Жакан 5:1—47
5 Ошондон кийин жүйүттөрдүн бир майрамы болуп,+ Иса Иерусалимге барды.
2 Иерусалимде Кой дарбазасынын+ жанында еврейче Бетзада деп аталган жасалма көлмө бар эле. Аны түркүктөрү бар үстү жабык беш жай курчап турчу.
3 Ал жерде көптөгөн оорулуулар, сокурлар, аксактар, колу-буту сенектер* жатчу.
4 *——
5 Алардын арасында ооруганына 38 жыл болуп калган бир киши бар эле.
6 Иса анын жатканын көрүп, көптөн бери оорулуу экенин билгендиктен: «Айыккың келеби?» — деп сурады.+
7 Ал: «Мырзам, суу чайпалганда мени көлмөгө түшүрөр эч кимим жок. Мен жеткиче эле, башка бирөө түшүп кетет»,— деп жооп берди.
8 Ошондо Иса: «Ордуңан туруп, төшөнчүңдү* ал да бас»,— деди.+
9 Тиги ошол замат оорусунан айыгып, төшөнчүсүн алды да, баса баштады.
Ал күн дем алыш* болчу.
10 Ошондуктан жүйүттөр айыккан кишиге: «Бүгүн дем алыш, төшөнчүңдү көтөрүп жүргөнүң туура эмес»,— дешти.+
11 Ал: «Мени айыктырган киши мага: „Төшөнчүңдү ал да бас“,— деди»,— деп жооп берди.
12 Алар: «Сага: „Төшөнчүңдү ал да бас“,— деп айткан ал ким?» — деп сурашты.
13 Бирок айыккан киши анын ким экенин билбей калган эле, анткени Иса ошол жердеги элге аралашып кеткен болчу.
14 Кийин Иса ага ибадатканадан жолугуп: «Мына, азыр ден соолугуң жакшы болуп калды. Эми мындан да жаман нерсеге дуушар болбошуң үчүн мындан ары күнөө кылба»,— деди.
15 Ал болсо жүйүттөргө барып, өзүн айыктырган киши Иса экенин айтты.
16 Ошондо алар Исаны дем алыш күнү ушундай иштерди жасаганы үчүн куугунтуктай башташты.
17 Иса болсо аларга: «Атам ушу кезге чейин эмгектенип келатат, мен да эмгектенип жатам»,— деди.+
18 Муну укканда жүйүттөр Исаны өлтүргөнгө ого бетер аракет кыла башташты. Анткени, алардын ою боюнча, ал дем алыш күн жөнүндөгү мыйзамды гана бузбастан, Кудайды «Атам» деп атап,+ өзүн ага теңеп жаткан болчу.+
19 Иса болсо аларга мындай деди: «Силерге чындыкты айтып коёюн, Уулу* өз оюна таянып эч нерсе кылбайт. Ал Атасынан* көргөндү гана кылат.+ Атасы эмне кылса, Уулу да ошону кылат, аны Атасы кылгандай кылат.
20 Анткени Атасы Уулун жакшы көрөт+ жана ага өзү жасагандын баарын көрсөтөт. Силер таң калышыңар үчүн, ага мындан да чоң иштерди көрсөтөт.+
21 Атасы өлгөндөрдү тирилтип, өмүр бергендей эле,+ Уулу да өзү каалагандарга өмүр берет.+
22 Атасы эч кимди соттобойт. Баарына Уулу сот жүргүзүшү үчүн, бүт бийликти ага берген.+
23 Муну Атасы, бардыгы аны урматтагандай эле, Уулун да урматташы үчүн кылган. Уулун урматтабаган киши аны жиберген Атасын да урматтабайт.+
24 Силерге чындыкты айтып коёюн, менин сөзүмдү угуп, мени жибергенге ишенген адам түбөлүк өмүр сүрөт.+ Ал соттолбойт, анткени өлүмдөн өмүргө өттү.+
25 Силерге чындыкты айтып коёюн, өлгөндөр Кудайдын Уулунун үнүн уга турган, ага кулак каккандар жашай турган убак келет, атүгүл келип да калды.
