Жезекиел 32:1—32
32 Он экинчи жылдын* он экинчи айынын биринчи күнүндө Жахаба мага дагы кайрылып, мындай деди:
2 «Адам уулу, Мисир падышасы жөнүндө кошок кошуп, ага айт:
„Сен элдердин арасында күчтүү* арстандай болчусуң,Бирок үнүң басылды.
Деңиздеги алп жаныбардай элең,+ дарыяларыңдын суусун чачырата туйлачусуң,Сууларды бутуң менен ылайлантып, дарыяларды булгачусуң“.
3 Эгедер Теңир Жахаба мындай дейт:
„Чогулган көп элдерди колдонуп үстүңө торумду ыргытам.
Алар сени торум менен тартып чыгышат.
4 Сени кургактыкка таштап салам;Талаага ыргытып жиберем.
Үстүңө асман канаттууларынын баарын кондурам,Жер жүзүндөгү жапайы жаныбарларды этиңе тойгузам.+
5 Этиңди тоолорго ыргытам,Өрөөндөрдү тарпыңа толтурам.+
6 Аккан каныңды жерге ичирем,Атүгүл тоолордун боору да каныңа тоёт,Дарыялар каныңа толот“.
7 „Сен өчкөндө, асманды жаап, жылдыздарын түнөртөм.
Күндү булут менен жабам,Ай да шооласын чачпай калат.+
8 Сенин айыңан асмандагы чырактардын баарын күңүрттөнтөм,Жериңе караңгылык каптатам“,— дейт Эгедер Теңир Жахаба.
9 „Элиңди өзүң билбеген жерлерге,Элдердин арасына туткунга айдап,Көп элдердин жүрөгүн уйгу-туйгу кылам.+
10 Көптөгөн элдерди сестентем.
Падышаларынын көз алдында кылычымды шилтегенимде, алар коркуп титирешет.
Сен кулаган күнүАр бири өз жаны үчүн коркуп, титирегени басылбайт“.
11 Эгедер Теңир Жахаба мындай дейт:
„Сага Бабыл падышасы кылычы менен кол салат.+
12 Калың элиңди күчтүү жоокерлердин кылычы менен сулатам.
Алардын баары — элдердин эң мыкаачылары.+
Алар Мисирдин сыймыгын тебелеп, бүт элин кырып салат.+
13 Мен Мисирдин мол сууларынын жээгиндеги бүт малын кырам,+Ошондо ал сууларды адамдын буту да, малдын туягы да ылайлантпай калат“.+
14 „Ошол убакта ал жердин сууларын тазартам,Дарыяларын май сыяктуу агызам“,— дейт Эгедер Теңир Жахаба.
15 „Мен Мисирди эч ким жашабаган ээн жерге айлантып, андагынын баарын жок кылганда,+Тургундарынын баарын кырганда,Алар менин Жахаба экенимди билишет.+
16 Бул — кошок ыры, муну эл сөзсүз ырдайт;Бул кошокту элдердин кыздары ырдайт.
Алар Мисир жөнүндө, анын калың аскери жөнүндө кошок кошушат“,— дейт Эгедер Теңир Жахаба».
17 Он экинчи жылы айдын* он бешинчи күнү Жахаба мага мындай деди:
18 «Адам уулу, Мисирдин калың аскерин жоктоп ыйла, анын да, кубаттуу элдердин кыздарынын да жердин түбүнө* түшүп, өлгөндөрдүн жанына барарын жарыяла.
19 „Сен сулуулук жагынан сага эч ким тең келбейт деп ойлойсуңбу? Көргө түшүп, сүннөткө отургузулбагандардын жанына жат!“
20 „Мисирликтер кылычтан өлгөндөрдүн арасына кулайт.+ Мисир кылычтын мизине алынды. Аны калың аскери менен кошо сүйрөп кеткиле.
21 Эң күчтүү жоокерлер көрдөн* аны* менен жана анын жардамчылары менен сүйлөшүшөт. Мисирликтер кылычтан кырылып, сүннөткө отургузулбагандардай болуп сулап жатышат.
