Жезекиел 4:1—17
4 Адам уулу, кыш алып, алдыңа кой да, ага Иерусалим шаарын чий.
2 Анан аны курчоого ал,+ курчоого алыш үчүн айландыра дубал тургуз,+ сокку уруш үчүн сыртына курулмаларды жасап,+ кошуун жайгаштыр, тегерегине дубал бузгучтарды кой.+
3 Темир идиш* алып, аны өзүң менен шаардын ортосуна темир дубал катары кой. Анан шаарга жүзүңдү буруп, сүрдүү кара. Ал курчоодо калат; аны сен курчоого ал. Бул ысрайыл элине белги болот.+
4 Анан сол кырыңан жатып, ысрайыл элинин айыбын көтөр.+ Ошол кырыңан канча күн жатсаң, алардын айыбын ошончо күн көтөрөсүң.
5 Алардын күнөө кылып келген жылдарына жараша сага 390 күн белгиледим,+ Ысрайылдын элинин күнөөсүн ошончо күн көтөрөсүң.
6 Ошол күндөрдү аягына чыгар.
Анан оң кырыңан жатып, Жүйүттүн элинин+ айыбын 40 күн көтөрөсүң. Сага бир жыл үчүн бир күн, бир жыл үчүн бир күн белгиледим.
7 Билегиңди түрүп, курчоого алынган Иерусалимге+ жүзүңдү буруп, сүрдүү кара, ага каршы пайгамбарлык кыл.
8 Курчоого алган күндөрүң бүтмөйүнчө, бир кырыңан экинчи кырыңа оодарыла албашың үчүн, сени аркан менен байлап коём.
9 Буудай, арпа, буурчак, жасмык, таруу, кара буудай* алып, бир идишке салып, нан жаса. Сол кырыңан жаткан күндөрү, 390 күн бою, ошондой нан жейсиң.+
10 Тамагыңды өлчөп, күнүнө 228 граммдан* же. Белгилүү бир маалда же.
11 Сууну да өлчөп, 600 граммдан* ич. Белгилүү бир маалда ич.
12 Ал нанды арпа нанды жегендей же, аны баарынын көзүнчө адамдын кургак заңына бышыр».
13 Анан Жахаба: «Ысрайылдыктарды элдердин арасына чачыратып жибергенимде, алар да ушундай арам нан жейт»,— деди.+
14 Ошондо мен: «Жок, Эгедер Теңир Жахаба! Мен жаштайыман ушул күнгө чейин тарпты да, жырткыч жара тартып кеткен жаныбардын этин да жеп арамдалган эмесмин,+ арам этти эч качан оозума алган эмесмин»,— дедим.+
15 Ошондо ал: «Макул, адамдын заңынын ордуна уйдун тезегин колдон, наныңды ошого бышыр»,— деди.
16 Анан мындай деди: «Адам уулу, мен Иерусалимдеги азык-түлүктүн корун жок кылам*.+ Эл нанды өлчөп, санаага батып жейт,+ сууну да өлчөп, үрөйү учуп ичет.+
17 Алар нан менен сууга зар болуп, аң-таң боло бири-бирин карашат, күнөөлөрү үчүн акыры жок болушат.
Шилтемелер
^ Жалпак көмөч казан сыяктуу төрт бурчтуу идиш.
^ Бул жерде колдонулган еврей сөзү байыркы Мисирде (Египетте) айдалган төмөнкү сорттогу буудайды билдирет.
^ Сөзмө-сөз: «20 шекелден». Б14 тиркемесин кара.
^ Сөзмө-сөз: «гиндин алтыдан бир бөлүгүн». Б14 тиркемесин кара.
^ Сөзмө-сөз: «нан илинген таяктарды сындырам». Сыягы, нанды сакташ үчүн илип койгон таяктарды билдирет.
