Жакан 6:1—71
6 Андан кийин Иса Тиберия деңизи деп да аталган Галилея деңизинин* аркы өйүзүнө жөнөдү.+
2 Артынан көп эл баратты,+ себеби анын оорулууларды керемет жолу менен айыктырганын көрүшкөн болчу.+
3 Иса тоого чыгып, шакирттери менен отурду.
4 Жүйүттөрдүн Куткарылуу майрамына+ аз калган эле.
5 Иса өзүн көздөй келаткан көп элди көргөндө Филиптен: «Бул элге нанды кайдан сатып алсак болот?» — деп сурады.+
6 Муну ал Филипти сынаш үчүн эле айтты, анткени өзү эмне кыларын билип турган.
7 Филип ага: «200 динарга* нан сатып алып, ар бирине кичинеден бергенде да, жетпейт»,— деп жооп берди.
8 Ошондо шакирттердин бири, Симон Петирдин бир тууганы Андрес, Исага:
9 «Бул жерде бир баланын беш арпа наны, эки кичинекей балыгы бар экен. Бирок ушунча кишиге бул эмне болмок эле?» — деди.+
10 Иса шакирттерине: «Элди отургузгула»,— деп айтты. Элдин баары ошол жердеги көк шиберге отурду. Эркектердин эле саны 5 000дей болчу.+
11 Иса нанды алып, Кудайга ыраазычылык билдирди да, элге тарата баштады. Балыктарды да таратып берди; ким канча кааласа, ошончодон алды.
12 Баары тойгондон кийин, ал шакирттерине: «Жегенден калганын чогултуп алгыла, эч нерсе ысырап болбосун»,— деди.
13 Алар эл жеген беш арпа нандын артканын чогултканда, 12 себет толду.
14 Иса жасаган кереметти көргөндө эл: «Бул, чын эле, дүйнөгө келери алдын ала айтылган* пайгамбар экен»,+— дей башташты.
15 Иса алардын келип, аны зордоп падыша кылганы жатышканын билгенде кайрадан өзү жалгыз+ тоого кетип калды.+
16 Кеч киргенде, шакирттери деңиз жакка түшүштү да,+
17 кайыкка отуруп, аркы өйүздөгү Капернаумга бет алышты. Караңгы кирип баратса да, Иса аларга кайтып келе элек болчу.+
18 Бир убакта катуу шамал болуп, деңиз толкуй баштады.+
19 Беш-алты чакырымдай сүзүшкөндөн кийин шакирттер суунун үстү менен кайыкты көздөй басып келаткан Исаны көрүп, коркуп кетишти.
20 Бирок ал: «Коркпогула! Бул менмин»,— деди.+
21 Шакирттер сүйүнүп кетишти да, аны кайыкка отургузуп алышты. Анан көп өтпөй эле өздөрү бет алган жээкке жетишти.+
22 Эртеси күнү берки өйүздө калган эл жээкте бир да кайык жок экенин көрдү. Ага чейин бир кичинекей кайык турган эле. Бирок эл Исанын өзүнүн шакирттери менен ал кайыкка түшпөгөнүн, алар өздөрү эле сүзүп кетишкенин билди.
23 Ал ортодо Тибериядан келаткан бир нече кайык келип токтоду. Ошол жерге жакын жерде Иса Кудайга ыраазычылык билдиргенден кийин элди нанга тойгузган эле.
24 Исанын да, шакирттеринин да жок экенин көргөн эл ошол кайыктарга түшүп, аны издегени Капернаумга жөнөдү.
25 Анан аны деңиздин ошол өйүзүнөн табышты да: «Устат,+ бул жакка качан келдиң?» — деп сурашты.
26 Иса аларга: «Силерге чындыкты айтып коёюн, силер мени кереметтерди көргөнүңөр үчүн эмес, нан жеп тойгонуңар үчүн издеп жүрөсүңөр.+
27 Бузула турган тамак үчүн эмес, түбөлүк өмүр бере турган бузулбас тамак үчүн эмгектенгиле.+ Аны силерге адам Уулу берет. Себеби асмандагы Атабыз, Кудай өзү, ага ошондой бийлик берген*»,+— деди.
