Еврейлерге 12:1—29
12 Эмесе, уккан-көргөндөрүн ырастап бере ала турган ушундай көп күбөлөрдүн* курчоосунда болгондуктан биз да жүк болгон нерсенин баарынан арылып, оңой эле чырмап ала турган күнөөдөн баш тартып,+ туруктуулугубуздан жазбай, жарышыбыздын аягына чыгалы.+
2 Жарышта чуркап баратып Исадан — ишенимибизди жеткилең кылганга жардам берген Башчыбыздан+ — көзүбүздү албайлы. Келечекте кубанычка бөлөнөрүн билгендиктен ал устунга кадалып, азаптуу өлүмгө чыдаган, ошондон уялган эмес. Андан кийин Кудайдын тактысынын оң жагына отурган.+
3 Чарчап, багынып калбашыңар үчүн+ Иса жөнүндө терең ойлонгула. Ал сүйлөгөн сөзү менен өздөрүнө эле зыян алып келген күнөөкөрлөрдүн басынтып-кордогон сөздөрүнө+ чыдаган.
4 Силер күнөө менен каныңар төгүлгүчө салгылаша элексиңер.
5 Кудайдын силерди уулдарындай көрүп берген насаатын таптакыр унутуп койдуңар. Ал: «Уулум, Жахабанын жазасын* четке какпа, ал сени оңдоп-түзөгөндө, көңүлүңдү чөгөрбө.
6 Анткени Жахаба кимди жакшы көрсө, ошону жазалайт, кимди уулундай көрсө, ошону тарбиялайт*»,+— деген.
7 Башка түшкөн кыйынчылыктарды көтөрө билгиле, муну оңдоп-түзөлүүнүн бир жолундай көргүлө. Себеби Кудай силерди уулдарындай көрөт.+ Уулун жазалап-тарбиялабаган ата барбы?+
8 Кудай силерди башка боордошторуңарды жазалагандай эле жазалабаса, анда силер анын уулдары эмес, чоочун бирөөнүн уулдары болуп калмаксыңар.
9 Бизди өз аталарыбыз да жазалап, тарбиялачу, ошондой болсо да аларды урматтап-сыйлачубуз. Анда жашашыбыз үчүн бизди ыйык руху аркылуу жетектеп жаткан асмандагы Атабызга андан бетер баш ийишибиз керек эмеспи?+
10 Аталарыбыз бизди кыска эле убакыт өздөрү туура көргөндөй тарбиялашкан. Кудай болсо бизге эле жакшы болсун деп, өзүндөй ыйык болушубуз үчүн+ дайыма тарбиялап турат.
11 Албетте, бирөө оңдоп-түзөгөндө эч ким сүйүнбөйт, тескерисинче, капаланат. Бирок аны кабыл алса, пайдасын көрөт: адил иштерди кылып, жан дүйнөсү тынч болот*.
12 Ошондуктан күчү кеткен колуңарды, титиреген тизеңерди чыңдагыла.+
13 Аксаган бутуңар чыгып кетпеши үчүн, кайра, айыгышы үчүн, дайыма түз жолдо баскыла.+
14 Бардык адамдар менен тынчтыкта жашаганга,+ ыйык болгонго умтулгула,+ себеби ыйык болмоюнча эч ким Теңирди* көрбөйт.
15 Кимдир бирөө Кудайдын ырайымынан айрылып калбашы үчүн жана уулуу өсүмдүктүн тамырындай болуп көптөргө зыян келтирип, аларды уулантып* салбашы үчүн, сак болгула.+
16 Араңарда жыныстык адеп-ахлаксыздыкка* жаткан иштерди кылып жүргөндөр да, бир табак тамак үчүн туңгучтук укугунан баш тарткан Эйсаптай болуп ыйык нерселерди баалабагандар да болбосун.+
17 Өзүңөр билгендей, кийин Эйсап бата алгысы келгенде, ага татыксыз болуп калган. Ал көз жашын төгүп, атасынан чечимин өзгөртүшүн жалдырап суранса да,+ атасы өзгөрткөн эмес.
18 Силер ысрайылдыктар жакындаган кадимки Синай тоосуна жакындаган жоксуңар.+ Ал тоо жалындап күйүп,+ аны кара булут, коюу караңгылык каптаган, ал жерде катуу шамал болгон,+
19 сурнайдын үнү+ жана асмандан сүйлөгөн үн угулган.+ Ошондо эл Мусага ал үндү экинчи укпай эле коёлучу деп жалбарган.+
20 Себеби алар: «Бул тоого атүгүл жаныбар чыкса да, таш бараңга алынсын»,+— деген буйрукту укканда аябай коркуп калышкан.
21 Ал жерде ушунчалык үрөй учурарлык кубулуштар болгондуктан, Муса да: «Коркуп, титиреп турам»,— деп айткан.+
22 Ал эми силер, алардан айырмаланып, асмандагы Сион тоосуна+ жана тирүү Кудайдын шаарына, башкача айтканда, асмандагы Иерусалимге+ жакындадыңар. Ошондой эле чоң жыйынга чогулган түмөндөгөн* периштелерге,+
23 ысымдары асманда жазылган Кудайдын туңгучтарынын жыйналышына,+ баарынын Соту болгон Кудайга,+ анын ыйык рухуна жетектелип жашаган,+ жеткилеңдикке жеткирилген адил адамдарга,+
24 жаңы келишимдин+ арачысы болгон Исага+ жана анын бизге чачыратылган, Абылдыкынан+ алда канча жогору турган канына жакындадыңар.
25 Асмандан сүйлөгөндүн үнүн укпай койгондон сак болгула. Байыркы убакта ысрайыл эли жерде Кудайдын эскертүүсүн айткан кишиге кулак какпай койгону үчүн жазаланган. Анда асмандан сүйлөп жатканга кулак салбай койсок, жазадан качып кутула алабызбы?+
26 Ошол убакта Кудайдын үнү жерди солкулдаткан болсо,+ азыр ал: «Мен жерди эле эмес, асманды да дагы бир жолу солкулдатам»,+— деп убада берип жатат.
27 «Дагы бир жолу» деген сөздөр солкулдабай турган урагыс нерселер калышы үчүн, Кудай солкулдай турган нерселерди — өзү жаратпаган нерселерди — жок кыларын көрсөтүп турат.
28 Ошондуктан бизге урагыс Падышалыктын бийлиги* берилерин билгендиктен мындан ары да Кудай ырайым кылгыдай жашайлы. Ошондо Кудайды кастарлап, аны терең урматтап, ыйык кызматыбызды ага жаккандай аткара алабыз.
29 Биздин Кудайыбыз — жалмап сала турган от.+
Шилтемелер
^ Сөзмө-сөз: «күбөлөрдүн чоң булутунун».
^ Бул жерде «жаза» деп которулган сөз түп нускада кеңири мааниге ээ. Аны «акыл-насаат, билим, оңдоп-түзөө, үндөө, эскертүү, кеңеш» деп да которсо болот.
^ Сөзмө-сөз: «сабайт».
^ Же: «тынчтык менен адилдиктин жемишин берет».
^ Же: «Мырзабызды». Грекче Кириос.
^ Же: «арамдап».
^ Же: «он миңдеген».
^ Сөзмө-сөз: «урагыс Падышалык».
