Даниел 8:1—27
8 Белшатсар+ падышанын башкаруусунун үчүнчү жылында, мен, Даниел, дагы аян алдым.+
2 Ошол убакта Эйлам+ дубанындагы Шушан+ ак сарайында* элем. Аянда Улай суусунун жээгинде жүрүптүрмүн.
3 Башымды көтөрүп карасам, суунун боюнда 2 мүйүздүү+ кочкор+ туруптур. Эки мүйүзү тең узун экен, бирок бири экинчисинен узунураак экен; узуну кийинчерээк чыкты.+
4 Кочкордун батышты, түндүктү, түштүктү сүзгүлөп жатканын көрдүм, ага бир да жапайы жаныбар туруштук бере алган жок, андан куткарып алар эч ким болгон жок.+ Ал өз билгенин кылып, текеберденип жатты.
5 Мен карап турдум, анан күн батыштан келаткан бир текени көрдүм.+ Ал туягы жерге тийбей бүт жер жүзүн аралап келатыптыр. Көздөрүнүн ортосунда чоң мүйүзү бар экен.+
6 Ал суунун боюндагы мен көргөн эки мүйүздүү кочкорго катуу каары менен атырылып келатты.
7 Текенин кочкорго жакындап келип, каардана сүзүп, эки мүйүзүн сындырганын, кочкордун ага туруштук бергенге күчү жетпегенин көрдүм. Теке аны жыга сүзүп, тебелеп салды. Кочкорду андан куткарып алар эч ким болгон жок.
8 Теке аябай текеберденип кетти, бирок күчүнө кирери менен, чоң мүйүзү сынып калды. Анын ордуна 4 тарапты* караган 4 мүйүз чыкты, алар даана көрүнүп турду.+
9 Алардын биринен дагы бир кичинекей мүйүз чыкты да, түштүктү, чыгышты жана көрктүү жерди*+ көздөй аябай өстү.
10 Ал ушунчалык өскөндүктөн асман кошуунуна* чейин жетти да, кошуундан айрымдарды, кээ бир жылдыздарды жерге кулатып, тебелеп-тепседи.
11 Ал текеберденип, атүгүл кошуундун Төрөсү менен тең тайлашканга аракет кылып жатты. Төрөгө багыштап күн сайын курмандык чалуу токтотулду, анын ыйык жайы турган жер кыйратылды.+
12 Кошуун мүйүзгө берилди жана күн сайын курмандык чалуу токтотулду; бул анын кылмышынан улам болду. Мүйүз чындыкты жерге ыргытып жатты, кылган ишинде ийгиликке жетип жатты.
13 Анан бир периштенин сүйлөп жатканын уктум. Ага башка бир периште: «Күнүгө чалынчу курмандык менен бүлгүнгө учурата турган кылмыш жөнүндөгү, ыйык жер менен кошуундун тебелениши жөнүндөгү аянда көрсөтүлгөндөр канча убакытка созулат?»+ — деди.
14 Ошондо биринчи периште мага: «2 300 күн* өткөнгө чейин. Анан ыйык жер калыбына келтирилип, кандай абалда болушу керек болсо, ошондой абалда болот»,— деди.
15 Мен, Даниел, аян алып, аны түшүнгөнгө аракет кылып жатканымда, бет маңдайыма капыстан адамга окшош бирөө туруп калды.
16 Ошондо Улай+ суусунун ортосунан адамдын үнүн уктум. Ал: «Жебирейил,+ буга көргөндөрүнүн маанисин түшүндүрүп бер»,+— деп кыйкырды.
17 Ошондо тиги мен турган жерге келди. Бирок ал келгенде, үрөйүм учканынан жүзтөмөндөп жыгылдым. Ал мага: «Оо, адам уулу, бул аяндын акыркы күндөрдө аткарыларын билип кой»,+— деди.
18 Ал мени менен сүйлөшүп жатканда, көмкөрөмөн жаткан боюнча катуу уктап кетиптирмин. Ошондо ал колун тийгизип, мени кайра тургузду.+
19 Анан мындай деди: «Мен сага азыр Кудайдын каары төгүлө турган убактын аяк жагында эмне болорун айтып берем, себеби бул белгиленген убакта, башкача айтканда, акыркы күндөрдө аткарылат.+
20 Сен көргөн 2 мүйүздүү кочкор — Мадай жана Персия падышалары.+
21 Ал эми саксайган теке — Грециянын падышасы,+ көздөрүнүн ортосундагы чоң мүйүз — биринчи падышасы.+
22 Ал мүйүздүн сынып, ордуна 4 мүйүз чыкканы+ анын элинен 4 падышалык чыгарын билдирет, бирок алар тиги биринчи падышадай күчтүү болушпайт.
23 Алардын падышалыгынын акырында, кылмышкерлердин күнөөсү башынан ашканда*, жеткен айлакер*, заары бетине чыккан падыша чыгат.
24 Ал өтө кубаттуу болот, бирок буга өз күчү менен жетпейт. Ал алаамат салып, элдерди айран-таң калтырат, билгичтик менен иш кылып, ийгиликке жетет, күчтүүлөрдү, ыйык элди кыйратат.+
25 Ал ийгиликке жетиш үчүн айлакерлик менен алдамчылыкка барат. Текеберденет, көптөрдү бейпил убакта* кыйратат. Атүгүл төрөлөрдүн Төрөсүнө каршы чыгат, бирок адамдын катыштыгы жок эле кыйратылат.
26 Аяндагы 2 300 күн* жөнүндө айтылгандар чындык. Бирок сен аянды жашыруун сырдай сакта, себеби ал тээ алыскы келечекке тиешелүү».+
27 Ошондо мен, Даниел, аябай алсырап, бир нече күн ооруп калдым.+ Анан туруп, падышанын иштерин аткара баштадым.+ Бирок аянда көргөндөрүмөн улам деңдароо болуп жүрдүм, аларды түшүнгөн эч ким болгон жок.+
Шилтемелер
^ Же: «Суза сепилдүү сарайында».
^ Сөзмө-сөз: «асмандын 4 шамалын».
^ Сыягы, Иерусалим менен андагы ибадатканага тиешелүү.
^ Ыйык Китепте бул сөз айкашы жылдыздар сыяктуу асман телолорун же периштелерди, же адамдарды билдириши мүмкүн.
^ Сөзмө-сөз: «кеч менен таң».
^ Же: «чегине жеткенде».
^ Же: «табышмактуу сөздөрдү түшүнгөн».
^ Же балким: «эскертпей туруп».
^ Сөзмө-сөз: «кеч менен таң».
