Жеремия 1:1—19
1 Бенжемин уруусунун жериндеги Анатотто+ жашаган дин кызматчылардын бири Хилкиянын уулу Жеремиянын* сөздөрү.
2 Мага Жүйүт падышасы Амон+ уулу Жошиянын+ күндөрүндө, анын падышалыгынын он үчүнчү жылында Жахаба* сүйлөдү.
3 Ал мага Жүйүт падышасы Жошия уулу Жаякимдин+ күндөрүндө, Жүйүт падышасы Жошия уулу Ситкиянын+ он биринчи жылынын акырына чейин, Иерусалимдин тургундары бешинчи айда туткунга кеткенге чейин,+ улам сүйлөп турду.
4 Жахаба мага:
5 «Мен сени энеңдин ичинде калыптай электе эле билчүмүн*.+
Сени төрөлө элегиңде эле тандап алгам*.+
Элдерге пайгамбар кылып койгом»,— деди.
6 Бирок мен: «Оо, Эгедер Теңир Жахаба!
Мен кантип сүйлөштү билбейм,+ өтө эле жашмын»,+— дедим.
7 Ошондо Жахаба мага:
«„Өтө эле жашмын“,— дебе.
Сени кимдерге жиберсем, ошолордун баарына барасың,Эмнени буйрук кылсам, ошонун баарын айтасың.+
8 Аларды көрүп коркпо,+Анткени сени куткарыш үчүн мен сени менен болом.+
Муну мен, Жахаба, айттым»,— деди.
9 Анан Жахаба колун сунуп, оозума тийгизди.+ Жахаба мага: «Мына, мен сөздөрүмдү оозуңа салдым.+
10 Тамыры менен жулуш үчүн, талкалаш үчүн, жок кылыш үчүн, кыйратыш үчүн, куруш үчүн, тигиш үчүн бүгүн сени элдердин, падышалыктардын үстүнөн койдум»,— деди.+
11 Жахаба мага дагы кайрылып: «Жеремия, эмнени көрүп жатасың?» — деп сурады. Мен: «Бадам дарагынын* бутагын көрүп жатам»,— дедим.
12 Жахаба: «Туура. Себеби мен сөзүмдү аткарыш үчүн ойгоо* турам»,— деди.
13 Жахаба менден экинчи ирет: «Эмнени көрүп турасың?» — деп сурады. Мен: «Кайнап жаткан казанды* көрүп турам. Анын түндүк жагы бир аз көтөрүлүп, түштүккө ооп турат»,— дедим.
14 Ошондо Жахаба мага мындай деди:
«Бул жердин тургундарынын баарына түндүктөн алаамат келет.+
15 Себеби: „Мен түндүктөгү падышалыктардын бүт урууларын чогултуп жатам,— дейт Жахаба.+—
Алар келип, падышаларынын ар бири Иерусалимдин дарбазаларынын жанына тактыларын коюшат,+Аны курчаган бардык дубалдарга,Жүйүт жериндеги бардык шаарларга сокку урушат.+
16 Мен элиме бардык жаман иштери үчүн чыгарган өкүмдөрүмдү жарыялайм,Анткени алар мени таштап кетишти,+Башка кудайларга курмандык чалып*,+Колу менен жасаган нерселерине таазим кылып келатышат“.+
17 Сен болсо даярдан да,Аларга барып, сага буйруганымдын баарын айт.
Алардан коркпо, үрөйүң учпасын,+Болбосо алардын алдында үрөйүңдү мен учурам.
18 Бүт өлкөгө, Жүйүттүн падышаларына,Төрөлөрүнө, дин кызматчыларына,+Бул жердин элине туруштук бере алышың үчүн,Бүгүн сени чептүү шаардай, темир мамыдай, жез дубалдай кылып койдум.+
19 Алар сени менен күрөшөт,Бирок жеңе албайт.
Анткени сени куткарыш үчүн мен сени менен болом.+
Муну мен, Жахаба, айттым».
Шилтемелер
^ Сыягы, «Жахаба жогорулатат» дегенди билдирет.
^ Же: «бөлүп койгом».
^ Же: «ыйыктагам».
^ Сөзмө-сөз: «ойгоо турган». Жазында биринчилерден болуп гүлдөгөн дарактардын бири.
^ Еврей тилиндеги «бадам дарагы» деген сөз айкашы менен «ойгоо туруу» деген сөз айкашы уңгулаш.
^ Же: «чоң казанды».
^ Же: «курмандык түтүнүн түтөтүп».