28 Ошондо алар: «Кудайга жагыш үчүн эмне кылышыбыз керек?» — деп сурашты.
29 Иса: «Ал кимди жиберсе, ошого ишенгиле.+ Кудайга мына ушул жагат»,— деп айтты.
30 Алар: «Көрүп, сага ишенип калышыбыз үчүн, кандай керемет көрсөтөсүң?+ Кана, эмне кыласың?
31 Мисалы, Ыйык Жазмада: „Аларга асмандан нан берди“,+— деп жазылгандай, ата-бабаларыбыз чөлдө манна жешпеди беле»,+— дешти.
32 Буга Иса: «Силерге чындыкты айтып коёюн, Муса силерге асмандан чыныгы нан берген эмес. Силерге асмандан чыныгы нанды азыр Атам берип жатат.
33 Ким асмандан түшүп, дүйнөгө өмүр берип жатса, ошол — Кудай берген нан»,— деп айтты.
34 Ошондо алар: «Мырзабыз, бизге дайыма ошондой нан берип турчу»,— дешти.
35 Иса аларга: «Мен өмүр нанымын. Ким мага келсе, эч качан ачка болбойт. Ким мага ишенсе, эч качан суусабайт.+
36 Бирок, силерге айтканымдай, мени көрүп турсаңар да, ишенбей жатасыңар.+
37 Атам мага бергендердин баары мага келет. Мага келгендерди мен эч качан кубалабайм.+
38 Анткени мен асмандан+ өз эркимди эмес, мени жибергендин эркин аткарыш үчүн келгем.+
39 Мени жибергендин эрки болсо мындай: ал мага бергендеринин бирин да жоготушумду каалабайт, аларды акыркы күнү тирилтишимди+ каалайт.
40 Анткени Атамдын эрки боюнча, анын Уулун кабыл алып, ага ишенген* ар бир адам түбөлүк өмүр сүрүшү керек.+ Мен андай адамды акыркы күнү тирилтем»,+— деди.
41 Ошондо жүйүттөр Исанын: «Мен асмандан келген нанмын»,+— дегенин жактырбай, сүйлөнө башташты.
42 Алар: «Бул Жусуптун эле уулу Иса эмеспи? Мунун ата-энесин баарыбыз эле билебиз го.+ Анан кантип: „Мен асмандан келгем“,— деп айтып жатат?» — деп жатышты.
43 Иса аларга: «Сүйлөнгөнүңөрдү токтоткула.
44 Мени жиберген Атам өзү мага жакындатпаса, эч ким менин жолумду жолдой албайт.+ Ал эми менин жолумду жолдогон кишини акыркы күнү тирилтем.+
45 Пайгамбарлардын жазууларында: „Алардын баарын Жахаба үйрөтөт“,— деп айтылган.+ Атамды угуп, андан таалим алгандардын ар бири менин жолумду жолдойт.
46 Бирок бул Атамды кайсы бир адам көргөнүн билдирбейт.+ Атамды ал өзү* жиберген мен гана көргөм, башка эч бир адам көргөн эмес.+
47 Силерге чындыкты айтып коёюн, ким мага ишенсе, ал түбөлүк өмүр алат.+
48 Мен өмүр нанымын.+
49 Ата-бабаларыңар чөлдө манна жегени менен, баары бир өлүшкөн.+
50 Ал эми асмандан келген нанды жеген адам өлбөйт.
51 Мен асмандан келген тирүү нанмын. Ким бул нандан жесе, түбөлүк жашайт. Мен бере турган нан — адамзат* өмүр алышы үчүн бере турган денем»,+— деди.
52 Ошондо жүйүттөр: «Бул өз денесин бизге жегенге кантип бермек эле?» — деп өз ара талаша кетишти.
