Аюп 41:1—34
-
Кудай укмуштуудай крокодилди сөз кылат (1—34)
41 Сен крокодилди*+ кайырмак менен кармай аласыңбы,Же тилинен жип менен байлай аласыңбы?
2 Таноолорунан жип өткөрө аласыңбы,Же илмек менен жаагын теше аласыңбы?
3 Ошондо ал сага жалынып-жалбарабы,Же жумшак сүйлөйбү?
4 Өмүр бою кулуң болушу үчүн,Сени менен келишим түзөбү?
5 Чымчык менен ойногондой, аны менен ойной аласыңбы?
Же эрмектеш үчүн кыздарыңа байлап бере аласыңбы?
6 Соодагерлер аны бир нерсеге айырбаштайбы?
Өз ара бөлүп алышабы?
7 Анын терисин дегээ*+ менен,Башын балыкчынын найзасы менен сая аласыңбы?
8 Колуңду үстүнө коюп көрчү,Ал күрөштү эч качан унутпайсың, экинчи антпейсиң!
9 Аны багындырам деген үмүт таш кабат.
Аны көргөндө эле эсиңден танасың*.
10 Анын тынчын алганга эч ким даай албайт.
Анда мага ким туруштук бере алат?+
11 Мен кайрып бергидей, ким мага биринчи болуп бирдеме берген?+
Асман астындагынын баары меники.+
12 Крокодилдин дене мүчөлөрүн,Күчүн, тулку боюнун керемет түзүлүшүн айтпай коё албайм.
13 Анын кийимин үстүнөн ким сыйрый алат?
Ачылган оозуна ким жакындай алат?
14 Аны оозун ачканга ким мажбурлай алат?
Тизилген тиштери үрөй учурат.
15 Анын жону кабырчыктар менен капталган*,Алар мөөр менен басылгандай бекем бириктирилген.
16 Бири-бирине ушунчалык кыналышкандыктан,Арасынан аба да өтпөйт.
17 Алар чапталышып турат,Бири-бирине бекем жармашкандыктан эч ажырабайт.
18 Ал бышкырганда, жарык чагылышат,Көздөрү таңдын нурундай.
19 Оозунан чагылган жаркылдайт,Оттун учкуну чачырайт.
20 Камыш жагылган мештен түтүн чыккандай,Таноолорунан түтүн чыгат.
21 Деми чокту алоолонтот,Оозунан жалын чыгат.
22 Мойнунда зор күч жатат,Алдынан чыккандын баарынын үрөйү учат.
23 Терисинин быржык-быржык жерлери бири-бирине кыналган;Үстүнө темирди эритип куюп койгондой, алар эч козголбойт.
24 Жүрөгү таштай катуу,Жаргылчактын астыңкы ташындай катуу.
25 Ал ордунан турганда, атүгүл күчтүүлөрдүн да жүрөгү оозуна тыгылат,Туйлаганда, баары коркконунан далбастап калат.
26 Ага кылычтын да,Найзанын да, дегээ менен жебенин да күчү жетпейт.+
27 Ал темирди самандай,Жезди чириген жыгачтай көрөт.
28 Аны жебе качыра албайт,Салмоор таштары ал үчүн кургап калган чөптөй.
29 Ал чокморду бир тал самандай көрөт,Өзүн көздөй ыргытылган, ышкырып учкан дегээге күлөт.
30 Курсагынын асты карапанын учтуу сыныктарындай,Баткактан эгин бастыргыч сүйрөп өткөндөй өтөт.+
31 Суу тереңдиктерин казандай кайнатат,Деңизди* сыйпанма май кайнаткан казандай боркулдатат.
32 Артынан көбүктөнгөн из калтырат,Суу туңгуюктары ак чач баскандай көрүнөт.
33 Жер бетинде ага окшогон бир да жандык жок,Ал жалтанбас болуп жаратылган.
34 Кекирейген жандыктардын баарына тайманбай карайт,Ал — бардык күчтүү жапайы жаныбарлардын падышасы».
Шилтемелер
^ Сабы узун, балыкты сайып кармай турган учтуу курал.
^ Же: «кулап каласың».
^ Же балким: «Анын сыймыгы — кат-кат кабырчыктары».
^ Бул жерде колдонулган еврей тилиндеги сөз чоң дарыяны да билдириши мүмкүн.
