Еврейлерге 6:1—20
6 Ошондуктан Машаяк жөнүндөгү баштапкы окууларды билген соң эми ушуну менен эле чектелбей,+ жетилгендикке умтула берели.+ Кайрадан пайдубал тургузбайлы, башкача айтканда, пайдасыз* иштер үчүн өкүнүү, Кудайга ишенүү,
2 чөмүлүүнүн түрлөрү, башкалардын үстүнө кол коюу,+ өлгөндөрдүн тирилиши+ жана акыркы* сот жөнүндөгү окууларды кайра башынан үйрөнгүдөй болбойлу.
3 Эгер Кудай кааласа, жетилгендикке да жетебиз.
4 Бир кезде Кудай жарыкка алып чыккан,+ анын белеги* жана ыйык руху берилген,
5 анын баа жеткис сөзүнүн, келечекте боло турган замандагы жакшы нерселердин даамын таткан*,
6 бирок кийин Кудайдын туура окууларын четке каккан адамдарга+ кайрадан өкүнгөнгө жардам берүү мүмкүн эмес. Анткени алар Кудайдын Уулун кайрадан устунга кадап, башкалардын алдында аны маскара кылгандай эле болушат.+
7 Адамдар жерге окшош. Жердин жамгыр менен көп жолу сугарылганы — Кудайдын батасы, андай жер дыйкандарга түшүмүн берет.
8 Ал эми тикенек менен коко тикен өсүп чыкса, андай жер эч нерсеге жарабай, каргышка калат да, акыр-аягы өрттөлөт.
9 Ушинтип айтып жатсак да, сүйүктүү бир туугандарым, силердин абалыңар Кудайдын туура окууларын четке каккандардыкына караганда жакшыраак деп үмүттөнөбүз, анткени куткарылышыңар үчүн зарыл иш-аракеттерди кылып жатасыңар.
10 Кудай силердин бир туугандарыбызга* мурун да, азыр да кызмат кылып, анын ысмы үчүн көрсөткөн сүйүүңөрдү,+ эмгегиңерди унутуп калгыдай адилетсиз эмес.
11 Ошентсе да ар бириңердин мындан ары да тырышчаак болуп, үмүтүңөрдүн+ ишке ашарына аягына чейин+ бекем ишенишиңерди каалайбыз.
12 Жалкоолонбошуңарды+ жана ишенгени, чыдамдуу болгону үчүн Кудай убада берген адамдардан үлгү алышыңарды каалайбыз.
13 Ыбрайымга убада берип жатканда Кудай, өзүнөн жогору турган эч ким жок болгондуктан, өзүн оозанып ант берип:+
14 «Сага батамды берип, тукумуңду көбөйтөм»,— деген.+
15 Ыбрайым чыдап күткөндөн кийин, Кудай ага ушу убаданы берген.
16 Адамдар өздөрүнөн жогору турган бирөөнү оозанып ант беришет. Бул ар кандай талаш-тартыштын алдын алат, себеби берген анты алардын чындыкты айтып жатканына кепилдик болот.+
17 Анын сыңарындай, Кудай да өзү убада берген адамдарга+ ой-ниетинин өзгөрүлгүс экенине кепилдик берип, убадасын ант менен бышыктаган.
18 Кудай калп айтышы мүмкүн эмес болгондуктан, анын убадасы менен анты өзгөрбөйт;+ ушул эки нерсе Кудайды баш паана кылган бизге үмүтүбүздү бек сактаганга күч берет.
19 Ал үмүт+ биздин жаныбыз үчүн кемени ордунан жылдырбай кармап турган кеме казык сыяктуу. Ал үмүтүбүз бекем жана сөзсүз орундалат. Ал бизди көшөгөнүн* ары жагына алып кирет.+
20 Түбөлүккө Мелкиседек сыяктуу башкы дин кызматчы+ болгон Иса ал жакка биз үчүн жол баштап биринчи кирген.+
Шилтемелер
^ Сөзмө-сөз: «өлүк».
^ Сөзмө-сөз: «түбөлүк».
^ Сөзмө-сөз: «асман белеги».
^ Же: «күчтөрдүн көрсөтүлүшүн көргөн».
^ Бул ибадатканадагы Ыйык жай менен Ыйыктын ыйыгын бөлүп турган көшөгөнү билдирет.
