Жезекиел 26:1—21
26 Он биринчи жылы*, айдын* биринчи күнү Жахаба мага мындай деди:
2 «Адам уулу, Тир шаары Иерусалим жөнүндө:+ „Ырас болду! Элдердин кирип-чыккан дарбазасы болгон шаар талкаланды!+ Эми баары меники болот. Ал кыйрагандыктан, мен байыйм“,— дегени үчүн,
3 Эгедер Теңир Жахаба мындай дейт: „Оо, Тир, мен сага каршы чыгам, деңиз толкунун көтөргөндөй, сага каршы көптөгөн элдерди көтөрөм.
4 Алар сенин дубалдарыңды уратышат, мунараларыңды талкалашат.+ Мен топурагыңды кырып тазалап, сени жалама аскадай кылам.
5 Сен деңиздин ортосундагы балыкчылар торун кургата турган жерге айланасың“.+
„Муну мен айттым,— дейт Эгедер Теңир Жахаба.— Сени элдер талап-тонойт.
6 Чет-жакаңдагы айылдар менен шаарчаларда жашаган эл кылычтан кырылат. Ошондо элдер менин Жахаба экенимди билишет“.
7 Эгедер Теңир Жахаба мындай дейт: „Тир, сага каршы түндүктөн Бабыл падышасы Небухаданасарды* алып келем;+ падышалардын падышасы+ болгон ал аттары,+ согуш арабалары,+ чабандестери, көп сандаган аскери менен келет.
8 Ал чет-жакаңдагы айылдар менен шаарчаларды кыйратат*, сени курчоого алыш үчүн дубал тургузат, сокку уруш үчүн курулмаларды курат, калкандардан тосмо курайт.
9 Дубалдарыңды дубал бузгучтар менен кыйратат, мунараларыңды ай балта* менен талкалайт.
10 Аттарынын көптүгүнөн сени чаң басат. Ал дубалдары урап калган шаарга кирип келген кишилердей болуп дарбазаларыңан кирип келгенде, чабандестердин, дөңгөлөктөрдүн, согуш арабаларынын дабышынан дубалдарың солкулдайт.
11 Аттарынын туягы көчөлөрүңдүн баарын тебелеп-тепсейт,+ ал элиңди кылычтап өлтүрөт, килейген түркүктөрүң жерге кулайт.
12 Аскерлер байлыгыңды талап-тоноп, дүнүйө-мүлкүңдү олжолоп кетишет,+ дубалдарыңды уратып, кооз үйлөрүңдү бузушат. Анан таштарыңды, жыгачыңды, топурагыңды сууга ыргытышат“.
13 „Мен ырларыңды токтотом, арфаларыңдын үнү угулбай калат.+
14 Сени жалама аскадай кылам. Сен балыкчылар торун кургата турган жерге айланасың,+ кайра эч качан курулбайсың, анткени муну мен, Жахаба, айттым“,— дейт Эгедер Теңир Жахаба.
15 Эгедер Теңир Жахаба Тирге мындай дейт: „Өлүп бараткан адамдарың онтоп, элиң кырылып, өзүң кыйраганда чыккан дабыштан аралдар титиребей коёбу?+
16 Деңиздин бардык төрөлөрү* тактыларынан түшүп, чапандары менен саймалуу кийимдерин чечип ыргытышат. Аларды калтырак басат. Баары жерге отуруп, титирегени басылбай, сени таң кала карашат.+
17 Алар сен жөнүндө кошок кошуп,+ сага:
“Оо, деңизден келгендер жашаган даңктуу шаар, кандай гана катуу кыйрадың!+
Деңизде өзүң да, элиң да кубаттуу эле,+Жер бетиндегилердин баарынын үрөйүн учурчу элең!
18 Сен кулаган күнү аралдар титирейт.
Кыйраганыңда, деңиздеги аралдардын тынчы кетет”,— дешет“.+
19 Эгедер Теңир Жахаба мындай дейт: „Сени эл жашабаган шаарлардай кылып ээн калтырганымда, сага ташкындаган сууларды каптатканымда, чоң суулардын астында калганыңда,+
20 сени башкалардай кылып көргө таштайм, байыртан бери көрдө жаткандарга кошом. Сенде эч ким жашабашы үчүн, сени эзелтен ээн жаткан жерлердин катарына кошуп, көргө түшө тургандар менен бирге жердин түбүнө түшүрөм.+ Анан тирүүлөрдүн жеринин даңкын чыгарам*.
21 Сага күтүлбөгөн жерден коркунуч каптатам, сен жок болосуң.+ Сени издешет, бирок эч качан таба алышпайт“,— дейт Эгедер Теңир Жахаба».
Шилтемелер
^ Жаякин падыша, Жезекиел жана башка жүйүттөр туткундалып кеткенден кийинки он биринчи жыл. (Кара: Жезекиел 1:2.)
^ Кайсы ай экени белгисиз.
^ Же: «Небухадарасарды».
^ Сөзмө-сөз: «кылыч менен кырат».
^ Же балким: «кылыч».
^ Же: «башчылары».
^ Же: «көркүн чыгарам».
