Башталыш 45:1—28
45 Ушул сөздөрдү укканда Жусуп кызматчыларынын алдында андан ары өзүн кармай албай калгандыктан+: «Баарыңар чыгып кеткиле!» — деп кыйкырды. Жанында бир туугандары эле калганда, ал өзүнүн ким экенин айтты+.
2 Ал абдан катуу ыйлагандыктан+, аны мисирликтер да укту. Бул жөнүндө фараонго да кабар жетти.
3 Анан Жусуп бир туугандарына: «Мен Жусупмун, атамдын көзү дагы эле тирүүбү?» — деди. Бирок алар айран-таң калгандыктан эч нерсе дей алышкан жок+.
4 Жусуп аларга: «Мага жакын келгилечи»,— деди. Алар жакын барышты.
Ошондо ал мындай деди: «Мен Жусупмун, силер Мисирге сатып жиберген бир тууганыңармын+.
5 Бирок эми кайгырбагыла+, мени сатып жибергениңер үчүн өзүңөрдү жемелебегиле. Анткени Кудай өмүрүңөрдү сактап калыш үчүн мени бул жакка силерден мурун жиберген+.
6 Жер жүзүндө ачарчылык болуп жатканына эки жыл болуп калды+, дагы беш жыл бою жер айдалбайт, оруп-жыюу болбойт+.
7 Ошондуктан Кудай силерге улуу куткарылуу жиберип, үй-бүлөлөрүңөрдү*+ аман алып калыш үчүн мени бул жакка силерден мурун жиберген.
8 Ооба, бул жакка мени силер эмес+, чыныгы Кудай жиберген. Ал мени фараондун атасы+, анын бүт үйүнүн мырзасы, бүткүл Мисир жеринин башкаруучусу кылып койду.
9 Тезирээк атама баргыла да, мындай дегиле: „Уулуңуз Жусуп мындай дейт: “Кудай мени бүт Мисир жерине мырза кылып койду+. Мага тезирээк келиңиз.
10 Сиз Гошен жеринде жашап+, уулдарыңыз, неберелериңиз, бардык мал-мүлкүңүз менен менин жанымда болосуз.
11 Дагы беш жыл ачарчылык болот. Ошондуктан өзүңүз да, үйдөгүлөрүңүз да жакырданып кетип, колуңузда болгондун баары түгөнүп калбашы үчүн, мен сизди тамак-аш менен камсыз кылып турам”“+.
12 Силерге сүйлөп жаткан чын эле мен экенимди иним Бенжемин да, силер да көрүп турасыңар+.
13 Атама менин Мисирдеги атак-даңкым менен көргөн нерселериңердин баарын айтып бергиле. Тезирээк баргыла да, аны бул жакка алып келгиле».
14 Анан иниси Бенжеминди мойнунан кучактап, ыйлап кирди. Бенжемин да аны мойнунан кучактап ыйлады+.
15 Жусуп бүт бир туугандарын өпкүлөп, аларды кучактап ыйлап жатты+. Андан кийин бир туугандары аны менен сүйлөшө башташты.
16 «Жусуптун бир туугандары келиптир»,— деген кабар фараондун үйүнө жетти. Муну укканда фараон да, анын кызматчылары да кубанышты+.
17 Анан фараон Жусупка мындай деди: «Бир туугандарыңа: „Эшектериңерге жүк артып, Канаан жерине баргыла да+,
18 атаңарды, үй-бүлөңөрдү алып, мага келгиле. Мен силерге Мисир жериндеги эң жакшы нерселерди берем, бул жердин эң жакшы түшүмүн жейсиңер“+,— деп айт.
19 Аларга мындай буйрук бер+: „Мындай кылгыла: балдарыңар менен аялдарыңарды алып келиш үчүн Мисир жеринен арабаларды алгыла+. Анан алардын бирине атаңарды отургузуп, бул жакка келгиле+.
20 Калган мүлкүңөр+ үчүн кейибегиле, анткени Мисир жериндеги эң жакшы нерселер силердики болот“»+.
21 Ысрайыл уулдары ошондой кылышты. Жусуп аларга, фараон буйругандай, арабаларды берди, жолго деп азык да берди+.
22 Ошондой эле ар бирине бирден жаңы кийим+, Бенжеминге болсо 300 күмүш тыйын жана беш жаңы кийим берди+.
23 Атасына болсо Мисир жериндеги жакшы нерселер жүктөлгөн он эшек жана жолуна деп камдаган дан, нан, тамак-аш жүктөлгөн он ургаачы эшек берип жиберди.
24 Ошентип, ал бир туугандарын жөнөттү. Аларды узатып жатып: «Жолдон урушпагыла»,— деди+.
25 Алар Мисирден чыгып, Канаан жерине, атасы Жакыпка келишти да:
26 «Жусуп тирүү экен, ал бүт Мисир жерин башкарып жатыптыр!» — дешти+. Жакып дал болуп туруп калды, анткени алардын айткандарына ишенген жок+.
27 Балдары Жусуптун айткан сөздөрүнүн баарын айтып беришкенден кийин жана Жусуптун аны алып кетиш үчүн жиберген арабаларын көргөндөн кийин Жакыптын руху жандана түштү+.
28 Ошондо Ысрайыл: «Эми ишендим! Уулум Жусуп тирүү экен! Көзүм өтө элегинде барып, аны көрүп калайын»,— деди+.
Шилтемелер
^ Же: «калдыгыңарды».
