Жакандын 1-каты 2:1—29
2 Балдарым, буларды күнөө кылбашыңар үчүн жазып жатам. Эгер кимдир бирөө күнөө кылып алса, асмандагы Атабыздын жанында жардамчыбыз* — адилдигинен жазбаган Иса Машаяк — бар.+
2 Ал биздин күнөөлөрүбүздү,+ биздин гана эмес, бүт дүйнөнүн күнөөсүн жууп,+ Кудай менен элдештириш үчүн өзүн курмандыкка чалган.+
3 Аны таанып-билгенибиз осуяттарын аткарып жатканыбыздан билинет.
4 Ким: «Мен аны таанып-билдим»,— деп, бирок осуяттарын аткарбаса, ал чындыкты айткан жок, ал жалганчы.
5 Ал эми ким анын сөзүн аткарса, Кудайды чындап сүйөрүн көрсөтөт.+ Аны менен биримдикте экенибиз сөзүн аткарганыбыздан билинет.+
6 Аны менен биримдиктемин деген киши, Иса кандай жашаса, ошондой жашашы керек.+
7 Сүйүктүү бир туугандарым, силерге жаңы эмес, өзүңөр башынан эле билген эски осуятты жазып жатам.+ Ал эски осуят — силер мурун уккан сөз.
8 Ошентсе да мен жазып жаткан осуят жаңы. Аны Машаяк өзү да аткарган, силер да аткарып жатасыңар. Эми караңгылык өтүп баратат, чыныгы жарык болсо жаркырап жатат.+
9 Ким жарыкта жүрөм деп коюп, бирок бир тууганын* жек көрсө,+ ал дагы эле караңгылыкта жүрөт.+
10 Ким бир тууганын сүйсө, ал жарыкта жүрөт,+ ошон үчүн күнөөгө батпайт*.
11 Ал эми ким бир тууганын жек көрсө, ал караңгылыкта жашап, караңгылыкта жүрөт+ жана кайда баратканын билбейт,+ себеби караңгылыктан улам көзү сокур болуп калган.
12 Сүйүктүү балдарым, силерге жазып жатканымдын себеби силердин күнөөлөрүңөр анын* ысмы үчүн кечирилди.+
13 Аталар, силерге жазып жатканымдын себеби силер эң башынан эле бар болгонду таанып-билдиңер. Улан-жигиттер, силерге жазып жатканымдын себеби силер Шайтанды* жеңдиңер.+ Сүйүктүү балдар, силерге жазып жатканымдын себеби силер асмандагы Атабызды таанып-билдиңер.+
14 Аталар, силерге жазып жатканымдын себеби силер эң башынан эле бар болгонду таанып-билдиңер. Улан-жигиттер, силерге жазып жатканымдын себеби силер күчтүүсүңөр,+ Кудайдын сөзүн жүрөгүңөрдө сактап жүрөсүңөр.+ Силер Шайтанды* жеңдиңер.+
15 Бул дүйнөнү да, дүйнөдөгү нерселерди да сүйбөгүлө.+ Ким бул дүйнөнү сүйсө, ал асмандагы Атабызды сүйбөйт.+
16 Себеби бул дүйнөдөгү адамдар денесинин каалоосун,+ көз кумарын кандырууну эңсеп турат,+ колунда болгон нерсесине мактанганга жакын келет. Бирок асмандагы Атабыз бизди буга үйрөткөн эмес.
17 Анын үстүнө, бул дүйнө да, бул дүйнөдөгү адамдар каалаган нерселер да жок болот,+ ал эми Кудайдын эркин аткарган адам түбөлүк жашайт.+
18 Балдарым, азыр акыркы убакта* жашап жатабыз. Силер Машаяктын душманы келерин уккансыңар.+ Чынында эле, азыр Машаяктын көптөгөн душмандары пайда болду.+ Акыркы убакта жашап жатканыбызды ушундан билебиз.
19 Алар бир кезде арабызда болчу, бирок кетип калышты,+ себеби биздей эмес* болчу. Эгер биздей болушса, биз менен калышмак. Ошентип, арабыздан кетип, баары биздей эмес экенин айкын көрсөтүштү.+
20 Силерди ыйык Кудай тандап алган*+ жана баарыңар чындык эмне экенин билесиңер.
21 Мен силерге чындыкты билбегениңер үчүн эмес,+ билгениңер үчүн жана чындыктан эч бир жалган нерсе келип чыкпай тургандыктан жазып жатам.+
22 Исанын Машаяк экенин четке каккан киши жалганчы болбогондо, ким жалганчы?+ Асмандагы Атабызды да, анын Уулун да четке каккан ал киши — Машаяктын душманы.+
23 Ким Кудайдын Уулун четке какса, ал Атабыз Кудайга жакпайт.+ Ал эми ким анын Уулуна ишенерин ачык билдирсе,+ Атабызга жагат.+
24 Силер болсо башында укканыңарды жүрөгүңөрдө сактагыла.+ Эгер сактасаңар, Уулу менен да, Атабыз менен да дайыма биримдикте болосуңар.
25 Андан сырткары, Кудай* өзү бизге түбөлүк өмүрдү убада кылган.+
26 Айрымдар силерди адаштырганга аракет кылып жаткандыктан, ушуларды жазып жатам.
27 Ал эми өзүңөр жөнүндө айтсам, Кудай силерди ыйык рухун* берип тандап алган+ жана ошол руху силерде азыр да бар. Ошон үчүн кимдир бирөөнүн үйрөтүшүнө муктаж эмессиңер. Ыйык рух аркылуу тандалганыңар жалган эмес, чын жана ошонун аркасында Кудай силерге бардыгын үйрөтөт.+ Ошол аркылуу үйрөнгөнүңөрдөй, Кудай менен дайыма биримдикте болгула.+
28 Ошентип, балдарым, ал өзүн айкын көрсөткөндө*, ишенимдүү сүйлөй алышыбыз үчүн+ жана ал кайра келген убакта* уялып, андан жашынбашыбыз үчүн аны менен биримдикте болгула.
29 Эгер анын адил экенин билсеңер, анда адил иш кылгандардын баары Кудайдын балдары экенин да билесиңер.+
Шилтемелер
^ Же: «жактоочубуз».
^ Бул Кудайга чогуу сыйынып, бир динди туткан кишини билдирет.
^ Же балким: «башкалардын күнөөгө батышына себепкер болбойт».
^ Б. а. Исанын.
^ Сөзмө-сөз: «кара өзгөйдү».
^ Сөзмө-сөз: «кара өзгөйдү».
^ Сыягы, элчилердин доорунун аяк чени жөнүндө айтылып жатат.
^ Же: «биздики эмес».
^ Сөзмө-сөз: «ал».
^ Б. а. ыйык күчүн.
^ Грекче эпифанейа.
