Бийлер 18:1—31
18 Ал кезде Ысрайылда падыша жок болчу.+ Дан уруусундагылар+ өздөрүнө жашаганга жер издеп жүрүшкөн, анткени Ысрайыл урууларынын арасынан үлүшүн толук ала элек болчу.+
2 Ошондуктан Дандын урпактары өздөрүнүн уруусунан, Сора менен Эштаолдо+ жашагандардын арасынан ылайыктуу, ишеничтүү 5 киши тандап, аларды: «Барып, жер чалып келгиле»,— деп жөнөтүштү. Ал кишилер Эпрайым уруусунун жериндеги тоолуу аймакка барып, Микейдин+ үйүнө түнөп калышты.
3 Анын үйүнүн жанында турганда алар жаш лебинин үнүн таанып*, ага барышты да: «Сени бул жакка ким алып келди? Биякта эмнеге жүрөсүң? Эмне иш кылып жатасың?» — деп сурашты.
4 Леби: «Микей мени дин кызматчы кылып жалдап алды»+ — деп, анын ал үчүн эмнелерди кылганын айтып берди.
5 Ошондо тигилер: «Жолубуз шыдыр болобу же жокпу, Кудайдан сурап билип берчи»,— дешти.
6 Дин кызматчы аларга: «Эч тынчсызданбай бара бергиле, бараткан жолуңарда Жахаба силер менен болот»,— деди.
7 Ал 5 киши андан ары жолун улап, Лаишке+ барды. Алар ал жактагы элдин сидондуктарга окшоп эч кимге көз каранды болбой жашап жатканын көрүштү. Эч ким кол салып, тынчын албагандыктан, алар тынч, бейкапар жашап жатышкан.+ Андан сырткары, сидондуктардан алыс жашашчу, башкалар менен да эч кандай иши жок болчу.
8 Чалгынчылар Сора менен Эштаолго,+ өз элине кайтып келишкенде, алардан: «Кандай барып келдиңер?» — деп сурашты.
9 Алар: «Жүргүлө, аларды басып алалы. Биз ал жерди көрүп келдик, укмуштай сонун жер экен. Көп ойлонуп отурбай, тезирээк барып, басып алалы.
10 Барганыңарда бейкапар жашап жаткан элди көрөсүңөр,+ жери да кенен. Ал жакта бүт баары бар экен, Кудай аны бизге берди»,+— дешти.
11 Ошондо Дан уруусунан 600 киши куралданып алып, Сора менен Эштаолдон жолго чыгышты.+
12 Алар Жүйүт жериндеги Кириат-Жеаримдин+ жанына барып, чатырларын тигишти. Ошондуктан Кириат-Жеаримдин батыш тарабындагы ал жер ушул күнгө чейин Махане-Дан*+ деп аталат.
13 Ал жактан алар Эпрайым уруусуна караштуу тоолуу аймакка бет алып, Микейдин үйүнө барышты.+
14 Лаиш жерин көрүп келгени барган баягы 5 киши+ жанындагыларга: «Билесиңерби, бул үйлөрдүн биринде эфод, үй-бүлөлүк буркандар менен башка буркандар бар.+ Эми эмне кылышты ойлонуп көргүлө»,— дешти.
15 Анан Микейдикинде жашап жаткан жаш лебинин+ үйүнө барып, ал-жайын сурап, аны менен сүйлөшүп калышты.
16 Ошол учурда Дан уруусундагы курал-жаракчан 600 киши+ дарбазанын кире беришинде турган.
17 Жер чалганы барган 5 киши+ эфодду,+ үй-бүлөлүк буркандар+ менен башка буркандарды+ алыш үчүн үйгө киришти. (Дин кызматчы+ болсо курал-жаракчан 600 киши менен дарбазанын жанында турган эле.)
18 Алар Микейдин үйүнө кирип, эфодду, үй-бүлөлүк буркандар менен башка буркандарды алышканда, дин кызматчы алардан: «Эмне кылып жатасыңар?» — деп сурады.
19 Алар: «Акырын, унчукпай биз менен жүр да, бизге кеңешчи*, дин кызматчы бол. Бир кишинин үйүндө дин кызматчы болгонуң жакшыбы+ же бир урукка, атүгүл бүтүндөй бир урууга дин кызматчы болгонуң жакшыбы?»+ — дешти.
20 Бул дин кызматчыга жагып калгандыктан, ал эфодду, үй-бүлөлүк буркандар менен оюлуп жасалган бурканды+ алып, алар менен жөнөдү.
21 Алар ал жерден чыгып, жолун улантышты. Мал-мүлк менен балдарды алдыга коё беришти.
22 Дан уруусундагылар Микейдин үйүнөн узап кетишкенде, Микей менен кошуна-колоңдору чогулуп, алардын артынан кууп барышты.
23 Анан Дан уруусундагыларга кыйкырышканда, алар бурулуп, Микейге: «Эмне болду? Бул элдин баарын эмнеге чогултуп алдың?» — дешти.
24 Ал: «Мен жасаган кудайларды да, дин кызматчымды да алып кетиптирсиңер. Мага эчтеке калтырбаптырсыңар. Анан: „Эмне болду?“ — дегениңер кандай?» — деди.
25 Дандын урпактары ага: «Кыйкырба, болбосо каары кайнап турган бул кишилер кол салса, өзүң да, үйүңдөгүлөрүң да аман калбайсыңар»,— дешти.
26 Анан жолун улап кете беришти. Алардын алда канча күчтүү экенин көрүп, Микей үйүнө кайтты.
27 Дандын урпактары Микей жасаган кудайларды, анын дин кызматчысын алып, Лаишке+ барышты да, тынч, бейкапар жашап жаткан+ баягы элге кол салып, аларды кылычтап, шаарын өрттөп ташташты.
28 Аларды куткарар эч ким болгон жок, анткени алар Сидондон алыс жашашчу, башкалар менен да эч кандай иши жок болчу. Ал шаар Бет-Рекопко*+ караштуу өрөөндө жайгашкан эле. Дандын урпактары ал шаарды кайра куруп, ошол жакта жашап калышты.
29 Алар шаарды өздөрүнүн бабасы, Ысрайылдын уулу+ Дандын атынан Дан+ деп аташты. Анын мурунку аты Лаиш эле.+
30 Анан алар оюлуп жасалган бурканды+ коюп алышты. Мусанын уулу Гершомдун+ урпагы болгон Жонатан+ менен анын урпактары болсо, ал жердегилер туткундалып кеткенге чейин, Дан уруусуна дин кызматчы болуп кызмат кылышты.
31 Микейдин оюлуп жасалган бурканы алардыкында, чыныгы Кудайдын үйү* Шилодо+ канча турса, ошончо убакыт бою турду.
Шилтемелер
^ Же: «лебини сүйлөгөнүнөн таанып».
^ Мааниси: «Дандын конушу».
^ Сөзмө-сөз: «ата».
^ Сыягы, чакан Арам падышалыгынын, тагыраак айтканда, анын борбор шаарынын аталышы.
^ Же: «ыйык чатыры».