22 Ашур бүт аскери менен ошол жакта жатат. Алардын мүрзөлөрү падышасынын* тегерегинде. Баары кылычтан сулаган.+
23 Алар көрдүн эң түбүнө коюлган, аскери анын көрүстөнүнүн тегерегинде жатат. Баары кылычтан сулаган, анткени тирүү кезинде элдин үрөйүн учурушкан.
24 Эйлам+ бүт аскери менен ошол жерде, анын көрүстөнүнүн тегерегинде жатат. Баары кылычтан сулаган. Тирүү кезинде элдин үрөйүн учурган алар сүннөткө отургузулбаган бойдон көргө түшүшкөн. Эми алар көрдө жаткандар менен кошо маскара болушат.
25 Эйламга өлтүрүлгөндөрдүн арасынан жай даярдалды. Бүт аскери анын мүрзөсүнүн тегерегинде. Алар сүннөткө отургузулган эмес. Баары кылычтан өлүшкөн, себеби тирүү кезинде элдин үрөйүн учурушкан. Алар көргө түшкөндөр менен кошо маскара болушат. Ал* өлтүрүлгөндөрдүн арасына коюлган.
26 Мешех менен Тубал+ бүт аскери менен ошол жерде жатат. Алардын мүрзөлөрү анын* тегерегинде. Баары сүннөткө отургузулган эмес. Алар кылычтан кырылган, анткени тирүү кезинде элдин үрөйүн учурушкан.
27 Алар сүннөткө отургузулбаган жана өлүп, курал-жарактары менен кошо көргө* түшкөн күчтүү жоокерлердин жанына жатпайбы? Алар кылычтарын башына жаздап жатышат*, күнөөлөрү сөөктөрүнүн үстүндө калат, себеби тирүү кезинде элдин үрөйүн учурушкан.
28 Бирок сен* да сүннөткө отургузулбагандарга окшоп кыйратылып, кылычтан өлгөндөр менен кошо жатасың.
29 Эдом,+ анын падышалары, бардык башчылары ошол жерде жатат. Күчтүү болгонуна карабай алар кылычтан өлгөндөрдүн арасына коюлушкан; алар да сүннөткө отургузулбагандар,+ көргө түшкөндөр менен бирге жатышат.
30 Түндүктүн бардык төрөлөрү*, сидондуктардын+ баары ошол жерде жатат. Алар күчтүүлүгү менен элдин үшүн алышса да, маскара болуп, көргө, өлтүрүлгөндөрдүн жанына түшүшкөн. Сүннөткө отургузулбаган бойдон алар кылычтан сулагандар менен кошо жатышат, көрдө жаткандар менен кошо маскара болушат.
31 Мисир падышасы алардын баарын көрүп, өзүнүн аскери кабылган каргашаны ойлоп кайгырбай, тынчтанып калат.+ Ал да, анын бүт аскери да кылычтан өлөт“,— дейт Эгедер Теңир Жахаба.
32 „Тирүү кезинде элдин үрөйүн учургандыктан фараон менен бүт аскери сүннөткө отургузулбагандардын, кылычтан сулагандардын жанына жатат“,— дейт Эгедер Теңир Жахаба».
Шилтемелер
^ Жаякин падыша, Жезекиел жана башка жүйүттөр туткундалып кеткенден кийинки он экинчи жыл. (Кара: Жезекиел 1:2.)
^ Же: «жалы бар жаш».
^ Сыягы, он экинчи айдын. Салыштыр: 1-аят.
^ Же: «көргө».
^ Сыягы, Мисир падышасын билдирет.
^ Сөзмө-сөз: «анын».
^ Бул Эйламдын өзүн, падышасын же төрөсүн билдириши мүмкүн.
^ Сыягы, Мешех менен Тубалдын падышасын билдирет.
^ Сыягы, кылычы менен кошо көмүлүп, урмат-сый көрсөтүлгөн жоокерлер жөнүндө сөз жүрүп жатат.
^ Сыягы, Мисирди же анын падышасын билдирет.
^ Же: «башчылары».
