Аюп 28:1—28
28 Күмүш казып ала турган жер бар,Тазалана турган алтынды казып ала турган жер бар;+
2 Темир жерден алынат,Жез таштан эритилет.+
3 Адам караңгы жерге жарык алып кирет,Баалуу кендерди алыш үчүн көзгө сайса көрүнгүс жерге түшөт.
4 Эл жашаган жерден алыс аймактардан,Кишинин буту баспаган, унутулган жерлерден кен казат,Айрымдар аркан менен төмөн түшүп, абада илинип турушат.
5 Жер үстүнө азык өсүп чыгат,Анын асты болсо омкорулуп, от жалмагандай болуп калган*.
6 Ал жердин таштарынын арасында сапфир ташы,Топурагынын арасында алтын бар.
7 Ал жакка бара турган жолду бир да жырткыч куш билбейт,Аны кара айры куйрук көргөн эмес.
8 Аны ири жырткыч жаныбарлар да тепсеген эмес,Ал жерде жаш арстан жортуп жүргөн эмес.
9 Адам оттук таштуу асканы талкалайт,Тоолорду түп-тамыры менен омкорот.
10 Аскаларга суу өткөөлдөрүн жасайт,+Анын көзү баалуу нерселердин баарын көрүп турат.
11 Ал дарыялардын башаттарын тосуп коёт,Катылган кенчти жарыкка чыгарат.
12 Ал эми акылмандык кайдан табылат?+
Түшүнүктүүлүктүн булагы кайда?+
13 Анын наркын эч бир пенде билбейт,+Ал жер бетинен табылбайт.
14 Терең суулар: „Бизде эмес!“ — деп айтат,Деңиз да: „Менде эмес!“ — дейт.+
15 Аны таза алтынга сатып ала албайсың,Ордуна күмүш өлчөп бере албайсың.+
16 Опир+ алтынына да, сейрек кездешчү оникс ташына да,Сапфир ташына да сатып ала албайсың.
17 Алтын менен айнек ага тең келбейт,Ал таза алтындан жасалган идишке алмаштырылбайт.+
18 Маржан* менен хрусталды ага салыштырып да болбойт,+Анткени акылмандык* бир баштык толо берметтен да кымбат.
19 Ага Куштун* топаз+ ташы тең келбейт,Аны атүгүл таза алтынга да сатып ала албайсың.
20 Анда акылмандыкты кайдан алса болот?
Түшүнүктүүлүктүн булагы кайда?+
21 Ал бүт тирүү жандардын көзүнөн жашырылган,+Асмандагы канаттуулардан катылган.
22 Сөөктөр чирий турган жай менен өлүм:
„Ал жөнүндө кулагыбыз гана чалган“,— дешет.
23 Аны кантип табышты Кудай гана билет.
Анын мекени ага гана маалым.+
24 Анткени Кудай жерди учу-кыйырына чейин карап турат,Асман астындагынын бардыгын көрүп турат.+
25 Ал шамалга күч бергенде,+Сууларды өлчөгөндө, бөлүштүргөндө,+
26 Жамгыр үчүн мыйзам бекиткенде,+Чагылгандуу кара булутка жол салганда,+
27 Өз иштеринен акылмандыкты көрүп, анын эмне экенин түшүндүргөн,Аны бекем орнотуп, сынап көргөн.
28 Анан адамга:
„Акылмандык деген — бул Жахабадан коркуу,+Түшүнүктүүлүк деген — бул жамандыктан алыс болуу“,— деген».+
Шилтемелер
^ Сыягы, кен казып алуу жөнүндө сөз жүрүп жатат.
^ Сөзмө-сөз: «бир баштык акылмандык».
^ Эфиопия.
