Жезекиел 41:1—26
41 Анан ал мени ибадаткананын Ыйык жайына* алып барып, каптал түркүктөрүн ченеди; алардын оң тарабындагысынын да, сол тарабындагысынын да калыңдыгы 3 метрдей* болду.
2 Кире бериштин туурасы 5 метрдей*, бир тарабындагы дубал 2 жарым*, экинчиси да 2 жарым метрдей экен. Ыйык жайдын узундугун ченегенде, 20 метрдей*, туурасы 10 метрдей* болду.
3 Анан ал ичкери* кирип, кире бериштеги каптал түркүктү ченегенде, калыңдыгы 1 метрдей*, кире бериштин туурасы 3 метрдей болду. Эки тарабындагы дубалдын ар бири 3 жарым метрдей* экен.
4 Ыйык жайдын жанындагы бөлмөнү ченегенде, узундугу да, туурасы да 10 метрдей болду.+ Ал мага: «Бул — Ыйыктын ыйыгы»,— деди.+
5 Анан ал ибадаткананын дубалын ченегенде, калыңдыгы 3 метрдей болду. Ибадаткананы тегерете жайгашкан каптал бөлмөлөрдүн туурасы 2 метрдей* экен.+
6 Каптал бөлмөлөр биринин үстүнө бири жайгашып, 3 кабат экен. Бир кабатта 30 бөлмө бар экен. Ибадаткананын дубалы тегерете тектир болуп чыгып турчу, тегерете салынган каптал бөлмөлөрдүн устундары ошол чыгып турган жерге жаткырылыптыр, бирок дубал менен бириктирилбептир*.+
7 Улам көтөрүлгөн сайын, үстүнкү кабаттагы каптал бөлмөлөр астыңкы кабаттагылардан кененирээк экен.+ Ибадаткананын эки тарабында биринчи кабаттан экинчи кабатка, андан үчүнчү кабатка чыга турган буралма тепкичтер бар экен.
8 Мен ибадаткананын астындагы бийик секини көрдүм, ал анын бардык тарабынан көрүнүп турат экен. Каптал бөлмөлөрдүн пайдубалынын бийиктиги, жерден жогорку бурчуна чейин, бир бүтүн камыш, башкача айтканда, 3 метрдей болду.
9 Каптал бөлмөлөрдүн сырткы дубалынын калыңдыгы 2 жарым метрдей экен. Ибадаткананын бир бөлүгү болгон каптал бөлмөлөрдүн сырткы дубалы менен секинин үстүнкү кырынын ортосунда бош жер* калтырылыптыр.
10 Ибадаткананын эки тарабында тең ашканалар* жайгашыптыр.+ Алар менен ибадаткананын ортосунда туурасы 10 метрдей болгон аянтча бар экен.
11 Каптал бөлмөлөргө секинин кырындагы ошол бош жер аркылуу эки кире бериштен кирсе болот экен. Кире бериштин бири түндүк тарапта, экинчиси түштүк тарапта экен. Секидеги бош жердин туурасы бардык жагынан 2 жарым метрдей экен.
12 Батыш тарапта кире бериши бош аянтчаны караган бир имарат бар экен. Анын туурасы 36, узундугу 46 метрдей* экен. Дубалынын калыңдыгы 2 жарым метрдей экен.
13 Ал ибадаткананы ченегенде, узундугу 51 метрдей* болду. Бош аянтчанын, имарат* менен анын дубалдарынын жалпы узундугу да 51 метрдей болду.
14 Ибадаткананын чыгышты караган алды жагы менен анын эки тарабындагы бош аянтчанын туурасы жалпы алганда 51 метрдей болду.
15 Ал ибадаткананын арт жагындагы бош аянтчаны карап турган имараттын узундугун, анын эки тарабындагы өткөөлдөрүн кошо ченегенде, 51 метрдей болду.
Ал Ыйык жайды, Ыйыктын ыйыгын,+ короону караган далистерди да ченеди.
