Еврейлерге 7:1—28
7 Ыбрайым падышаларды жеңип кайтып келатканда, Салимдин падышасы болгон ошол Мелкиседек — Эң Жогорку Кудайдын дин кызматчысы — аны тосуп чыгып, батасын берген.+
2 Ошондо Ыбрайым ага бардык олжосунун ондон бир бөлүгүн берген. Мелкиседек деген ат «Адилдиктин падышасы» деп которулат, ал — Салимдин да падышасы, башкача айтканда, «Тынчтыктын падышасы».
3 Анын атасы да, энеси да, санжырасы да болгон эмес, качан төрөлүп, качан өлгөнү да белгисиз. Ушундан улам ал Кудайдын Уулуна окшош жана түбөлүккө дин кызматчы бойдон кала берет.+
4 Көрдүңөрбү, ал кандай улуу болгон! Мына ошон үчүн уруу башчысы Ыбрайым ага олжолоп келаткан эң жакшы нерселеринин ондон бир бөлүгүн берген.+
5 Негизи, Мусанын Мыйзамына ылайык, Лебинин дин кызматчылыкка дайындалган урпактары+ элден, башкача айтканда, боордошторунан (алар да Ыбрайымдын тукумунан болгонуна карабай) ондук* чогултушчу.+
6 Бирок Мелкиседек Леби уруусунан болбосо да, Кудай убадаларды берген Ыбрайымдан ондук алып, ага батасын берген.+
7 Ошентип, жогору турган өзүнөн төмөн турганга батасын бергени талашсыз.
8 Ондук алган лебилер акыры өлүмгө моюн суна турган адамдар болгон, ал эми ондук алган башка бирөө, Ыйык Жазмада ырасталгандай, дагы деле жашап жатат*.+
9 Атүгүл ондук алган Леби да Ыбрайым аркылуу ондук төлөгөн деп айтса болот.
10 Анткени Мелкиседек Ыбрайымды тосуп чыкканда,+ Ыбрайымдын тукумунан чыккан Леби төрөлө элек болчу*.
11 Лебилер аткарган дин кызматчылык милдет ысрайылдыктарга Муса аркылуу берилген Мыйзамдын маанилүү бөлүгү болгон. Эгер Леби уруусунан чыккан дин кызматчылар элди жеткилең кыла алса,+ Мелкиседек сыяктуу дин кызматчынын зарылдыгы болот беле?+ Арундукундай дин кызматчылык эле жетиштүү болбойт беле?
12 Демек, дин кызматчылык алмашса, Мыйзамды да алмаштырыш керек.+
13 Анткени биз сөз кылып жаткан адам ысрайыл элинин башка уруусунан болгон. Ал уруудан эч ким курмандык жайында кызмат кылган эмес.+
14 Мырзабыз Исанын Жүйүт уруусунан чыкканы+ баарыбызга белгилүү, Муса болсо ал уруудан дин кызматчы чыгары жөнүндө эч нерсе айткан эмес.
15 Мелкиседекке окшогон+ ошол башка дин кызматчы+ чыкканда, бул айтылгандар ого бетер айкын болуп калган.
16 Ал Мыйзамда айтылган уруудан чыккандыктан эмес, анын өмүрүн өчпөс кылган күчтүн жардамы менен дин кызматчы болуп кызмат кылат.+
17 Анткени Ыйык Жазмада ал жөнүндө: «Сен түбөлүккө Мелкиседек сыяктуу дин кызматчысың»,— деп айтылган.+
18 Демек, мурунку осуяттар күчүн жоготуп, жараксыз болуп калгандыктан жокко чыгарылат.+
19 Себеби Мыйзам күнөөнү толугу менен жок кылып, эч нерсени жеткилең кыла алган эмес,+ бирок кийин Кудай берген, биз үмүттөнгөн нерсе андан алда канча жакшы жана баарын жеткилең кыла алат,+ ал аркылуу Кудайга жакындай алабыз.+
20 Ошондой эле Кудай Исаны дин кызматчы кылганда ант берген.
21 (Чынында, Кудай ант бербей эле дин кызматчы кылып дайындаган адамдар болгон, ал эми Исаны дин кызматчы кылганда Кудай ант берген. Ал жөнүндө: «Мен, Жахаба: „Сен түбөлүккө дин кызматчысың“,— деп ант бердим, оюмду өзгөртпөйм*»,— деген.)+
22 Ошондуктан Иса мурункудан алда канча жакшы келишимдин аткарыларына кепилдик болуп калды.+
23 Андан сырткары, Арундун урпактарынан чыккан дин кызматчылар өлүмгө моюн сунгандыктан кызматын уланта алышчу эмес.+ Ошон үчүн алардын ордун башкалар басып, ал кызматты улантышчу.
24 Ал эми Иса түбөлүк жашагандыктан,+ анын дин кызматчылыгы башка бирөөгө өтпөйт.
25 Демек, ал өзү аркылуу Кудайга жакындагандарды чындап куткара алат, себеби ар убак тирүү болуп, алар үчүн арачылык кыла алат.+
26 Бизге Кудайга берилген, айыпсыз, арамдалбаган,+ күнөөкөрлөрдөн айырмаланган, асмандан* да жогорулатылган+ так ушундай башкы дин кызматчы керек болчу.
27 Мурунку башкы дин кызматчылардан айырмаланып, ага күн сайын адегенде өзүнүн, андан кийин элдин күнөөлөрү үчүн+ курмандык чалыштын кереги жок,+ себеби ал өзүн бир эле жолу, биротоло курмандыкка чалган.+
28 Мусанын Мыйзамы боюнча, башкы дин кызматчы болуп күнөөкөр адамдар дайындалат,+ ал эми Кудайдын Мыйзамды бергенден кийин берген убадасы боюнча, анын түбөлүккө жеткилең болуп калган+ Уулу башкы дин кызматчы болуп дайындалат.+
Шилтемелер
^ Ыйык Жазмада Мелкиседектин өлүмү жөнүндө эч нерсе айтылбагандыктан, ал дагы деле тирүү деп эсептелген.
^ Сөзмө-сөз: «атасынын белинде болчу».
^ Же: «бул үчүн өкүнбөйм».
^ Сыягы, бул адамдар түзгөн өкмөттөрдү билдирет.
