Жезекиел 5:1—17
5 Адам уулу, курч кылыч ал. Ал сага сакал алган кишинин устарасындай болсун. Сакалың менен башыңдагы чачыңды кыр. Анан тараза ал да, чачыңды өлчөп, үчкө бөл.
2 Курчоо күндөрү аяктаганда,+ чачыңдын үчтөн бир бөлүгүн шаардын ортосунда өрттө. Үчтөн бир бөлүгүн шаардын айланасында кылыч менен кескиле.+ Калган үчтөн бир бөлүгүн шамалга сапырып жибер. Мен кылычты кынынан сууруп, алардын артынан жиберем.+
3 Ошол акыркы бөлүгүнөн бир аз алып, кийимиңдин бүктөлгөн жерине салып кой*.
4 Дагы бир азын отко ыргытып, өрттөп жибер. Ал от бүт ысрайыл элин каптайт.+
5 Эгедер Теңир Жахаба: „Бул Иерусалимди билдирет. Мен аны тегеректе жашаган элдердин ортосуна жайгаштырдым.
6 Бирок анын тургундары менин чечимдериме, көрсөтмөлөрүмө каршы чыгып, тегерек-четтеги жерлерде жашаган элдердикинен да жаман иштерди кылды.+ Алар чечимдеримди жерип, көрсөтмөлөрүм боюнча жашаган жок“,— дейт.
7 Ошондуктан Эгедер Теңир Жахаба мындай дейт: „Силер бузулуп, айланаңардагы бардык элдерден да ашып түштүңөр, көрсөтмөлөрүм боюнча жашаган жоксуңар, чечимдериме карманган жоксуңар. Анын ордуна, айланаңардагы элдердин мыйзамдарына* карманып жүрдүңөр.+
8 Ошон үчүн Эгедер Теңир Жахаба мындай дейт: “Оо, Иерусалим шаары, мен сага каршы чыгып,+ сага чыгарган өкүмдөрүмдү башка элдердин көзүнчө ишке ашырам.+
9 Бардык жийиркеничтүү иштериң үчүн сага буга чейин кылбаган, кийин да кылбай турган бир нерсе кылам.+
10 Сенин ичиңде аталар уулдарын, уулдар аталарын жейт.+ Сага чыгарган өкүмдөрүмдү ишке ашырам, элиңдин калдыгын туш тарапка чачыратып жиберем”“.+
11 „Өзүмдү оозанып ант берем,— дейт Эгедер Теңир Жахаба,— ыйык жайымды жийиркеничтүү буркандарың, ыпылас иштериң менен арамдаганың үчүн,+ сени четке кагам*. Сени аябайм, боорум оорубайт.+
12 Элиңдин үчтөн бир бөлүгү шаар ичинде оорудан*, ачарчылыктан кырылат. Үчтөн бир бөлүгү айланаңда кылычтан өлөт.+ Калган үчтөн бир бөлүгү туш тарапка чачырап кетет, мен кылычты кынынан сууруп, алардын артынан жиберем.+
13 Ошондо ачуум басылып, кайнаган каарым кайт болот, көңүлүм жай алып, канааттанып калам.+ Каарым басылганда, алар муну мен, Жахаба, толук берилгендикти талап кылгандыктан айтканымды билишет.+
14 Мен сени ээн жерге айлантып, айланаңдагы элдердин, жаныңан өтүп бараткандардын көз алдында маскара кылам.+
15 Сага чыгарган өкүмүмдү ишке ашырганымда, ачууланып, каарданып сени жазалаганымда, айланаңдагы элдерге маскара болосуң, шылдыңга каласың,+ сабак болосуң, сени көрүп алардын үрөйү учат. Муну мен, Жахаба, айттым.
16 Тургундарыңды кырыш үчүн ачарчылыктын өлүмгө дуушар кыла турган жебелерин жаадырам. Алар элиңди жок кылат.+ Азык-түлүгүңдүн корун жок кылам, ошондо ачарчылык дагы да күч алат.+
17 Сага ачарчылык, коркунучтуу жырткычтарды жиберем,+ алар сени балдарыңан ажыратат. Жугуштуу оорудан, кан төгүүдөн улам ээн каласың; сага каршы кылыч жиберем.+ Муну мен, Жахаба, айттым“».
Шилтемелер
^ Же: «этегине түйүп кой».
^ Сөзмө-сөз: «өкүмдөрүнө».
^ Же: «элиңдин санын азайтам».
^ Же: «жугуштуу оорудан».