53 Иса аларга: «Силерге чындыкты айтып коёюн, адам Уулунун денесин жеп, канын ичпесеңер, өмүр албайсыңар*.+
54 Ким денемди жеп, канымды ичсе, түбөлүк өмүр алат. Мен аны акыркы күнү тирилтем.+
55 Анткени менин денем — накта азык, ал эми каным — накта суусундук.
56 Ким денемди жеп, канымды ичсе, ал мени менен биримдикте. Мен да аны менен биримдиктемин.+
57 Мени тирүү Атам жиберип, мен анын аркасы менен жашап жатканымдай эле, менин денемди жеген адам да менин аркам менен жашайт.+
58 Асмандан келген нан мына ушул. Бул нан ата-бабаларыңардын убагындагы нандай эмес. Алар аны жегени менен, баары бир өлүшкөн. Ал эми бул нанды жеген адам түбөлүк жашайт»,+— деди.
59 Иса бул сөздөрдү Капернаумда сыйынуу жайында* окутуп жатканда айтты.
60 Анын сөздөрүн укканда көп шакирттери: «Бул эмне дегени?! Муну ким угуп тура алат?!» — дешти.
61 Иса алардын нааразы болуп жатканын билип: «Ушул сөздөрдү угуп чалкаңардан кетип жатасыңарбы?
62 Анда адам Уулунун келген жагына көтөрүлүп баратканын көрсөңөр, эмне кыласыңар?+
63 Кудайдын ыйык руху гана өмүр бере алат,+ адамдар өмүргө өздөрү жете албайт*. Мен силерге буларды Кудайдын ыйык рухунун жетеги менен айттым, менин сөздөрүм силерге өмүр берет.+
64 Бирок араңарда ишенбегендер да бар»,— деди. Анткени ал кимдердин ишенбей турганын, аны ким сатып кетерин башынан эле билчү.+
65 Анан: «„Атам жол бербесе, эч ким менин жолумду жолдой албайт“,— деп мына ушул себептен айткам»,— деди.+
66 Ушундан кийин көп шакирттери кайрадан мурунку иштери менен алектенип,+ Исанын жолун жолдобой калышты.
67 Ошондо ал 12 элчисинен: «Балким, силердин да кеткиңер келип жаткандыр?» — деп сурады.
68 Симон Петир: «Мырзам, биз кимге бармак элек?+ Түбөлүк өмүргө жеткире турган сөздөр сенде да.+
69 Биз сенин ыйык экениңди, сени Кудай жибергенин билип, ишенип калдык»,— деп жооп берди.+
70 Иса аларга: «Мен он экиңерди тандаган эмес белем?+ Бирок араңардан бирөө жалаачы*»,+— деди.
71 Ал Симон Искариоттун уулу Жүйүт жөнүндө айткан эле. Себеби Жүйүт 12 элчинин бири болсо да, кийин Исаны сатып кеткен.+
Шилтемелер
^ Чындыгында, көл болгон. Ыйык Китепте ал Генисарет көлү деп да аталат.
^ Римдиктердин күмүш тыйыны. 1 динар жумушчунун 1 күндүк эмгек акысы болгон. Б14 тиркемесин кара.
^ Сөзмө-сөз: «келиши керек болгон».
^ Же: «аны жактырарын көрсөтүп, ага мөөрүн баскан».
^ Же: «ишенимин иш жүзүндө көрсөткөн».
^ Сөзмө-сөз: «Кудай».
^ Сөзмө-сөз: «дүйнө».
^ Сөзмө-сөз: «ичиңерде өмүр болбойт».
^ Же балким: «жыйын учурунда».
^ Сөзмө-сөз: «денеден эч кандай пайда жок».
^ Же: «ибилис». Грек тилиндеги «ибилис» деген сөз кимдир бирөөнү каралап, жаманатты кылган кишиге карата колдонулат.
