Галатиялыктарга 6:1—18
6 Бир туугандарым, кимдир бирөө билбей туура эмес иш кылып алса да, силер, Исанын жетилген жолдоочулары*, андай адамды туура жолго салганга аракет кылгыла. Бирок ага жылуу-жумшак мамиле кылгыла.+ Ошол эле учурда өзүңөр да туура эмес ишке азгырылып кетпешиңер үчүн+ сак болгула.+
2 Бири-бириңердин түйшүгүңөрдү көтөрүшкүлө,+ ошондо Машаяктын мыйзамын аткарган болосуңар.+
3 Эгерде кимдир бирөө эч ким эмес болуп туруп өзү жөнүндө жогору ойдо болсо,+ ал өзүн өзү алдап жатат.
4 Ар ким өзүнүн иштерин текшерсин,+ ошондо ал өзүн башкаларга салыштырбай,+ өз иштерине кубанат.
5 Себеби ар ким өз жүгүн өзү көтөрөт*.+
6 Андан сырткары, Кудайдын сөзүнөн насаат алып жаткан ар бир киши аны насааттап жаткан адам менен бардык жакшы нерсесин бөлүшсүн.+
7 Алданбагыла: Кудайды шылдыңдай албайсыңар. Адам эмнени сепсе, ошону орот.+
8 Ким күнөөгө түрткөн каалоолорго жетеленип сепсе, өлүмдү* оруп алат. Ал эми ким Кудайдын ыйык рухуна жетектелип сепсе, түбөлүк өмүрдү оруп алат.+
9 Ошон үчүн жакшылык кылып жатып багынбайлы. Эгер багынбасак*, убагы келгенде түшүмүн оруп алабыз.+
10 Ошондуктан мүмкүнчүлүк барда баарына, өзгөчө, боордошторубузга жакшылык кылалы.
11 Карагылачы, силерге бул катты чоң-чоң тамгалар менен өз колум менен жаздым.
12 Силерди сүннөткө отургузулганга мажбурлап жаткандардын баары башкаларга жакшы көрүнгүсү келет. Алар устунга кадалып өлгөн Машаяк жөнүндө кабар айтып куугунтукталбаш үчүн эле ошентишет.
13 Чынында, сүннөткө отургузулгандардын өздөрү да Мыйзамды аткарышпайт,+ бирок силерди айтып* мактаныш үчүн сүннөткө отургузулушуңарды каалашат.
14 Мен болсо жаза устунуна кадалып өлгөн Мырзабыз Иса Машаяктан башка эч нерсе менен мактангым келбейт.+ Анын өлүмүнөн улам дүйнө мен үчүн, мен дүйнө үчүн өлүктөймүн*.
15 Себеби сүннөткө отургузулуу да, отургузулбоо да маанилүү эмес,+ чындап маанилүү нерсе — Кудайдын силерди жаңы адам кылганы.+
16 Кудай ушул айтылгандарга ылайык жашагандардын бардыгына — Кудайдын Ысрайылына+ — тынчтык берип, кайрымдуулук кылсын.
17 Мындан ары мага эч ким кыйынчылык туудурбасын, анткени денемде Исанын кулу экенимди көрсөткөн белги бар.+
18 Бир туугандарым, жакшы рухуңар үчүн Мырзабыз Иса Машаяк силерге ырайымын төгө берсин. Оомийн.
Шилтемелер
^ Же: «Кудайдын ыйык рухуна жетектелгендер».
^ Же: «өз жоопкерчиликтерин өзү аткарат».
^ Сөзмө-сөз: «чирүүнү».
^ Же: «чарчап калбасак».
^ Сөзмө-сөз: «денеңер менен».
^ Же: «устунга кадалгам».
