Жакан 2:1—25
2 Эки күндөн кийин Галилеядагы Каана шаарында үйлөнүү тою болду. Исанын энеси ошол жерде эле.
2 Иса да шакирттери менен тойго чакырылды.
3 Шарап түгөнгөндө, энеси Исага: «Шарабы түгөнүп калыптыр»,— деп айтты.
4 Иса ага: «Мунун бизге кандай тиешеси бар?* Мен иш-аракет кыла турган убак али келе элек»,— деди.
5 Ошондо энеси тойдо кызмат кылып жүргөндөргө: «Ал силерге эмне десе, ошону кылгыла»,— деп айтты.
6 Жүйүттөрдүн тазалануу эрежелери боюнча,+ ал жерде 6 чоң таш кумара турган. Ар бирине 40-60 литрдей суу батчу.
7 Иса кызмат кылып жүргөндөргө: «Кумараларга суу толтургула»,— деди. Алар мелт-калт кылып толтурушту.
8 Андан кийин ал: «Эми бир аз сузуп алып, той башыга алып баргыла»,— деп айтты. Алар алып барышты.
9 Той башы шарапка айланган суудан ооз тийип көрдү, бирок аны кайдан алып келишкенин билген жок. (Муну суу сузуп келген кызматчылар гана билишчү.) Ошондуктан ал үйлөнүп жаткан жигитти чакырып:
10 «Ким болбосун, адегенде шараптын жакшысын берет, ал эми начарыраагын коноктор кызып калганда берет. Сен болсо жакшысын ушул убакка чейин сактап коюптурсуң»,— деди.
11 Ошентип, Иса Галилеядагы Каана шаарында биринчи кереметин жасап, өзүнүн кандай күчкө ээ экенин ачык көрсөттү.+ Шакирттери ага ишенип калышты.
12 Андан кийин Иса энеси, бир туугандары,+ шакирттери менен чогуу Капернаумга барды.+ Бирок ал жерде аз эле күн болушту.
13 Жүйүттөрдүн Куткарылуу майрамы*+ жакындаганда, Иса Иерусалимге барды.
14 Анан ибадатканадан бодо мал, кой, көгүчкөн+ саткандарды, акча алмаштырып отургандарды көрдү.
15 Ал аркандан камчы жасап алып, алардын баарын кою, бодо малы менен кошо ибадатканадан кууп чыкты да, акча алмаштыргандардын тыйындарын чачып, үстөлдөрүн көңтөрүп салды.+
16 Анан көгүчкөн саткандарга: «Буларыңарды алып кеткиле! Атамдын үйүн базарга айландырганыңарды токтоткула!» — деди.+
17 Ошондо шакирттери Ыйык Жазмадагы: «Сенин үйүңдү жакшы көргөндүктөн* ичим өрт болот»,— деген сөздөрдү эстешти.+
18 Жүйүттөр болсо Исага: «Буларды кылганга укугуң бар экенин кандай жышаан менен далилдейсиң?»+ — дешти.
19 «Бул ибадаткананы бузгула, мен аны үч күндүн ичинде кайра тургузам»,— деп жооп берди Иса.+
20 Тигилер: «Бул ибадаткана 46 жылда курулган. Сен болсо аны үч күндө тургузам дейсиңби?» — дешти.
21 Иса болсо «ибадаткана» деп өзүнүн денесин айткан эле.+
22 Кийин ал тирилгенде, шакирттери ушул сөздөрүн эстеп, анын айткандарына,+ Ыйык Жазмада жазылгандарга ишенип калышты.
23 Исанын Иерусалимде Куткарылуу майрамында жасаган кереметтерин көрүп, көптөр ага* ишенип калышты.
24 Бирок Иса аларга ишене берген жок, анткени алардын баарын жакшы билчү.
25 Ошондой эле адамдын жүрөгүн көрүп тургандыктан+ кимдир бирөө жөнүндө башкалардын айтып беришине муктаж эмес эле.
Шилтемелер
^ Сөзмө-сөз: «Мага жана сага эмне, аял?» Семит тилиндеги бул идиома каршы болууну билдирет. Бул жерде «аял» деген сөздүн колдонулушу урматтабагандыкты билдирбейт.
^ Сөзмө-сөз: «үйүңө болгон кызганычтан улам».
^ Сөзмө-сөз: «анын ысмына».
