Жакыптын каты 3:1—18
3 Бир туугандарым, бизге сурак катуураак болорун билесиңер,+ ошондуктан баарыңар эле окутуучу боло бербегиле.
2 Анткени баарыбыз тең көп жаңылабыз*.+ Ким оозунан жаңылбаса, ал — бүт денесин башкара алган* жеткилең адам.
3 Эгер баш ийдириш үчүн атка ооздук салсак, аны толугу менен башкара алабыз.
4 Ошондой эле кемени мисалга алалы: ал канчалык чоң болсо да, катуу шамалга айдалса да, кемечи аны кичинекей эле бургуч менен каалаган жагына бура алат.
5 Анын сыңарындай, тил да дененин кичинекей эле мүчөсү, бирок ашкере мактанат. Оттун кичинекей эле учкуну да чоң токойду өрттөп жок кылат!
6 Ооба, тил — бул от.+ Дене мүчөлөрүбүздүн ичинен көп жамандык кылганы* — тил. Анткени ал бүт денени арамдайт+, адамдын жашоосун талкалайт*. Ал гээнага* окшош, себеби баарын өрттөп жок кылат, кыйратат.
7 Адамдар жапайы жаныбарлардын, канаттуулардын, сойлоп жүрүүчүлөр менен деңиз жаныбарларынын бардык түрүн колго көндүрүп, багындыра алат, багындырып да келатат.
8 Ал эми тилди эч бир адам багындыра албайт. Тил башкарылгыс, ал көп зыян келтирет, өлүмгө дуушар кыла турган ууга толгон.+
9 Тилибиз менен Жахаба Атабызды алкайбыз, ошол эле тилибиз менен «Кудайга окшоштурулуп» жаратылган адамдарды+ каргайбыз.
10 Бир эле ооздон алкыш да, каргыш да чыгат.
Бир туугандарым, мындай кылган туура эмес.+
11 Бир эле булактан шор да, шор эмес да суу агабы?
12 Бир туугандарым, анжир дарагы зайтун береби же жүзүм анжир береби?+ Ошо сыяктуу эле, шор булактан шор эмес суу акпайт.
13 Араңардан кимиңер акылдуусуңар, кимиңер түшүнүктүүсүңөр? Ал муну жакшы жүрүм-туруму, акылмандыкка мүнөздүү* жумшактыкты чагылдырган иштери менен көрсөтсүн.
14 Эгер жүрөгүңөрдө көрө албастык,+ тажаалдык*+ бар болсо, анда акылдуумун деп мактанбагыла.+ Эгер мактансаңар, калп айткан болосуңар.
15 Бул асмандагы Кудай берген акылмандык эмес, жердегилерге,+ айбанча иш кылгандарга, жиндерге мүнөздүү акылмандык.
16 Анткени каерде көрө албастык менен тажаалдык* болсо, баш аламандык менен жамандыктын баары ошол жерде болот.+
17 Ал эми Кудай берген акылмандыкка ээ болгон адам баарынан мурда таза,+ андан кийин тынчтыкка умтулган,+ эстүү*,+ баш ийгенге даяр, аябай кайрымдуу, жакшы иштерге бай,+ калыс,+ эки жүздүү эмес болот.+
18 Андан сырткары, адилдиктин үрөнү тынчтык бар жерге себилип,+ тынчтыкка умтулгандарга түшүмүн берет*.+
Шилтемелер
^ Сөзмө-сөз: «мүдүрүлөбүз».
^ Же: «ооздуктай алган».
^ Сөзмө-сөз: «ыймансыздыктын дүйнөсү».
^ Сөзмө-сөз: «өрттөп жок кылат».
^ Же: «акылмандыктын натыйжасы болгон».
^ Же балким: «өзүмчүлдүк; өз мүдөөсүн көздөөчүлүк».
^ Же балким: «өзүмчүлдүк; өз мүдөөсүн көздөөчүлүк».
^ Же: «макул боло билген; эпке келген».
^ Же балким: «тынчтыкка умтулгандар тынчтык бар жерге үрөн сээп, адилдиктин жемишин оруп алышат».
