Башталыш 21:1—34
21 Жахаба, өзү айткандай, Саарага батасын берди. Жахаба ага берген убадасын аткарды.+
2 Ошентип, Сааранын боюна бүтүп,+ улгайып калган Ыбрайымга Кудай убада кылган убакта уул төрөп берди.+
3 Ыбрайым Саара төрөп берген уулунун атын Ыскак+ койду.
4 Ал уулун, төрөлгөнүнө 8 күн болгондо, Кудай буйрук кылгандай, сүннөткө отургузду.+
5 Уулу Ыскак төрөлгөндө, Ыбрайым 100 жашта эле.
6 Ошондо Саара: «Кудай мени кубанычка бөлөдү. Эми муну уккандардын баары мени менен кошо кубанат*»,— деди.
7 Анан: «„Саара бала эмизет“,— деп Ыбрайымга ким айтат эле? Бирок мен ага карыган кезинде уул төрөп бердим»,— деди.
8 Ыскак чоңоюп, эмчектен чыкты. Ошол күнү Ыбрайым чоң той берди.
9 Саара мисирлик Ажардын+ Ыбрайымга төрөп берген уулу Ыскакты шылдыңдап жатканын байкады.+
10 Ошон үчүн Ыбрайымга: «Бул күңдү уулу менен кошо кууп жибер, күңдүн уулу менин уулум Ыскак менен бирге мурасчы болбойт!» — деди.+
11 Уулу жөнүндө Сааранын ушинтип айтканына Ыбрайым аябай жаман болду.+
12 Ошондо Кудай ага: «Сааранын балаң менен күңүң жөнүндө айткан сөздөрүнө капаланба. Ал айткандай кыл, анткени сенин урпактарың Ыскактан тарайт.+
13 Бирок күңүңдүн+ уулунан да эл жаратам,+ анткени ал да сенин тукумуң»,— деди.
14 Ыбрайым эртең менен эрте турду да, суу куюлган чанач, тамак-аш алып, Ажардын ийнине артып, баласы экөөнү кетирип жиберди.+ Ажар кетип баратып Беир-Шебадагы+ ээн талаада адашып калды.
15 Чаначтагы суу түгөнгөндө, ал баласын бир бадалдын түбүнө калтырып:
16 «Баламдын өлгөнүн кантип карап турам?!» — деп, жебе жеткидей алысыраак жерге барып отурду да, боздоп ыйлай баштады.
17 Бала да ыйлап жатты. Кудай анын үнүн укту.+ Ошондо асмандан Кудайдын периштеси Ажарга:+ «Ажар, эмнеге ыйлап жатасың? Коркпо, Кудай балаңдын үнүн укту.
18 Туруп, баланы ордунан тургуз да, бекем кармап ал. Мен андан улуу эл чыгарам»,+— деди.
19 Анан Кудай өзү жардам берип, Ажар суусу бар кудукту көрдү. Ал чаначка суу толтуруп келип, балага ичирди.
20 Кудай баланы колдоп,+ ал чоңоюп эр жетти. Ээн талаада жашап, жаачы болду.
21 Ал Парандагы+ ээн талаада жашады. Энеси ага Мисир жеринен аял алып берди.
22 Ошол убакта Абымелек Пихол деген аскер башчысы менен келип, Ыбрайымга: «Эмне иш кылба, Кудай дайыма сени колдой турганын билем.+
23 Ошондуктан мага да, уулдарыма да, андан кийинки урпактарыма да арамдык кылбай турганыңды, сага кандай жакшы мамиле кылсам*, сен да мага жана өзүң келгин катары жашап жаткан бул жердин тургундарына ошондой жакшы мамиле кылам деп ант бер»,— деди.+
24 Ал: «Ант берем»,— деди.
25 Ыбрайым Абымелекке анын кулдары тартып алган кудук жөнүндө айтып,+ нааразы болгондо,
26 ал: «Мен муну билбептирмин. Бул жөнүндө ушуга чейин эч нерсе уккан эмесмин, өзүң да эч нерсе айткан эмессиң. Аны ким тартып алганын билбейм»,— деди.
27 Ошондо Ыбрайым ага кой, бодо мал берип, экөө келишим түзүштү.
28 Ыбрайым малдын арасынан 7 ургаачы козуну өзүнчө бөлүп койгондо,
29 Абымелек: «Бул 7 ургаачы козуну эмнеге өзүнчө бөлүп койдуң?» — деп сурады.
30 Ыбрайым: «Бул кудукту мен казганыма далил катары ушул 7 козуну ал»,— деди.
31 Ал ошол жерди Беир-Шеба*+ деп атады, анткени ошол жерде экөө тең ант беришти.
32 Алар Беир-Шебада келишим түзүшкөндөн кийин,+ Абымелек аскер башчысы Пихол менен Пелишти+ жерине кайтты.
33 Андан кийин Ыбрайым Беир-Шебага балгын* дарагын отургузуп, ошол жерде түбөлүктүү Кудай+ Жахабага ысмынан кайрылып,+ аны даңктады.
34 Ыбрайым пелиштиликтердин жеринде келгин болуп көп убакыт жашады.+
Шилтемелер
^ Бул жердеги «кубаныч», «кубануу» деп которулган еврей тилиндеги сөздөр сөзмө-сөз «күлкү», «күлүү» дегенди билдирет.
^ Же: «туруктуу сүйүү көрсөтсөм».
^ Сыягы, «ант кудугу» же «жетинин кудугу» дегенди билдирет.
^ Бул дарак абдан кургак жерлерде да өсөт.
