Башталыш 12:1—20
12 Жахаба Ыбрамга: «Жериңди, туугандарыңды, атаңдын үйүн калтырып, мен көрсөтө турган жерге бар.+
2 Сенден улуу эл чыгарам, сага батамды берип, атыңды чыгарам; башкалар сен аркылуу бата алат.+
3 Сага батасын бергендерге батамды берем, сени каргагандарды каргайм,+ сен аркылуу жер жүзүндөгү бардык элдер бата алышат*»,— деди.+
4 Ыбрам Жахабанын айтканы боюнча жолго чыкты. Аны менен кошо Лот да чыкты. Харандан чыкканда Ыбрам 75 жашта эле.+
5 Ал аялы Сараны,+ бир тууганынын уулу Лотту,+ чогулткан мүлкүнүн баарын+ жана Харандагы кулдарын алып, Канаан жерин көздөй жөнөдү.+ Ошентип, алар Канаанга жетишти.
6 Ыбрам ал жерди аралап, Мореде+ өскөн чоң дарактардын* жанындагы Шекемге+ чейин барды. Ошол убакта ал жерде канаандыктар жашачу.
7 Ошондо Жахаба Ыбрамга көрүнүп: «Бул жерди сенин тукумуңа+ берем»,— деди.+ Ыбрам өзүнө көрүнгөн Жахабага арнап ошол жерге курмандык жайын курду.
8 Кийинчерээк ал Бейтелдин+ чыгыш жагындагы тоолуу аймакка барып, чатыр тигип, жашап калды. Бейтел батыш тарабында, Ай+ чыгыш тарабында эле. Ал ошол жерге Жахабага арнап курмандык жайын куруп,+ Жахабага атынан кайрылып сыйынды.+
9 Анан Ыбрам чатырын жыйнап, улам бир жерге көчүп-конуп, Негепти+ көздөй жылып отурду.
10 Ошол кезде Канаан жеринде ачарчылык болду. Ачарчылык катуу болгондуктан,+ Ыбрам убактылуу жашап туруш үчүн Мисирге* жөнөдү.+
11 Мисирге жакындаганда аялы Сарадан: «Сөзүмө кулак салчы, сага бир нерсе айтайын дедим эле. Сен сулуу аялсың,+
12 ошон үчүн мисирликтер сени көргөндө: „Бул — анын аялы“ — деп, мени өлтүрүп коюшат да, сени алып кетишет.
13 Алар мага тийбеши үчүн, жаным аман калышы үчүн, карындашымын деп койчу»,— деп суранды.+
14 Ыбрам Мисирге барганда, мисирликтер Саранын аябай сулуу экенин көрүштү.
15 Аны Мисир падышасынын* төрөлөрү да көрүп, ага мактап барышты. Ошондуктан падыша Сараны ак сарайына алдырды.
16 Сара үчүн Ыбрамга жакшы мамиле кылып, ага көп бодо мал, кой, эшек, төө, кулдар менен күңдөрдү берди.+
17 Бирок Жахаба Ыбрамдын аялы Сара+ үчүн падыша менен анын үй-бүлөсүн, кызматчыларын катуу ооруларга* чалдыктырды.
18 Ошондо падыша Ыбрамды чакырып: «Бул эмне кылганың? Эмнеге аялың экенин айткан жоксуң?
19 Эмнеге карындашым+ дедиң? Аны аялдыкка алып коё жаздабадымбы. Мына аялың, ал да кет!» — деди.
20 Анан кишилерине Ыбрам менен анын аялын бүт мал-мүлкү, кулдары менен кошо Мисирден чыгарып койгула деп буйрук кылды, алар ошентишти.+
Шилтемелер
^ Еврей тилиндеги бул этиш бата алыш үчүн иш-аракет кылыш керектигин көрсөтүп турат.
^ Же балким: «Моренин чоң дарактарынын».
^ Египетке.
^ Сөзмө-сөз: «фараондун». Мисир падышасынын наамы.
^ Же: «каргашаларга».
