бойдон качып чыкканда, аял
14 кызматчыларын чакырды да, аларга: «Карагылачы, күйөөм алып келген бул еврей бизди шылдың кылайын дептир. Ал мени менен жатканы келиптир, бирок мен катуу кыйкырып жибердим+.
15 Менин кыйкырганымды угуп, ал кийимин калтырган бойдон үйдөн качып чыкты»,— деди.
16 Анан Жусуптун кийимин, анын мырзасы үйгө келгенге чейин, өзүнө калтырып койду+.
17 Андан кийин күйөөсүнө: «Сен алып келген еврей кулуң мени шылдың кылайын деп келиптир.
18 Бирок мен кыйкырып жиберсем, ал кийимин калтырган бойдон качып кетти»,— деди+.
19 Жусуптун мырзасы аялынын сөздөрүн, анын: «Кулуң мени ушинтти»,— дегенин укканда, каары кайнап чыкты+.
20 Ошондуктан ал Жусупту падыша каматкан кишилер жаткан түрмөгө каматып койду. Ошентип, Жусуп түрмөгө түшүп калды+.
21 Бирок Жахаба Жусуп менен болуп, ага мээримдүүлүк көрсөтө берди жана түрмө башчысынын көз алдында ырайым таптырды+.
22 Түрмө башчысы камакта жаткандардын баарын Жусуптун колуна тапшырды. Алар, Жусуп эмне десе, ошонун баарын аткарып жатышты+.
23 Жахаба Жусуп менен болгондуктан, түрмө башчысы ага тапшырган нерселеринен кам саначу эмес. Себеби Жусуп эмне иш кылбасын, Жахаба ага батасын берип жатты+.
