Жашыя 5:1—15
5 Ысрайыл уулдары өтүшү үчүн, Жахабанын Иордан суусун кургатканын укканда Иордандын батыш тарабында жашаган аморлуктардын+ жана деңиздин жанында жашаган канаандыктардын+ бардык падышаларынын жүрөктөрү түштү+. Ысрайыл уулдарынан корккондуктан алардын кайраты качты+.
2 Ошол учурда Жахаба Жашыяга: «Оттук таштан бычак жасап, Ысрайыл уулдарын кайрадан, экинчи жолу сүннөткө отургуз»,— деди+.
3 Жашыя оттук таштан бычак жасап, Ысрайыл уулдарын Гибат-Харалотто+ сүннөткө отургузду.
4 Жашыянын аларды сүннөткө отургузганынын себеби мындай эле: Мисирден чыккан элдин баары, согушка жарактуу эркектердин баары, Мисирден келатканда чөлдө өлүшкөн+.
5 Ал жактан чыккан элдин баары сүннөткө отургузулган болчу, ал эми Мисирден келатканда чөлдө төрөлгөндөрдүн бири да сүннөткө отургузулган эмес эле.
6 Мисирден чыккан бүт эл, согушка жарактуу эркектердин баары, Жахабанын тилин албаганы үчүн өлүп жок болгонго чейин, Ысрайыл уулдары чөлдө кырк жыл жүрүштү+. Жахаба аларга сүт менен бал аккан жерди+, алардын ата-бабаларына бизге берем деп ант берген+ жерди, көрүшпөй турганын айткан+. Жахаба муну аларга ант берип айткан.
7 Ошондуктан ал жерге алардын ордуна уулдары барды+. Жашыя аларды сүннөткө отургузду, анткени алар жолдон сүннөткө отургузулган эмес болчу.
8 Баары сүннөткө отургузулуп, айыккыча конуштан чыгышкан жок+.
9 Ошондо Жахаба Жашыяга: «Бүгүн мен силерди Мисирдин шылдыңынан арылттым»,— деди+. Ошондуктан ал жер азыркы күнгө чейин Гилгал деп аталат+.
10 Ысрайыл уулдарынын кошууну Гилгалда бир канча убак турду. Ошол убакта алар айдын он төртүнчү күнү кечинде Жерихонун чөлдүү түздүктөрүндө пасах майрамын белгилешти+.
11 Пасах майрамын белгилеген күндүн эртеси, ошол эле күнү, алар ошол жердин түшүмүн: калама+ менен куурулган дан жей башташты.
12 Алар ошол жердин түшүмүнөн жей баштаган күндөн тартып манна пайда болбой калды. Ысрайыл уулдарына манна берилбей калды+. Алар ошол жылы Канаан жеринин түшүмүнөн жей башташты+.
13 Жерихого жакын жерде турганда Жашыя башын көтөрүп караса, маңдайында колунда кылычы бар+ бир киши туруптур+. Жашыя жанына барып: «Сен биз тараптасыңбы же душмандар тараптасыңбы?» — деп сурады.
14 Ал: «Жок, мен бул жакка Жахабанын аскерлеринин төрөсү катары келдим»+,— деп жооп берди. Ошондо Жашыя жерге чейин ийиле таазим кылып+: «Мырзам, кулуңа айтар кандай сөзүң бар?» — деди.
15 Жахабанын аскерлеринин төрөсү ага: «Бутуңдагы сандалыңды чеч, анткени сен турган жер ыйык»,— деди. Жашыя дароо сандалын чечти+.
