Еврейлерге 13:1—25
13 Мындан ары да бири-бириңерди өз бир тууганыңардай жакшы көргүлө.+
2 Меймандос болгонду* унутпагыла,+ анткени меймандостугунан улам кээ бирөөлөр өздөрү билбей периштелерди коноктошкон.+
3 Түрмөдө отурган боордошторуңарды, өзүңөр да алар менен түрмөдө отургандай,+ эсиңерден чыгарбагыла.+ Ошондой эле өзүңөр да азырынча адам болгондуктан* кордук көрүп жаткандарды унутпагыла.
4 Никени баары бааласын, жубайлар бири-биринин көзүнө чөп салбасын*,+ себеби жыныстык адеп-ахлаксыздыкка жаткан иштерди* кылгандарды, ойноштук кылып жүргөндөрдү Кудай соттойт.+
5 Акчаны сүйбөгүлө,+ колуңарда болгонуна ыраазы болгула.+ Анткени Кудай: «Силерди эч качан калтырбайм, эч убакта таштабайм»,— деген.+
6 Ошондуктан биз: «Жахаба — менин жардамчым; мен коркпойм. Пенде мага эмне кыла алат?»+ — деп ишенимдүү түрдө айта алабыз.
7 Араңарда жетекчиликти колго алгандарды, силерге Кудайдын сөзүн үйрөткөндөрдү, унутпагыла.+ Алардын жүрүм-туруму кандай жакшы натыйжа берип жатканын байкап, ишенимиңер алардыкындай болушу үчүн аракет кылгыла.+
8 Иса Машаяк кечээ кандай болсо, бүгүн да ошондой жана түбөлүккө ошол бойдон калат.
9 Ар кандай жат окуулардын айынан адашып калбагыла. Силерге чындап кубат берген* нерсе тамак* эмес, Кудайдын ырайымы, себеби тамакка өзгөчө маани бергендер андан пайда табышпайт.+
10 Бизде ыйык чатырда кызмат кылгандарга үстүндө чалынган курмандыктан жегенге тыюу салынган курмандык жайы бар.+
11 Ошол жерде курмандыкка чалынган жаныбарлардын канын башкы дин кызматчы күнөө үчүн чалынган курмандык катары Ыйыктын ыйыгына алып кирет, эти болсо конуштун сыртында өрттөлөт.+
12 Ошол себептен Иса да өзүнүн төгүлгөн каны менен элди ыйыкташ үчүн+ шаардын* сыртында азап чеккен.+
13 Андыктан биз да конуштун сыртына чыгып, ага баралы, ал көргөн кордукту көрөлү.+
14 Себеби бул жерде биздин туруктуу шаарыбыз жок, биз келечекте курула турган шаарды чыдамсыздык менен күтүп жатабыз.+
15 Келгиле, Иса аркылуу дайыма Кудайды мактап-даңктайлы. Бул — ага арнап чалган курмандыгыбыз.+ Анын ысмын башкаларга жарыялайлы.+ Бул — ага тартуу кылган жемишибиз*.+
16 Ошондой эле жакшылык кылганды, өзүңөрдөгүнү башкалар менен бөлүшкөндү унутпагыла,+ анткени мындай курмандыктар Кудайга жагат.+
17 Араңарда жетекчиликти колго алгандарга тил алгыла,+ баш ийгиле.+ Себеби алар силерге күндүр-түндүр кам көрүшөт жана бул үчүн Кудайдын алдында жооп беришет.+ Эгер ошентсеңер, алар үшкүрүнбөй, милдетин кубанып аткарышат, болбосо өзүңөр эле зыян тартасыңар.
18 Биз үчүн мындан ары да Кудайдан тиленип тургула, анткени абийирибиздин таза экенине бекем ишенебиз+ жана бардык жагынан чынчыл болгонго умтулабыз.
19 Өзгөчө, силерге тезирээк барышым үчүн тиленип турушуңарды өтүнөм.
20 Кудай койлордун улуу койчусун,+ Мырзабыз Исаны, тирилткен. Иса түбөлүк келишимди күчүнө киргизген канын ага тапшырган. Ошол Тынчтыктын Кудайы,
21 эрки аткарылышы үчүн, силерге Иса Машаяк аркылуу өзүнө жакканды кылганга түрткү берип, жакшы нерселердин баары менен камсыз кылсын. Ал түбөлүктөн түбөлүккө даңктала берсин. Оомийн*.
22 Бир туугандарым, бул катты силерге кыскача эле жаздым, андыктан сабыр кылып, дем-шык берерлик ушул сөздөрүмдү кабыл алышыңарды өтүнөм.
23 Ошондой эле бир тууганыбыз Тиметейдин түрмөдөн бошотулганын билдирип коёюн дегем. Эгер ал жакында келсе, силерди көргөнү барабыз.
24 Араңарда жетекчиликти колго алгандар менен калган бир туугандарыбыздын* баарына менден салам айткыла. Италиядагылар+ силерге салам айтып жатышат.
25 Кудай баарыңарга ырайымын төгө берсин.
Шилтемелер
^ Же: «Чоочундарга жакшылык кылганды».
^ Же балким: «алар менен чогуу азап чегип жаткандай». Сөзмө-сөз: «денеде жашап жүргөндүктөн».
^ Же: «нике төшөгүн булгашпасын».
^ Сөзмө-сөз: «Жүрөгүңөрдү чыңдаган».
^ Б. а. тамак-ашка байланышкан эрежелер.
^ Сөзмө-сөз: «шаардын дарбазасынын».
^ Сөзмө-сөз: «оозубуздун жемиши».
^ Сөзмө-сөз: «ыйыктардын».
