Амос 7:1—17
7 Эгедер Теңир Жахаба мага аян аркылуу муну көрсөттү: кеч себилген үрөн* өнүп чыкканда, Кудай жер жайнаган чегиртке жиберди. Ал падышанын чөбү чабылгандан кийинки маал болчу.
2 Чегиртке өсүмдүктөрдүн баарын жеп түгөткөндө, мен: «Оо, Эгедер Теңир Жахаба, элиңди кечире көр.+ Жакыптын урпактары кантип аман калат? Алар алсыз эл эмеспи!»+ — дедим.
3 Ошондо Жахаба чечимин өзгөрттү*.+ Жахаба: «Сен көргөн нерселер болбойт»,— деди.
4 Анан Эгедер Теңир Жахаба мага аян аркылуу муну көрсөттү: Эгедер Теңир Жахаба бул жерди от менен жазалай турганын жарыялады. Ал от түпсүз терең сууларды жалмап, жердин бир бөлүгүн куйкалап кетти.
5 Ошондо мен: «Оо, Эгедер Теңир Жахаба, токтото көр.+ Жакыптын урпактары кантип аман калат? Алар алсыз эл эмеспи!»+ — дедим.
6 Ошондо Жахаба чечимин өзгөрттү.+ Эгедер Теңир Жахаба: «Сен көргөн бул нерселер да болбойт»,— деди.
7 Андан соң ал мага аян аркылуу муну көрсөттү: башында жипке асма салмоор* менен текшерилип, түз тургузулган дубалдын үстүндө Жахаба туруптур, колунда жипке асма салмоор бар экен.
8 Жахаба менден: «Амос, эмнени көрүп турасың?» — деп сурады. «Жипке асма салмоорду»,— деп жооп бердим. Ошондо Жахаба: «Мен ысрайыл элимди жипке асма салмоор менен текшерип жатам. Аны экинчи кечирбейм.+
9 Ыскактын урпактарынын+ жалган кудайларга сыйынган жайлары ээн калат, ысрайыл элинин ыйык жайлары талкаланат.+ Мен кылыч көтөрүп, Жеробамдын тукумдарына каршы чыгам»,+— деди.
10 Бейтелдин дин кызматчысы+ Амазия Ысрайылдын падышасы Жеробамга:+ «Амос Ысрайылда сага каршы козголоң уюштуруп жатат.+ Анын сөздөрүнө эл чыдап тура албайт.+
11 Анткени Амос: „Жеробам кылычтан өлөт. Ысрайыл эли болсо өз жеринен сөзсүз туткундалып кетет“,+— деп жүрөт»,— деп айттырып жиберди.
12 Анан Амазия Амоско: «Эй, көрөгөч, бар, Жүйүт жерине качып кет. Наныңды ошол жактан таап же да, ошол жакта пайгамбарлык кыл.+
13 Бейтелде экинчи пайгамбарлык кылба.+ Себеби бул жерде падыша келип сыйына турган жай,+ бүт эл чогула турган ибадаткана* бар»,— деди.
14 Амос болсо Амазияга мындай деди: «Мен пайгамбар да, пайгамбардын уулу да эмес болчумун. Мал багып,+ анжир өстүрчүмүн*.
15 Жахаба мени мал багып жүргөн жеримен чакырды. Анан Жахаба мага: „Бар, ысрайыл элиме пайгамбарлык кыл“,— деди.+
16 Эми Жахабанын сөзүнө кулак сал: „Сен мага: “Ысрайыл элине каршы пайгамбарлык кылба,+ Ыскактын урпактарына каршы сот өкүмүн жарыялаба”,+— деп жатасың.
17 Ошон үчүн Жахаба сага: “Аялың шаарда сойкулук кылат. Уул-кыздарың кылычтан өлөт. Жериңди ченегич жип менен ченеп, бөлүп алышат. Өзүң бөтөн жерде* өлөсүң. Ысрайыл эли өз жеринен сөзсүз туткундалып кетет”,— деп айтты“».+
Шилтемелер
^ Б. а. январь—февраль айларында себилген үрөн.
^ Же: «өкүндү; кайгырды».
^ Дубалдын канчалык түз экенин текшериш үчүн колдонулат.
^ Сөзмө-сөз: «падышалыктын үйү».
^ Же: «анжирдин мөмөсүн тилчүмүн».
^ Же: «арам жерде».
