Жакан 9:1—41
9 Иса кетип баратып тубаса сокур бир кишини көрдү.
2 Шакирттери андан: «Устат,+ бул кишинин сокур болуп төрөлгөнүнө өзүнүн күнөөсү себеп болгонбу же ата-энесиникиби?» — деп сурашты.
3 Иса: «Буга өзүнүн да, ата-энесинин да күнөөсү себеп болгон эмес. Бирок мунун аркасында адамдар Кудайдын күчүн* көрө алышат.+
4 Жарык болуп турганда, мени жибергендин иштерин аткарышыбыз керек.+ Анткени түн кирип келатат. Ал убакта эч ким эч нерсе кыла албай калат.
5 Ушул дүйнөдө жүргөнүмдө мен дүйнөнүн жарыгымын»,+— деди.
6 Ушуларды айткандан кийин Иса жерге түкүрүп, түкүрүгүн топуракка аралаштырды да, тиги кишинин эки көзүнө сүйкөдү.+
7 Анан ага: «Барып, Силоом көлмөсүнө жуун»,— деди. («Силоом» деген сөз «жиберилген» дегенди билдирет.) Ал барып, жуунду да, көзү көрүп кайтып келди.+
8 Ошондо ошол жерликтер менен анын мурда кайыр сурап отурганын көргөндөр: «Бул баягы кайыр сурап отурган кишиби?» — дешти.
9 Айрымдары: «Ошол»,— десе, башкалары: «Жок, ал эмес. Жөн эле окшош экен»,— деп жатышты. Өзү болсо: «Ошол менмин»,— деди.
10 Тигилер андан: «Көзүң кантип көрүп калды?» — деп сурашты.
11 Ал: «Иса деген киши түкүрүгүн топуракка аралаштырып, көздөрүмө сүйкөдү да: „Силоомго барып, жуун“,— деди.+ Мен барып, жуунсам — көзүм көрүп калды»,— деди.
12 Тигилер: «Ал өзү кайда?» — деп сурашты. Тиги киши: «Билбейм»,— деп жооп берди.
13 Анан мурун сокур болгон ошол кишини фарисейлерге алып барышты.
14 Иса түкүрүгүн топуракка аралаштырып, анын көзүн айыктырган+ күн дем алыш болчу.+
15 Фарисейлер да андан көзү кантип көрүп калганын сурай башташты. Тиги киши: «Ал көздөрүмө ылай сүйкөдү. Анан жуунгандан кийин, көзүм көрүп калды»,— деди.
16 Ошондо кээ бир фарисейлер: «Эгер аны Кудай жиберген болсо, ал дем алыш күн жөнүндөгү мыйзамды бузмак эмес»,+— дешти. Ал эми башкалары: «Күнөөкөр адам ушундай кереметтерди жасай алмак беле?!»+ — деп жатышты. Ошентип, өз ара бөлүнүп-жарыла башташты.+
17 Анан сокур кишиден: «Көзүңдү ачкан ал киши жөнүндө эмне дейсиң?» — деп кайра сурашты. Тиги: «Ал — пайгамбар»,— деди.
18 Бирок жүйүттөр анын мурда сокур болгонуна ишенишкен жок. Ошон үчүн ата-энесин чакыртып,
19 алардан: «Бул силердин уулуңарбы? Сокур болуп төрөлгөн дейсиңер, анда кандайча көрүп калды?» — деп сурашты.
20 Ата-энеси: «Ооба, бул биздин уулубуз, сокур болуп төрөлгөнү чын.
21 Бирок азыр эмне болуп көрүп калганын же көзүн ким айыктырганын* билбейбиз. Өзүнөн сурагыла. Жаш бала эмес го, өзү айтып берсин»,— дешти.
22 Ата-энеси жүйүттөрдүн диний жетекчилеринен корккондуктан ушинтип айтышты.+ Анткени алар Исанын Машаяк экенине ишенгендердин баарын сыйынуу жайынан чыгарып салабыз* деп сүйлөшүп алышкан эле.+
23 Ошон үчүн ата-энеси: «Жаш бала эмес го. Өзүнөн сурагыла»,— деп коюшту.
24 Ошондо тигилер мурун сокур болгон кишини экинчи ирет чакырып: «Кудайдын алдында чыныңды айт. Биз ал кишинин күнөөкөр экенин билебиз»,— дешти.
25 Ал болсо: «Анын күнөөкөр же күнөөкөр эмес экенин билбейм. Бир билгеним: мурун сокур болчумун, азыр көрүп калдым»,— деп жооп берди.
26 Алар: «Ал эмне кылды? Көзүңдү кантип айыктырды?» — деп сурашты.
27 Ал: «Мен баарын айтып берсем да, укпай койдуңар го. Эми эмнеге кайра уккуңар келип калды? Же силер да анын шакирти болгуңар келип жатабы?» — деди.
28 Ошондо тигилер аны жекирип: «Өзүң анын шакиртисиң! Биз болсо Мусанын шакирттерибиз.
29 Биз Кудайдын Муса менен сүйлөшкөнүн билебиз, ал эми тигини ким жибергенин билбейбиз»,— дешти.
30 Тиги киши болсо: «Аны ким жибергенин билбегениңер кызык экен. Ал менин көзүмдү айыктырбадыбы.
31 Биз Кудайдын күнөөкөрлөрдү укпай турганын,+ ал эми андан коркуп, эркин аткарган адамды угарын билебиз.+
32 Буга чейин кимдир бирөөнүн тубаса сокурдун көзүн ачканын эч ким эч качан уккан эмес.
33 Эгер аны Кудай жибербесе, эч нерсе кыла албайт эле да»,+— деди.
34 Ошондо алар: «Сен төрөлгөнүңөн тартып күнөөкөрсүң. Анан бизди үйрөткүң барбы?» — деп, аны кууп жиберишти*.+
35 Иса аны кууп жиберишкенин укту да, ага жолугуп: «Адам Уулуна ишенесиңби?» — деп сурады.
36 «Мырзам, ал ким? Айтчы, ишенейин»,— деди тиги киши.
37 Иса: «Сен аны көргөнсүң. Азыр ал сени менен сүйлөшүп турат»,— деп жооп берди.
38 Ошондо ал: «Мырзам, ишенем»,— деди да, Исага таазим кылды.
39 Иса ага: «Мен дүйнөгө адамдарга өкүм чыгарылышына негиз болушу үчүн: көрбөгөндөр көрүп,+ көргөндөр сокур болушу үчүн келдим»,+— деп айтты.
40 Муну укканда жанында турган фарисейлер Исага: «Эмне, бизди да сокур дегиң барбы?» — дешти.
41 Буга Иса: «Эгер сокур болсоңор, күнөөлүү болмок эмессиңер. Бирок: „Көзүбүз көрөт“,— деп жатканыңар үчүн күнөөңөр кечирилбейт»,+— деди.
Шилтемелер
^ Сөзмө-сөз: «иштерин».
^ Сөзмө-сөз: «ачканын».
^ Бул жүйүттөрдүн жамаатынан толугу менен чыгып калууну билдирген.
^ Сыягы, бул анын сыйынуу жайынан чыгарылып калганын билдирет.
