Жеремия 23:1—40
23 «Менин жайытымдагы койлорду кырган, туш-тушка чачыраткан койчулардын башына каран түн түшөт!» — дейт Жахаба.+
2 Ошон үчүн Ысрайылдын Кудайы Жахаба анын элин кайтарган койчуларга: «Силер менин койлорумду чачыратып, туш-тушка айдап жибердиңер, карабай койдуңар»,— дейт.+
«Ошондуктан силерди жаман иштериңер үчүн жазалайм»,— дейт Жахаба.
3 «Анан койлорумдун калдыгын, аларды кайсы жерлерге чачыратып жиберсем,+ ошол жерлерден чогултуп, жайытына алып келем.+ Алар төлдөп, көбөйүшөт.+
4 Аларды жакшы кайтара турган койчуларды дайындайм.+ Ошондон кийин алар коркуп-үркпөйт, бири да жоголбойт»,— дейт Жахаба.
5 «Мына, мен Дөөтүнүн тукумунан адил мураскор* чыгара турган күндөр келатат,+— дейт Жахаба.— Ал падыша бийлик жүргүзүп,+ жерде акылдуулук менен иш кылат, акыйкат, адил иш кылат.+
6 Анын күндөрүндө Жүйүттүн эли куткарылат,+ Ысрайылдын эли коопсуз жашайт.+ Ага „Биздин адилдигибиз Жахабадан“ деген ат коюшат».+
7 «Алар: „Ысрайыл элин Мисир жеринен алып чыккан тирүү Кудай Жахабаны оозанып ант берем!“ — деп айтпай кала турган күндөр келатат,+— дейт Жахаба.—
8 Анын ордуна: „Ысрайыл элинин урпактарын түндүк жеринен, аларды чачыратып жиберген бардык жерлерден алып чыгып, өз жерине алып келген тирүү Кудай Жахабаны оозанып ант берем!“ — деп калышат. Алар өз жеринде жашашат».+
9 Пайгамбарларга болсо мындай дейм:
Жүрөгүм жараланып,Бүткөн боюм* титиреп жатат.
Жахаба үчүн, анын ыйык сөздөрү үчүн*Ичип алган кишидей,Шарапка мас болгон кишидей болуп калдым.
10 Себеби жер Кудайга берилгендигин сактабагандарга* толду;+Каргыштан улам күйүт тартып жатат,+Ээн талаадагы жайыттар куурап калды.+
Алар жамандык кылышат, бийлигин кыянат колдонушат.
11 «Пайгамбар да, дин кызматчы да арамдалды*.+
Атүгүл менин ибадатканамда да жаман иштерди кылып жатканын көрүп жатам»,+— дейт Жахаба.
12 «Ошон үчүн алардын жолу караңгы,+ тайгак болот;Аларды түртүп жиберишкенде, жыгылышат.
Мен аларды жоопко тарта турган жылы баштарына алаамат түшүрөм,— дейт Жахаба.—
13 Мен Самариянын+ пайгамбарларынын да жийиркеничтүү иштерин көрүп келатам.
Алар Баалдын атынан сүйлөп,Ысрайыл элимди адаштырып жатышат.
14 Иерусалимдин пайгамбарларынын да төбө чачты тик тургузган иштерин көрүп келатам:
Алар ойноштук кылып,+ жалгандыкка белчесинен батышты,+Жамандык кылгандарды колдошот,Эч кимиси жаман жолунан кайтпайт.
Алардын баары менин көз алдымда Содомдун тургундарындай,+Иерусалимдин эли Амордо жашагандардай болуп калды».+
15 Асман аскерлеринин Кудайы Жахаба пайгамбарлар жөнүндө:
«Мен аларга эрмен жедирем,Уу кошулган суу ичирем.+
Себеби Иерусалимдин пайгамбарлары бул жердин баарында элди Кудай жолунан четтетип жатышат»,— дейт.
16 Асман аскерлеринин Кудайы Жахаба мындай дейт:
«Силерге пайгамбарлык кылып жаткандардын сөзүн укпагыла.+
Алар силерди адаштырып жатат*.
Оюнан чыгарган аяндарды айтып жүрүшөт,+Ал аяндарды Жахаба берген эмес.+
17 Мени урматтабагандарга кайра-кайра:
„Жахаба: “Силер тынчтыкта жашайсыңар”,+— дейт“,— деп жатышат.
Тоң моюндук кылып, жүрөгүнүн каалоосу боюнча жүргөндөрдүн ар бирине:
„Башыңарга алаамат түшпөйт“,— деп жатышат.+
18 Жахабанын сөзүн угуп, түшүнгүдөй,Ким аны менен жакын мамиледеги адамдардын арасында?
Угуш үчүн анын сөзүнө ким көңүл буруп жатат?
19 Мына, Жахабанын каары удургуган шамалдай болот;Уюлгуган катуу шамалдай ыймансыздарды каптап калат!+
20 Жахаба жүрөгүндөгү ойлорун орундатмайын, ишке ашырмайын,Каары кайт болбойт.
