Жезекиел 18:1—32
18 Жахаба мага дагы кайрылып, мындай деди:
2 «Силер Ысрайыл жеринде: „Аталары кычкыл жүзүм жесе, уулдарынын тиши камалат“,— деген макалды айтып жүрөсүңөр.+ Муну менен эмне дегиңер бар?
3 „Өзүмдү оозанып ант берем,— дейт Эгедер Теңир Жахаба,— мындан ары Ысрайылда ал макалды оозго албайсыңар.
4 Мына, бардык адамдардын өмүрү* мага таандык. Атасынын өмүрү да, уулунун өмүрү да мага таандык. Ким күнөө кылса, ошол киши* өлөт.
5 Мисалы, кимдир бирөө адил киши деп коёлу. Ал дайыма адилеттүү, туура иш кылат.
6 Тоолордо буркандарга багыштап чалынган курмандыктарды жебейт,+ ысрайыл элинин жийиркеничтүү буркандарына үмүт артпайт, башка бирөөнүн аялын бузбайт,+ аялдын айызы келип жатканда, аны менен жатпайт;+
7 эч кимге жаман мамиле кылбайт,+ карыздар кишиден күрөөгө алганын кайрып берет,+ эч кимди тонобойт,+ өзүнүн тамагын ачкага берет,+ жылаңачты кийиндирет,+
8 бирөөгө карыз бергенде үстөк албайт же анын аркасы менен пайда көрбөйт,+ ал эч качан адилетсиздик кылбайт;+ эки тараптын ишин териштиргенде дайыма калыс болот;+
9 адил иш кылыш үчүн көрсөтмөлөрүмдү аткарып, чечимдериме карманат. Андай адам — адил адам, ошон үчүн анын жаны сөзсүз аман болот“,+— дейт Эгедер Теңир Жахаба.
10 „Бирок анын уулу бар деп коёлу. Ал башкаларды талап-тоносо+ же киши өлтүрсө+ же төмөнкү иштердин кайсы бирин кылса:
11 (атасы булардын эч бирин кылбаса да) тоолордо буркандарга багышталган курмандыктарды жесе, башка бирөөнүн аялын бузса,
12 жардамга муктаж болгондор менен жакырга жаман мамиле кылса,+ бирөөнү тоносо, күрөөгө алганын кайрып бербесе, жийиркеничтүү буркандарга үмүт артса,+ жийиркеничтүү иштерди кылса,+
13 бирөөгө карыз бергенде пайда көргөнгө умтулса же үстөк алса,+ ал тирүү калбайт. Ушундай жийиркеничтүү иштердин баарын кылгандыктан сөзсүз өлөт. Өз каны өз мойнунда болот.
14 Ал эми кимдир бирөөнүн уулу атасынын кылган күнөөлөрүнүн баарын көрүп жүрсө да, анын кылганын кылбайт дейли.
15 Ал тоолордо буркандарга багышталган курмандыктарды жебейт, ысрайыл элинин жийиркеничтүү буркандарына үмүт артпайт, бирөөнүн аялын бузбайт,
16 эч кимге жаман мамиле кылбайт; күрөөгө алганын менчиктеп албайт, бирөөнү тонобойт, тамагын ачкага берет, жылаңачты кийиндирет;
17 жакырды эзбейт, бирөөгө карыз бергенде үстөк албайт же анын аркасы менен пайда көрбөйт, чечимдериме карманып, көрсөтмөлөрүмдү аткарат. Андай киши атасынын айыбы үчүн өлбөйт. Анын жаны сөзсүз аман болот.
18 Ал эми атасы башкаларды алдагандыктан, тоногондуктан, элинин арасында жаман иштерди кылып жүргөндүктөн өз айыбы үчүн өлөт.
19 Бирок силер: “Эмнеге уулу атасынын айыбы үчүн жоопко тартылбайт?” — дейсиңер. Анткени уулу адилеттүү, туура иш кылып, бардык көрсөтмөлөрүмдү аткарып келет. Ошон үчүн анын жаны сөзсүз аман болот.+
20 Ким күнөө кылса, ошол киши* өлөт.+ Уулу атасынын айыбы үчүн жоопко тартылбайт, атасы да уулунун айыбы үчүн жоопко тартылбайт. Адил адам адилдиги үчүн өзү гана сыйлык алат, ыймансыз адам ыймансыздыгы үчүн өзү гана жазаланат.+
21 Эгер ыймансыз адам кылып жүргөн бардык күнөөлөрүн таштап, бүт көрсөтмөлөрүмө карманса, адилеттүү, туура иш кылса, ал сөзсүз аман болот, өлбөйт.+
22 Кылган кылмыштарынын бири да эске алынбайт.+ Ал адил иштерди кылганы үчүн тирүү болот“.+
23 „Мен ыймансыздын өлгөнүнө сүйүнөмбү?+ — дейт Эгедер Теңир Жахаба.— Жок, мен анын өз жолунан кайтканына, тирүү жүргөнүнө сүйүнөм“.+
24 „Ал эми адил адам адилдигинен жазып, туура эмес иш кылса*, ыймансыз киши кылган жийиркеничтүү иштердин баарын кылса, ал тирүү калабы? Жок, анын адил иштеринин бири да эске алынбайт.+ Ал баш ийбегени үчүн, күнөө кылганы үчүн өлөт.+
25 Бирок силер: “Жахабанын мындай кылганы адилетсиздик”,— дейсиңер.+ Ысрайыл эли, суранам, уксаңар! Менин кылганым адилетсиздикпи+ же силердикиби?+
26 Эгер адил адам адилдигинен жазып, туура эмес иш кылса, ошон үчүн өлөт. Ал өзүнүн туура эмес иштери үчүн өлөт.
27 Эгер ыймансыз адам ыймансыз иштерин таштап, адилеттүү, туура иш кыла баштаса, өз жанын сактап калат.+
28 Ал кылган иштеринин туура эмес экенин түшүнүп, алардын баарын таштаса, сөзсүз аман калат, өлбөйт.
29 Бирок ысрайыл эли: “Жахабанын мындай кылганы адилетсиздик”,— дейт. Оо, ысрайыл эли, менин кылганым адилетсиздикпи+ же силердикиби?“
30 Эгедер Теңир Жахаба мындай дейт: „Оо, ысрайыл эли, ошон үчүн мен ар бириңерди жүргөн жолуңарга жараша соттойм.+ Туура эмес иштериңерден кайткыла, толугу менен кайткыла, болбосо андай иштериңер силерге кедерги болуп, айыптуу болуп каласыңар.
31 Кылып келген бардык күнөөлөрүңөрдөн арылгыла,+ жүрөгүңөрдү, оюңарды өзгөрткүлө.+ Оо, ысрайыл эли, силерге өлүмдүн эмне кереги бар?“+
32 „Мен эч кимдин өлгөнүнө сүйүнбөйм,+— дейт Эгедер Теңир Жахаба.— Ошондуктан жолуңардан кайткыла да, жашагыла“».+
Шилтемелер
^ Сөзмө-сөз: «жан».
^ Сөзмө-сөз: «бардык жандар».
^ Сөзмө-сөз: «жан».
^ Же: «адилетсиздик кылса».