16 Үчөөнүн тең босоголорун, сырт жакты көздөй улам кууш болуп кеткен терезелерин,+ өткөөлдөрүн да ченеди. Босогонун жанындагы дубал түбүнөн терезелерине чейин жыгач менен капталыптыр.+ Терезелер да жыгач менен капталыптыр.
17 Кире бериштин үстү жагын, ибадаткананын ички бөлүгү менен сырткы дубалдарын бүт айландыра ченеди.
18 Дубалдардын бетине керуптар+ менен курма дарактары оюлуп түшүрүлүптүр.+ Эки керуптун ортосуна бир курма дарагы оюлуп түшүрүлүптүр; ар бир керуптун экиден бети бар экен.
19 Адамдыкына окшош бети бир тарабындагы курма дарагына, арстандыкына* окшош бети экинчи тарабындагы курма дарагына каратылыптыр.+ Алар бүт ибадаткананын ичине оюлуп түшүрүлүптүр.
20 Ибадаткананын дубалына түбүнөн кире бериштин үстү жагына чейин керуптар менен курма дарактары оюлуп түшүрүлүптүр.
21 Ибадатканадагы эшиктердин кашектери* төрт чарчы экен.+ Ыйык жайдын* алдынан
22 жыгачтан жасалган курмандык жайына+ окшогон бир нерсени көрдүм. Анын бийиктиги 1 жарым метрдей*, узундугу 1 метрдей экен. Бурчтарында тирөөчтөрү бар экен. Негизи менен капталдары жыгачтан жасалыптыр. Баягы киши мага: «Бул — Жахабанын алдында турган дасторкон»,— деди.+
23 Ибадаткананын Ыйык жайы менен Ыйыктын ыйыгынын экиден эшиги бар экен.+
24 Алардын ар бири бүктөлмө, жылып турма эшик экен. Ар бир каалгасы бүктөлмө экен.
25 Ибадаткананын эшиктерине дубалдарга түшүрүлгөндөй керуптар менен курма дарактары оюлуп түшүрүлүптүр.+ Далистин кире бериш тарабынын үстү жагынан сыртты көздөй жыгач кыр чыгып туруптур.
26 Далистин капталдарына, ибадаткананын каптал бөлмөлөрүнө, жыгач кырлардын асты жагына сырт жакты көздөй улам кууш болуп кеткен терезелер+ салынып, курма дарагы оюлуп түшүрүлүптүр.
Шилтемелер
^ Сөзмө-сөз: «ибадатканага». 41, 42-бөлүмдөрдө бул сөз сырткы ыйык бөлмөгө (Ыйык жайга) же жалпы эле ыйык жайга (Ыйык жай менен Ыйыктын ыйыгын камтыган ибадатканага) карата колдонулган.
^ Сөзмө-сөз: «6 чыканак». Б14 тиркемесин кара.
^ Сөзмө-сөз: «10 чыканак».
^ Сөзмө-сөз: «5 чыканак».
^ Сөзмө-сөз: «40 чыканак».
^ Сөзмө-сөз: «20 чыканак».
^ Ички ыйык жай, тактап айтканда, Ыйыктын ыйыгы жөнүндө сөз болуп жатат.
^ Сөзмө-сөз: «2 чыканак».
^ Сөзмө-сөз: «7 чыканак».
^ Сөзмө-сөз: «4 чыканак».
^ Сыягы, жогору карай ар бир кабат сайын дубал жукара берген.
^ Сыягы, ибадаткананы айланып баса турган кууш жол.
^ Же: «бөлмөлөр».
^ Сөзмө-сөз: «туурасы 70, узундугу 90 чыканак».
^ Сөзмө-сөз: «100 чыканак».
^ Б. а. ибадаткананын батыш тарабындагы имарат.
^ Же: «жалы бар жаш арстандыкына».
^ Сыягы, Ыйык жайга кирчү эшиктердин кашектери.
^ Сыягы, Ыйыктын ыйыгынын.
^ Сөзмө-сөз: «3 чыканак».