Силер муну акыркы күндөрү айкын түшүнөсүңөр.
21 Мен пайгамбарларды жибербесем да, өздөрү чуркап кетишти.
Аларга эч нерсе дебесем деле, өз оюнан чыгарып айтышты.+
22 Эгер алар мага жакын адамдардын арасында болушса,Элиме сөздөрүмдү жеткирип турушмак,Ошентип аларга жаман жолунан кайтып, кыянат иштерин таштаганга жардам беришмек».+
23 «Мен жакынды гана көрө алган,Ал эми алысты көрө албаган Кудай бекем?» — дейт Жахаба.
24 «Мен көрбөй турган жерге жашына ала турган адам барбы?»+ — дейт Жахаба.
«Мен асман менен жердегинин баарын көрүп турат эмесминби?+ — дейт Жахаба.—
25 Пайгамбарлардын: „Түш көрдүм! Түш көрдүм!“ — деп менин атыман жалган айтып жүргөнүн уктум.+
26 Ал пайгамбарлар качанкыга чейин жалган нерселерди айтып пайгамбарлык кыла беришет? Алар өз оюнан чыгарып алган калпты айтып жүрүшөт.+
27 Элим менин ысмымды унутуп калышы үчүн, түштөрүн улам бирөөгө айтып жатышат. Алардын ата-бабалары да Баалга сыйынып, менин ысмымды унутуп койгон болчу.+
28 Түш көргөн пайгамбар түшүн айтсын, ал эми мен кайсы пайгамбарга сүйлөгөн болсом, ал сөзүмдү бурмалабай айтсын».
«Саман менен дан бирдейби?» — дейт Жахаба.
29 «Менин сөзүм оттой,+ аска ташты жарган барскандай эмеспи?» — дейт Жахаба.+
30 «Ошон үчүн сөздөрүмдү бири-биринен уурдаган пайгамбарларды жазалайм»,— дейт Жахаба.+
31 «„Кудай мындай дейт!“ — деп өзүнүн сөзүн айткан пайгамбарларды жазалайм»,— дейт Жахаба.+
32 «Жалган түштөрүн айтып жүргөн пайгамбарларды жазалайм,— дейт Жахаба.— Алар калп айтып, мактанып, элимди адаштырып жатышат».+
«Аларды мен жиберген эмесмин, аларга буйрук да берген эмесмин,— дейт Жахаба.— Ошон үчүн бул элге алардын эч кандай пайдасы тийбейт».+
33 «Бул эл же кайсы бир пайгамбар, же дин кызматчы сенден: „Жахаба кандай жүк* артты?“ — деп сураса, ага: „Жахаба: “Силер өзүңөр жүксүңөр! Мен силерден арылам”,+— деп жатат“,— деп жооп бер.
34 Кайсы бир пайгамбар, дин кызматчы же эл арасынан кимдир бирөө: „Бул — Жахабанын арткан жүгү!“ — десе, аны үйүндөгүлөрү менен кошо жазалайм.
35 Силер бири-бириңерден, жакыныңардан: „Жахаба эмне деп жооп берди? Жахаба эмне деди?“ — деп сурап жатасыңар.
36 «Бул — Жахабанын арткан жүгү»,— дегениңерди койгула. Себеби ар бириңерге өз сөзүңөр жүк болуп жатат, силер тирүү Кудайдын, асман аскерлеринин Кудайы Жахабанын, биздин Кудайыбыздын, сөзүн бурмалап жатасыңар.
37 Сен андай пайгамбарга мындай де: „Жахаба сага эмне деп жооп берди? Жахаба эмне деди?
38 Эгер: “Бул — Жахабанын арткан жүгү!” — дей берсеңер, Жахаба мындай дейт: “Мен силерге: “Бул — Жахабанын арткан жүгү!” — дебегиле”,— деп айттырып жиберсем да, силер: “Бул сөз — Жахабанын арткан жүгү!” — дей бердиңер.
39 Ошон үчүн силерди көтөрүп туруп, ары көздөй ыргытып жиберем. Өзүңөргө жана ата-бабаларыңарга берген бул шаарды да, силерди да четке кагам.
40 Силерди түбөлүккө маскара кылам, түбөлүккө басынтыласыңар. Мунуңар эч качан унутулбайт“».+
Шилтемелер
^ Сөзмө-сөз: «чырпык».
^ Сөзмө-сөз: «Сөөктөрүмдүн баары».
^ Же: «Жахабанын ыйык сөздөрү жөнүндө укканда».
^ Же: «ойноштук кылгандарга».
^ Же: «Кудай жолунан четтеп кетти».
^ Же: «курулай эле үмүттөндүрүп жатат».
^ Же: «оор кабар айтты». 33—38-аяттарда «жүк» деп которулган еврей тилиндеги сөздүн «Кудайдан келген олуттуу кабар», «жүк болгон нерсе» деген эки мааниси бар.
