Жеремия 12:1—17
12 Оо, Жахаба, сен адилсиң.+ Сага даттанганымда,Сени менен акыйкаттык жөнүндө сүйлөшкөнүмдө, сен адилеттик кыласың.
Анда эмнеге ыймансыздар ийгиликке жетип,+Саткындар бейкапар жашап жатышат?
2 Сен аларды отургузгансың, алар тамыр жайышты.
Өсүп, мөмө байлашты.
Сени оозунан түшүрүшпөйт, бирок жүрөктөрү* сенден алыс.+
3 Мени болсо, Жахаба, сен жакшы билесиң,+ мени көрүп турасың;Жүрөгүмдү изилдеп, сага бүт жүрөгүм менен берилгенимди билдиң.+
Аларды союла турган койлордой кылып бөлүп,Өлө турган күнүнө даярдап кой.
4 Бул жер качанга чейин какшып,Талаадагы өсүмдүктөр качанга чейин куурай берет?+
Тургундары кыянат иштерди кылгандыктан,Жапайы жаныбарлар менен канаттуулар жок болуп кетти.
Себеби эл: «Ал биздин эмне болорубузду билбейт»,— деген эле.
5 «Эгер сен* жөө жүргөндөр менен жарышканда чарчасаң,Анда аттар менен кантип жарышасың?+
Азыр бейпил жерде өзүңдү коопсуз сезип жаткандырсың,Бирок Иордандын жээгиндеги калың бадалдын арасында калганда кантер экенсиң?
6 Атүгүл жакындарың, жакын туугандарың,Сага чыккынчылык кылышты.+
Алар сага катуу кыйкырышты.
Атүгүл жакшы нерселерди айтышса да,Аларга такыр ишенбе».
7 «Мен үйүмдү таштап койдум;+ менчигимди карабай койдум.+
Жакшы көргөн элимди душмандарынын колуна салып бердим.+
8 Менчигим мен үчүн токойдогу арстандай болуп калды.
Мага арылдады.
Ошон үчүн аны жек көрүп калдым.
9 Мен үчүн ал жүнү түркүн түстүү* жырткыч куштай;Аны башка жырткыч куштар курчап алып, кол салып жатышат.+
Талаа жаныбарлары, баарыңар чогулуп келгиле;Келип, азыктангыла.+
10 Көп койчулар жүзүмзарымды бүлдүрүштү;+Үлүш жеримди тебелеп-тепсешти.+
Жакшы көргөн жеримди ээн талаага айлантышты.
11 Ал такыр жерге айланды,Кагырап калды*;Көз алдымда аңгырап ээн жатат.+
Бул жерде бир да жан жашабай калды,Бирок буга эч ким деле маани бербейт.+
12 Чөлдөгү тапталган бардык чыйыр жолдор менен бүлдүрүп-кыйрата тургандар келди,Жахабанын кылычы бул жердин бир четинен экинчи четине чейин кыргын салып жатат.+
Баарынан тынчтык кетти.
13 Алар буудай эккен эле, бирок тикенек оруп алышты.+
Жанын сабап иштешкен эле, бирок мээнети талаага кетти.
Жахаба каарын төккөндүктөн, түшүм ала алышкан жок,Ошон үчүн алар уят болушат».
14 Жахаба мындай дейт: «Ысрайыл элиме берген жерге кол салган кара ниет кошуналарымдын+ баарын өз жеринен тамыры менен жулуп таштайм,+ Жүйүттүн элин болсо алардын арасынан жулуп алам.
15 Бирок тамыры менен жулуп алгандан кийин кайрадан кайрымдуулук кылып, ар бирин өз мурасына, өз жерине алып барам».
16 «Ал элдер менин элиме Баалды оозанып ант бергенди үйрөткөндөй, эми өздөрү элимдин жолу менен жүргөндү, „Тирүү Кудай Жахабаны оозанып ант берем!“ деп менин атымды оозанып ант бергенди үйрөнүшсө, анда элимдин арасында жашашат.
17 Эгер кайсы бир эл тил албай турган болсо, ал элди тамыры менен жулуп, жок кылам»,— дейт Жахаба.+
Шилтемелер
^ Же: «жан дүйнөсү; тереңде жаткан ойлору». Сөзмө-сөз: «бөйрөктөрү».
^ Сыягы, Кудай Жеремия пайгамбарга кайрылып жатат.
^ Же: «темгили бар».
^ Же балким: «Күйүт тартып жатат».