26 Анткени Атасынын өмүр бергенге кудурети бар болгондой эле*,+ ал Уулуна да өмүр бергенге кудурет берген.+
27 Ага сот жүргүзгөнгө да бийлик берген,+ анткени ал — адам Уулу.+
28 Буга таң калбагыла, себеби мүрзөлөрдө жаткандардын баары* анын үнүн уга турган убак келет.+
29 Ошондо өлгөндөр мүрзөдөн чыгышат: жакшылык кылгандар өмүр сүрүш үчүн, жамандык кылгандар соттолуш үчүн тирилет.+
30 Мен өз оюмдан эч нерсе кыла албайм. Атам кандай айтса, ошондой соттойм. Мен жүргүзгөн сот адилеттүү,+ анткени өзүмдүн эмес, мени жибергендин эркин аткарганга умтулам.+
31 Эгерде өзүм жөнүндө өзүм гана күбөлөндүрсөм, айткандарым салмактуу болмок эмес.+
32 Бирок мен жөнүндө күбөлөндүргөн башка бирөө бар. Анын мен жөнүндө айткандары чын экенин билем.+
33 Силер Жаканга кишилериңерди жибергенде, ал мен тууралуу чындыкты айткан.+
34 Мен адамдардын мен жөнүндө күбөлөндүрүшүнө муктаж эмесмин, ошентсе да буларды куткарылышыңар үчүн айтып жатам.
35 Жакан жаркырап күйүп турган чырак эле, силер анын жарыгында кубанып-шаттангыңар келди, бирок ал каалооңор тез эле өчүп калды.+
36 Жакан мени Атам жибергенин күбөлөндүргөн. Бирок менде андан да күчтүү далил бар. Мени Атам жибергенин Атам мага тапшырган жана мен аткарып жаткан иштер тастыктап турат.+
37 Мени жиберген Атам өзү да мен жөнүндө күбөлөндүргөн.+ Силер эч качан анын үнүн уккан эмессиңер, жүзүн да көргөн эмессиңер.+
38 Силер ал жиберген кабарчыга ишенбей жатасыңар, ошондуктан анын сөзү жүрөгүңөрдөн түнөк тапкан жок.
39 Силер түбөлүк өмүргө жетиш үчүн Ыйык Жазманы изилдеп жатасыңар.+ Ыйык Жазма болсо мен жөнүндө күбөлөндүрүп турат.+
40 Ошентсе да өмүр алыш үчүн менин жолумду жолдогуңар келбей жатат.+
41 Мен өзүмө адамдардан даңк издебейм.
42 Ал эми силер жөнүндө айта турган болсом, силер Кудайды сүйбөйсүңөр, мен муну жакшы билем.
43 Мен Атамдын атынан келдим, бирок силер мени кабыл албай жатасыңар. Эгер башка бирөө өзүнүн атынан келсе, аны кабыл алмаксыңар.
44 Жападан жалгыз Кудайга жакканга умтулбай, бири-бириңерден даңк издеп жатсаңар, мага кантип ишенмек элеңер?+
45 Мени Атамдын алдында силерди айыптайт деп ойлобогула. Силерди айыптай турган — өзүңөр үмүт арткан Муса.+
46 Эгер Мусага ишенсеңер, мага да ишенмексиңер, анткени ал мен жөнүндө жазган.+
47 Анын жазгандарына ишенбесеңер, менин айткандарыма кантип ишенмек элеңер?»
Шилтемелер
^ Же: «шал болуп калгандар».
^ Бул аят Ыйык Китептин айрым котормолорунда бар болсо да, грек тилиндеги байыркы негизги кол жазмаларда кездешпейт. А3 тиркемесин кара.
^ Же: «замбилиңди».
^ Б. а. Иса.
^ Б. а. Кудайдан.
^ Же: «Атасында өмүр бар болгондой эле»; «Атасында өмүр белеги бар болгондой эле».
^ Же: «эстеле турган мүрзөлөрдө жаткандардын баары». Башкача айтканда, өлгөн, бирок Кудайдын эсинде калгандардын баары.
