Башталыш 37:1—36
37 Жакып атасы келгин болуп жашаган Канаан жеринде жашап калды.+
2 Жакыптын үй-бүлөсү жөнүндөгү* баян.
Жусуп+ атасынын аялдары Биланын,+ Зилпанын+ уулдары менен чогуу кой бакчу.+ Ошол кезде ал 17 жашта болчу. Бир күнү ал атасына агаларынын кылып жүргөн жаман иштери жөнүндө айтып койду.
3 Ысрайыл Жусупту башка уулдарынын+ баарынан жакшы көрчү, анткени карыганда көргөн уулу эле. Ал Жусупка узун кооз кийим тиктирип берди.
4 Агалары атасынын аларга караганда Жусупту көбүрөөк жакшы көрөрүн билгенде аны жек көрүп, ага жөн сүйлөбөй калышты.
5 Бир күнү Жусуп түш көрүп, аны агаларына айтып берди.+ Алар аны ого бетер жек көрүп калышты.
6 Жусуп аларга: «Уксаңар, мен мындай түш көрдүм.
7 Биз талаада боо байлап жүрүптүрбүз. Бир убакта мен байлаган боо тикесинен туруп калды. Анан силердин боолоруңар менин боомду тегеректеп алып, ага жүгүнүштү»,— деди.+
8 Ошондо агалары: «Эмне, бизге падыша болгуң барбы? Бизди башкаргың барбы?»+ — деп, көргөн түшү, айткан сөздөрү үчүн аны ого бетер жек көрүп калышты.
9 Андан кийин Жусуп дагы бир түш көрүп, аны да агаларына айтып берди. Ал: «Мен дагы бир түш көрдүм. Бул жолу түшүмдө мага күн, ай, 11 жылдыз жүгүнүп жатыптыр»,— деди.+
10 Жусуп түшүн агаларына эле эмес, атасына да айтып берди. Ошондо атасы аны: «Эмне деген түш көргөнсүң? Кантип эле мен да, апаң да, бир туугандарың да сага жерге чейин ийилип таазим кылалы?» — деп кагып койду.
11 Жусуптун айткандарын укканда агаларынын ичи тарый баштады,+ атасы болсо анын сөздөрүн көкүрөгүнө түйүп алды.
12 Бир күнү Жусуптун бир туугандары атасынын койлорун Шекемдин+ жанына жайганы кетишти.
13 Бир канча убакыттан кийин Ысрайыл Жусупка: «Сени Шекемдин жанында мал жайып жүргөн агаларыңа жиберейин, барып келбейсиңби»,— деди. Жусуп: «Мейли, барып келейин»,— деди.
14 Ысрайыл ага: «Барып, агаларыңдын ал-жайын сурап, мал-жаны аманбы, билип кел»,— деди. Ошентип, аны Хеброн+ өрөөнүнөн Шекемге жөнөттү.
15 Анан Жусуп талаада жүрүп бир кишиге жолукту. Ал Жусуптан: «Эмне издеп жүрөсүң?» — деп сурады.
16 Ал: «Агаларымды издеп жүрөм. Каякта мал жайып жүргөнүн билбейсизби?» — деди.
17 Тиги киши: «Бул жерден кетип калышкан. Мен алардын: „Дотанга баралы“,— деп жатышканын уккам»,— деди. Жусуп агаларынын артынан барып, аларды Дотандан тапты.
18 Агалары Жусупту алыстан эле көрүп, аларды көздөй келатканда, аны өлтүрөбүз деп сүйлөшө башташты.
19 Алар бири-бирине: «Карасаңар, тиги түш көргүч келатат.+
20 Келгиле, аны өлтүрүп, суу сакталчу чуңкурга таштап салалы да, жырткычка жем болуптур деп коёлу. Ошондо түштөрү кантип аткарыларын көрөбүз»,— дешти.
21 Муну укканда Рубейин+ Жусупту куткарып калганга аракет кылып: «Кой, өлтүрбөй эле коёлу»,+— деди.
22 Анан аларга: «Кан төкпөгүлө.+ Андан көрө, аны мобу суу сакталчу чуңкурга таштап салгыла. Ага тийбегиле»,— деди.+ Ал Жусупту алардын колунан куткарып, кайра атасына жибергиси келгендиктен ошентти.
23 Жусуп келери менен, агалары үстүндөгү кооз кийимин сыйрып алып,+
24 өзүн чуңкурга таштап салышты. Чуңкур бош эле, суусу жок болчу.
25 Анан тамактанганы отурушту. Бир убакта Гилат жактан келаткан Ысмайылдын тукумдарынын+ кербенин көрүштү. Алар төөлөрүнө ладан*, бальзам*, чайыры бар кабыктарды жүктөп алып,+ Мисирге жол тартып баратышкан эле.
26 Ошондо Жүйүт бир туугандарына: «Инибизди өлтүрүп, кылмышыбызды жашырып койгондон эмне пайда?+
27 Ага тийбей эле коёлу. Андан көрө, Ысмайылдын тукумдарына сатып жибербейлиби.+ Кантсе да, бир тууганыбыз, бир боорубуз эмеспи»,— деди. Тигилер Жүйүттүн айтканына макул болушту.
28 Ысмайылдын тукумдары, Мидиандын тукумдарынан+ чыккан соодагерлер*, ошол жерден өтүп баратканда, агалары Жусупту чуңкурдан алып чыгып, аларга 20 күмүш акчага* сатып жиберишти.+ Тигилер болсо Жусупту Мисирге алып кетишти.
29 Кийинчерээк Рубейин суу сакталчу чуңкурга барып, Жусуптун жок экенин көргөндө кийимин айрып жиберди.
30 Анан бир туугандарынын жанына келип: «Инибиз жок экен, эми эмне кылам?» — деп кыйкырды.
31 Алар бир текени союп, Жусуптун кийимин анын канына малып,
32 атасына берип жиберишти да: «Биз муну таап алдык. Карап көрсөңүз, уулуңуздун кийими эмеспи?»+ — деп айттырып жиберишти.
33 Жакып анын кийимин таанып: «Бул — уулумдун кийими. Жусупту жырткыч жара тартып кеткен турбайбы, балам жырткычка жем болгон турбайбы!» — деп катуу боздоду.
34 Анан үстүндөгү кийимин айрып, белине таар* курчанып, уулун жоктоп көп күн ыйлады.
35 Уул-кыздарынын баары аны сооротуп жатышты. Бирок ал сооронбой: «Башым көргө*+ киргенче, уулумду жоктоп жүрүп өтөм» — деп, күйүт тартып ыйлай берди.
36 Мисирден Мидиандын тукумдары Жусупту Мисирдин падышасынын+ ак сарайында кызмат кылган Потипарга сатып жиберишти. Ал падышанын сакчыларынын башчысы болчу.+
Шилтемелер
^ Же: «Жакып жөнүндөгү».
^ 228 г күмүш.
^ Сыягы, бул 25, 27 жана ушул аятта айтылган Ысмайылдын тукумдарын билдирет.
^ Салт боюнча, аны кайгырганда, күйүт тартканда жана башка ушу сыяктуу учурларда кийишчү же колдонушчу.
