Сулаймандын ыры 3:1—11
3 Түнкүсүн төшөктө жатып, жаным сүйгөн жигитимди издедим+. Издедим, бирок таппадым.
2 Турайын, шаар+ аралап, жаным сүйгөн жигитимди көчөлөрдөн, аянттардан+ издейин. Издедим, бирок таппадым.
3 Алдыман шаар кыдырган күзөтчүлөр+ чыкты. Мен алардан: „Жаным сүйгөн жигитимди көрдүңөрбү?“ — деп сурадым.
4 Алардан көп узабай эле жаным сүйгөн жигитимди таптым. Мен аны коё бербей, бек кармадым. Энекемдин үйүнө алып келдим, мени төрөгөндүн төркү бөлмөсүнө киргиздим.
5 Оо, Иерусалим кыздары, өзү ойгонмоюн, сүйүүмдү ойготпойбуз деп+, аны тутандырбайбыз деп, жейрендер менен талаадагы маралдарды+ оозанып ант бергиле»+.
6 «Мирра менен ладандай+, соодагердин түрлүү жыпарзатындай аңкып+, чөл тараптан түтүндөй көтөрүлүп келаткан бул эмне өзү?»
7 «Ал — анын тактысы, Сулаймандын көчмө тактысы. Аны Ысрайыл азаматтарынын алтымыш жоокери жандап жүрөт+.
8 Баары кылыч кармап, согушка машыккан. Түнкү коркунучтан коргош үчүн+ ар бири кылыч курчанган».
9 «Ал — Сулайман падышанын Лебанон*+ жыгачтарынан жасаткан көчмө тактысы.
10 Анын түркүктөрү күмүштөн, таканчыктары алтындан, отургучу кызгылт-көк жүндөн; ичин болсо Иерусалим кыздары сүйүү менен кооздогон».
11 «Чыккыла, Сион кыздары, Сулайман падышаны көргүлө. Үйлөнөр күнү, жүрөгү толкуп турган күнү+ ага энеси+ гүлчамбар+ өрүп берди».
Шилтемелер
^ Ливан.
