Башталыш 6:1—22
6 Жер бетинде адамдар көбөйүп, алардан кыздар да төрөлдү.
2 Ошондо периштелер*+ ал кыздардын сулуулугуна көңүл бура башташты. Анан каалагандарын аялдыкка алышты.
3 Ошондо Жахаба: «Мен* адамдарга түбөлүккө чыдай бербейм,+ анткени алар — күнөөкөр пенде*. Ошондуктан алардын 120 жылы гана калды»,+— деди.
4 Ошол кезде жерде алп кишилер* жашаган. Периштелер адамдардын кыздары менен жатып, алардан ошол алптар төрөлгөн болчу. Алар байыркы убактагы күчтүү, атагы чыккан кишилер болушкан.
5 Жахаба жер бетиндеги адамдардын көп жаман иштерди кылып жатканын, алардын ниети бузук экенин, дайыма жаман жакка ооп турарын көрдү.+
6 Ошондо Жахаба жараткан адамдары үчүн кайгырып*, жүрөгү ооруду.+
7 Анан Жахаба: «Жараткан адамдарымды жер бетинен жок кылам, адамдарга кошуп үй айбанаттары менен башка жан-жаныбарларды, асманда учкан канаттууларды да жок кылам, анткени өзүм жараткан адамдар үчүн кайгырып жатам»,— деди.
8 Нух болсо Жахабага жаккан киши болчу.
9 Нухтун жашоосу жөнүндөгү баян.
Нух адил киши эле.+ Замандаштарынан айырмаланып, ал кынтыксыз болгон жана чыныгы Кудайдын жолунда* жүргөн.+
10 Анын Шем, Хам, Жапет+ деген 3 уулу бар эле.
11 Бүт жер бети зордук-зомбулукка толуп, чыныгы Кудайдын көз алдында жийиркеничтүү болуп калды.
12 Кудай дүйнө жүзүнө көз чаптырып, анын аябай бузулганын көрдү,+ анткени бүт адамзат жаман жолго түшүп кеткен эле.+
13 Ошондо Кудай Нухка мындай деди: «Мен бүт адамзатты жок кылайын деп чечтим, себеби адамдардын айынан жер зордук-зомбулукка толуп кетти. Эми аларды жок кылып, жерди ээн калтырам.+
14 Өзүңө чайырлуу жыгачтан кеме жасап,+ ичин бөлүктөргө бөл да, ичи-тышын чайыр+ менен капта.
15 Анын узундугу 134 метр, туурасы 22 метр, бийиктиги 13 метр* болсун.
16 Кеменин үстү жагынан жарым метрдей* калтырып, жарык кирип турушу үчүн терезе* жаса. Эшигин капталынан чыгар.+ Кемени 3 кабат кылып кур.
17 Мен болсо бүт жер жүзүндөгү* адамдар менен жан-жаныбарлардын баарын жок кылыш үчүн топон суу+ каптатам. Ошондо жер бетиндеги тирүү жандын бардыгы кырылат.+
18 Ал эми сени менен келишим түзөм. Кемеге сени менен кошо уулдарың, аялың менен келиндериң да кирсин.+
19 Сени менен чогуу тирүү калышы үчүн, кемеге жан-жаныбарлардын бардык түрүнөн түгөй-түгөйү менен,+ эркек-ургаачы кылып киргиз.+
20 Тирүү калышы үчүн, канаттуулардын, үй айбанаттарынын жана башка жан-жаныбарлардын ар бир түрүнөн түгөй-түгөйү менен киргиз.+
21 Андан тышкары, өзүң жана жан-жаныбарлар жей турган азыктын+ бардык түрүнөн камдап ал».
22 Нух баарын Кудай айткандай кылды. Ал кандай айтса, так ошондой кылды.+
Шилтемелер
^ Сөзмө-сөз: «Кудайдын уулдары».
^ Сөзмө-сөз: «Менин рухум».
^ Же: «денесинин каалоосуна жетеленип иш кылат».
^ Сөзмө-сөз: «нефилимдер». Сыягы, «башкаларды кулаткандар» дегенди билдирет.
^ Же: «адамдарды жаратканына өкүнүп».
^ Сөзмө-сөз: «чыныгы Кудай менен».
^ Сөзмө-сөз: «узундугу 300 чыканак, туурасы 50 чыканак, бийиктиги 30 чыканак». Б14 тиркемесин кара.
^ Сөзмө-сөз: «1 чыканак».
^ Еврейче цохар. Айрымдардын айтымында, бул сөз жарык кире турган терезени эмес, бийиктиги жарым метрдей болгон, жантайып турган чатырды билдирет.
^ Сөзмө-сөз: «асман астындагы».
